"ޑްރަގް ނެޓްވޯކުތައް ހުއްޓުވުމަށް ސަރުކާރުގެ ހުރިހާ ވަސީލަތެއް ބޭނުން ކުރާނަން"
3 ފެބުރުއަރީ 2022 | ބުރާސްފަތި 05:32ކޮވިޑްގެ ޙާލަތާއި ގުޅިގެން ޑްރަގްގެ ހާލަތު އިތުރަށް ގޯސްވި
ރައީސުލްޖުމްހޫރިއްޔާ ރިޔާސީ ބަޔާން އިއްވަވަނީ
ޑްރަގް ނެޓްވޯކުތައް ހުއްޓުވުމަށް ސަރުކާރުގެ ހުރިހާ ވަސީލަތެއް ބޭނުން ކުރައްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
ބުރާސްފަތި ދުވަހު ރިޔާސީ ބަޔާން އިއްވަވަމުން ރައީސް ސާލިޙު ވިދާޅުވީ، ކޮވިޑްގެ ޙާލަތާއި ގުޅިގެން ޑްރަގްގެ ހާލަތު އިތުރަށް ގޯސްވި ކަމަށެވެ. އެގޮތުން މަސްތުވާތަކެއްޗަކީ އޭގައި ވަރަށް ބޮޑު ފަހަތެއް އޮންނަ، އިންތިޒާމްވެ ގުޅިގެން ހިންގާ ބައިނަލްއަޤްވާމީ ބޮޑު ވިޔަފާރި އެއްކަން ފާހަގަކުރައްވައި ރައީސް ވިދާޅުވީ، އެ ދޮރުތައް ބަންދުކޮށް، ޑްރަގް ވިޔަފާރި ހުއްޓުވުމަކީ އިންތިހާއަށް ގޮންޖެހުން ބޮޑު ކަމެއް ކަމަށެވެ.
އެހެންނަމަވެސް އެމަސައްކަތުގައި ދޫވެފައި ހުރި ގޮށްތައް ބާރު ކުރައްވައި، އެކަންކަމަށް ހުޅުވާ ދޮރުތައް ބަންދުކުރައްވައި، އެމީހުން ހުއްޓުވުމަށް ސަރުކާރުގެ ހުރިހާ ވަޞީލަތެއް ބޭނުން ކުރައްވާނެ ކަމުގެ ޔަޤީންކަން ރައީސް ސާލިޙު ދެއްވިއެވެ.
ރައީސް ވިދާޅުވީ، އެކަމަށްޓަކައި ކަމާބެހޭ ޓާސްކް ފޯސް އެކުލަވާލެވި، ކުރަންޖެހޭ ކަންކަން ސަރުކާރުން ކުރަމުންދާ ކަމަށެވެ. ރައީސް ވަނީ މިބަދަލުތަކުގެ ހެޔޮ ނަތީޖާ ފެންނާނެ ކަމަށް ވިދާޅުވެފައެވެ.
ރައީސް އިތުރަށް ވިދާޅުވީ، އެކަމަށް ޚާއްޞަ ހުޅުމާލޭ ހާފްވޭ ހައުސްގެ ޢުމްރާނީ މަސައްކަތް މިހާރު ކުރިއަށްދާ ކަމަށެވެ. އަދި ބޭނުންވާ އިންސާނީ ވަޞީލަތް ތަރައްޤީ ކުރުންވެސް މިހާރު ފެށިފައިވާކަމަށް ރައީސް ވިދާޅުވިއެވެ. ރައީސް ވަނީ މި ކަންކަން ފުރިހަމަވުމުން މަގުމަތިވެފައިވާ ފަރާތްތަކުގެ މައްސަލަތަކަށް ލުއި ލިބެން ފަށާނެކަމަށް ވިދާޅުވެފައެވެ.
މީގެއިތުރުން، މަސްތުވުމާއި، އެތަކެތި ފޯރުކޮށްދިނުމުގެ ކުށުގައި ހައްޔަރު ކުރެވޭ މީހުންގެ ފަރުވާގެ ރިމާންޑް ސެންޓަރެއް ގުޅީފަޅުގައި ކުރިއަށްދާކަންވެސް ރައީސް ފާހަގަކުރެއްވިއެވެ. އަދި ޑްރަގާއި ގުޅުން ހުރި ކުށްތަކާއި ފަރުވާ ބޭނުންވާ ފަރާތްތަށް ގިނަކަން ފާހަގަކުރެވޭ ސަރަޙައްދުތަކުގައި، ފަރުވާގެ މަރުކަޒުތަށް އަލުން ފެށިފައިވާކަމަށްވެސް ރައީސް ވިދާޅުވިއެވެ.
އެއާއެކު ރަށު ކައުންސިލްތަކާއި ޞިއްހީ މަރުކަޒުގެ ބެލުމުގެ ދަށުން ރަށުގައި ހުރެގެން ފަރުވާ ހޯދޭނެ ބަދަލެއްވެސް މިއަހަރު އެޕްރީލްގެ ކުރިން ފެށޭނެކަން ރައީސް ވަނީ އުފަލާއެކު ފާހަގަކުރައްވާފައެވެ.
މިދިޔަ އަހަރުގެ ރިޔާސީ ބަޔާނުގައި ފާހަގަކުރެއްވި ޑްރަގާއި ގުޅޭ ޒަމާނީ ފެންވަރުގެ މަރުކަޒު ހުޅުމީދޫގައި މިހާރު ނިންމާފައިވާކަމަށްވެސް ރައީސް ވިދާޅުވިއެވެ. އެގޮތުން 60 މީހުންގެ ޖާގައިގެ މިމަރުކަޒުން ފަރުވާ ފަށައިގަތުމުގެ ފަހުގެ ތައްޔާރީތަށް މިހާރު ހިނގަމުންދާކަންވެސް ރައީސް ފާހަގަކުރެއްވިއެވެ.
ޖަލުގައި ބަންދު ކުރެވިފައިވާ ޤައިދީންނަށް އަމާޒުކުރެވޭ މުޅިން އައު ރީހެބިލިޓޭޝަން ޕްރޮގްރާމެއްވެސް މިފެބްރުއަރީ މަހު ފެށޭނެކަމަށް ރައީސް ވިދާޅުވިއެވެ.
މަސްތުވާތަކެއްޗާއި ދެކޮޅަށް ރާއްޖޭގެ ފުލުހުންނާއި ކަސްޓަމްސް އާއި ކަމާއި ގުޅޭ މުއައްސަސާތަކުން އެންމެ ބޮޑު ކާމިޔާބީއެއް ހޯދީ މިދިޔަ ތިން އަހަރުކަން ރައީސް ފާހަގަކުރެއްވިއެވެ. އެގޮތުން ތަފާތު 330 އޮޕަރޭޝަނަކުން ޖުމްލަ 1.3 ޓަނަށް ވުރެ ގިނަ ޑްރަގް އަތުލައިގެންފައިވާ ކަމަށާއި މިތަކެތީގެ މަގުމަތީ އަގު 1.2 ބިލިއަން ރުފިޔާއަށް ވުރެ ގިނަކަންވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
