ކުޅުދުއްފުށި ސިޓީގެ އެކްޓިވް ކޭހުގެ އަދަދު މައްޗަށް
1 ފެބުރުއަރީ 2022 | އަންގާރަ 16:40ކުޅުދުއްފުށި ސިޓީގެ މިވަގުތު އެކްޓިވް ކޭހުގެ އަދަދު ވަނީ 405އަށް އަރާފައި
ކުޅުދުއްފުށި ސިޓީ
ކުޅުދުއްފުށި ސިޓީން އިތުރު 73 މީހަކު ކޮވިޑްއަށް ޕޮޒިޓިވްވެ، އެކްޓިވް ކޭހުގެ އަދަދު 405އަށް އަރައިފިއެވެ.
އެ ސިޓީން ހޯމަ ދުވަހު 73 މީހުން ޕޮޒިޓިވްވެފައިވާއިރު، 53 މީހުން ވަނީ ބަލިން ރަނގަޅުވެފައެވެ. ކުޅުދުއްފުށީގައި މިހާރު އެކްޓިވް ކޭހުގެގޮތުގައި ތިބީ ބަލީގެ އަލާމާތްތައް ހުރެގެން ފްލޫ ކްލިނިކަށް ދެއްކި 221 މީހުންނާއި، ކޮންޓެކްޓް ޓްރޭސިންގ ގޮތުގައި ފާހަގަކުރެވުނު 163 މީހުންގެ އިތުރުން 20 ރެންޑަމް ސާމްޕަލްއާއި، ރާއްޖެއިން ބޭރަށް ފުރުމަށްޓަކައި ނެގި ސާމްޕަލެއް ކަމަށް ރީޖަނަލް ހޮސްޕިޓަލުން ވިދާޅުވިއެވެ.
ކުޅުދުއްފުށި ސިޓީން އާދީއްތަ ދުވަހުވެސް ވަނީ 99 މީހުން ކޮވިޑަށް ޕޮޒިޓިވްވެފައެވެ.
ކޮވިޑާ ގުޅިގެން ފިޔަވަޅު އަޅަމުން އައި އުސޫލަށް ބަދަލުގެނެސް, އެ ސިޓީގައި ވަނީ ލުއިތަކެއް ދީފައެވެ. ނަމަވެސް މޮނިޓަރިން އުވާލާފައެއް ނުވެއެވެ.
ކުޅުދުއްފުށި ސިޓީގެ އިތުރުން ހދ. ނޮޅިވަރަމުގައި އަނެއްކާވެސް ކޭސްތައްވަނީ އިތުރުވާން ފަށާފައެވެ. އެގޮތުން ކޮވިޑާއި ގުޅިގެން މިވަގުތުވެސް ނޮޅިވަރަމްގައި 68 ގެއެއްގައި 79 މީހުން ވަނީ ކަރަންޓީނު ކުރެވިފަ އެވެ.
