ރިޔާސީ ބަޔާން އިއްވަވާ ޖަލްސާ އިދިކޮޅުން ބޮއިކޮޓް ކުރަނީ

ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ރިޔާސީ ބަޔާން އިއްވަވާ ޖަލްސާ އިދިކޮޅު ޕްރޮގްރެސިވް ކޯލިޝަނުން ބޮއިކޮޓް ކުރުމަށް ނިންމައިފިއެވެ.

ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ފުރަތަމަ ޖަލްސާ ފެބްރުއަރީ 3ގައި ބާއްވާއިރު، މިއީ މިއަހަރުގެ ރިޔާސީ ބަޔާން އިއްވާ ޖަލްސާއެވެ. މި ޖަލްސާ ފަށަން ހަމަޖެހިފައިވަނީ ފެބްރުއަރީ 3ވާ ބުރާސްފަތި ދުވަހުގެ ހެނދުނު 09:00ގައި، މަޖިލިސް ކުރާ ގޭގައެވެ. މި ޖަލްސާ ފައްޓަވައިދެއްވާނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. އެއަށްފަހު ރައީސުލްޖުމްހޫރިއްޔާގެ ރިޔާސީ ބަޔާން އިއްވެވުން އޮންނާނެއެވެ.

އެކަމާ ގުޅޭގޮތުން އިދިކޮޅުން ނެރުނު ބަޔާނުގައި ބުނެފައިވަނީ، ސަރުކާރުގެ ނުފޫޒާއި ބާރުގެ ބޭނުންކޮށްގެން ޖުޑިޝަރީއަށް އަތްބާނައި, ޕީޕީއެމްގެ ރައީސް، ރައީސް އަބްދުﷲ ޔާމީން އަބްދުލްގައްޔޫމްގެ ޝަރީއަތް ސަރުކާރުން ބޭނުންވާ ގޮތަކަށް ގެންދިއުމަށް ސަރުކާރުން މަސައްކަތް ކުރާ ކަމަށެވެ. އިދިކޮޅުން ވަނީ ރައީސް ޔާމީނަށް "ޓާގެޓްކޮށް" ސަރުކާރުން ކަންކަން ކުރަމުންދާކަަމަށް ތުހުމަތު ކޮށްފައެވެ.

އޭގެ އިތުރުންވެސް ގިނަ ސަބަބުތަކެއް ބަޔާނުގައި ފާހަގަކޮށްފައިވާއިރު، ރައީސް ޔާމީން އިސްވެ ހުންނަވައި އިންޑިޔާ ސިފައިން މި ގައުމުން ބޭލުމަށް ގޮވާލައި ހިންގާ އިންޑިއާ އައުޓް ކެޕްމެއިނާ ދެކޮޅަށް ސަރުކާރުން ރައްޔިތުންގެ މަޖިލީހަށް ބިލެއް ހުށައެޅުމަށް ކުރަމުންދާ މަސައްކަތްވެސް ސަބަބެއްގެ ގޮތުގައި ފާހަގަކޮށްފައިވެއެވެ. އިދިކޮޅުން ބުނާ ގޮތުގައި ރިޔާސީ ބަޔާން އިއްވާ ޖަލްސާގައި އިދިކޮޅުގެ މެމްބަރުން ބައިވެރިވެވަޑައިނުގަތުމަކީ އެބޭފުޅުން ކުރައްވާ އިހުތިޖާޖެކެވެ.

ގައުމުގެ ހާލަތު ‏‏ބަޔާންކޮށްދެއްވައި އަދި ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަން ޖެހޭ ކަންތައްތައް ‏‏ހިމެނޭ ރިޔާސީ ބަޔާނެއް ރައްޔިތުންގެ މަޖިލީހަށް އިއްވެވުމަކީ ގާނޫނުއަސާސީގެ 84 ވަނަ މާއްދާގައިވާ ގޮތުގެ މަތިން، ރައީސުލްޖުމްހޫރިއްޔާއަށް ލާޒިމްކުރާ ކަމެކެވެ.

ރިޔާސީ ބަޔާނުގައި އާންމު ގޮތެއްގައި ގައުމުގެ ހާލަތު ބަޔާންކޮށްދެއްވާއިރު، ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަންޖެހޭކަަމަށް ރައީސުލްޖުމްހޫރިއްޔާއަށް ފެނިވަޑައިގަންނަވާ ކަންތައްތަކުގެ މައްޗަށް އަލިއަޅުއްވާލައްވާނެއެވެ.

މި ރިޔާސީ ބަޔާން ވެގެންދާނީ ރައީސް ސާލިހް އިއްވަވާ 4 ވަނަ ރިޔާސީ ބަޔާނަށެވެ.