އެކި މައްސަލަތަކުގައި ބަންދުގައި ތިބޭ މީހުން ޑޮކްޓަރަށް ދައްކަންޖެހޭ ކޮންމެ ފަހަރަކު އާއިލާއިން އެޕޮއިންޓްމަންޓް ހަމަޖައްސައިގެން ޑޮކްޓަރަށް ދައްކާ ގޮތަށް އޮންނަ ނަމަ، ބަންދު ކުރުމުގެ މަޤްސަދު ޙާސިލު ނުވާނެކަމަށް ކްރިމިނަލް ކޯޓުން ބުނެފިއެވެ.

ކޯޓުން އެހެން ބުނެފައިވަނީ 72 ކިލޯގެ މަސްތުވާތަކެތި އެތެރެކުރި މައްސަލައިގައި ޑައިމޯފިން ޓްރެފިކްކުރުމުގެ ކުށުގެ ދަޢުވާ އުފުލާފައިވާ ސ.ހުޅުދޫ ދޭލިޔާގޭ އިރުފާން ތަޤިއްޔުގެ މައްސަލައިގައި އަންގާރަ ދުވަހު އޮތް އަޑުއެހުމުގައެވެ. މި އަޑުއެހުމަކީ ޝަރީއަތުގެ ކުރިން ހުށައަޅާ ހުށައެޅުންތަކަށް ގޮތެއް ނިންމުމަށް ބޭއްވި އަޑުއެހުމެއް ނަމަވެސް، ކޮވިޑުގެ ޙާލަތުގެ ސަބަބުން ދައުވާ ލިބޭ ބައެއް ފަރާތްތަކަށް ހާޒިރު ނުވެވޭތީ އެ ބައި ވަނީ އެހެން ދުވަހަކަށް ފަސްކޮށްފައެވެ. އަދި ދައުވާ ލިބޭ ފަރާތްތަކުގެ ބަންދު މުރާޖާ ކުރުން ވަނީ ވަކިވަކިން ކުރިއަށް ގެންގޮސްފައެވެ.

މި އަޑުއެހުމުގައި ދައުލަތުގެ ވަކީލާ ވަނީ އިރުފާން ތަޤިއްޔު ޝަރީއަތް ނިމެންދެން ބަންދުކުރަން ނިންމި ޙާލަތަށް ބަދަލެއް އައިސްފައިނުވާކަމަށް ވިދާޅުވެ، ބަންދު ދެމެހެއްޓުމަށް އެދިލައްވާފައެވެ.

އެހެންނަމަވެސް، ދިފާއީ ވަކީލު ވަނީ އިރުފާން ތަޤިއްޔުގެ ބޭސްފަރުވާގެ ކަންކަން ކޯޓުގެ އެންގުމާއި އެއްގޮތަށް ކުރިއަށް ނުދާކަން ފާހަގަކޮށް، އޭނާ ޝަރުތުތަކާއެކު 30 ދުވަހަށް ބަންދުން ދޫކޮށްލުމަށް އެދިލައްވާފައެވެ. އެގޮތުން އިރުފާން ތަޤިއްޔުއަކީ މައިބަދައިގެ ޑިސްކުގެ އޮޕަރޭޝަނެއް ކުރަން ޖެހޭ ފަރާތެއްކަން ފާހަގަކުރައްވައި ދިފާއުން ވަނީ ތަންފީޒީ އިދާރާތަކުގެ ކުރިމަތީގައި ކޯޓުގެ ބަސް ބަލިކަށިވަމުންދާ މަންޒަރު ފެންނަމުންދާކަމަށް ވިދާޅުވެފައެވެ.

އިރުފާން ދައްކަން ބޭނުންވަނީ ވަކި ޑޮކްޓަރަކަށް:

އެކަމަށް ރައްދު ދެއްވައި ދައުލަތުގެ ވަކީލާ ވިދާޅުވީ، ކަށީގެ ޚާއްސަ ޑޮކްޓަރެއްކަމަށްވާ ޑރ. އަހުމަދު ޝާންއަށް އިރުފާން ތަޤިއްޔު ދައްކަން ބޭނުންވާކަމަށެވެ. ނަމަވެސް، ޑރ.ޝާންއަށް އެޕޮއިންޓްމަންޓް ހޯދުމުގައި ބޮޑެތި ދަތިތަކެއް ހުރި ކަމަށެވެ. ވުމާއެކު، ކަށީގެ ޑޮކްޓަރެއްކަމަށްވާ ޑރ.މުހައްމަދު މުރުޝިދަށް ދެއްކޭނެ އިންތިޒާމު ހަމަޖެއްސުމަށް ކަރެކްޝަންސްއިން މަސައްކަތް ކުރި ނަމަވެސް، އިރުފާން ތަޤިއްޔު އެކަމަށް ދެކޮޅު ހަދާފައިވާކަން ކަރެކްޝަންސް އާއި ޙަވާލާދީ ދައުލަތުގެ ވަކީލާ ފާހަގަ ކުރެއްވިއެވެ.

ދައުލަތުގެ ވަކީލާ ވިދާޅުވީ، އިރުފާން ތަޤިއްޔު ބޭނުންވަނީ ވަކި ޑޮކްޓަރަކަށް ދެއްކުމަށް ކަމަށާއި، ކަށީގެ އިތުރު ޑޮކްޓަރަކަށް ދެއްކުމަށް އޭނާ އިންކާރު ކޮށްފައިވާ ކަމަށެވެ. ދައުވާ ލިބޭ މީހާ ބޭނުން ކޮންމެ ޑޮކްޓަރަކަށް ނުދެއްކި ނަމަވެސް، ބޭސްފަރުވާގެ އިންތިޒާމު ހަމަޖެއްސުމަށް މަސައްކަތްތަކެއް ކުރެވިފައިވާ ކަމަށާއި، މިހާރު ޑޮކްޓަރަށް ނުދެއްކި އޮތީ ކަރެކްޝަންސްގެ އިހުމާލަކުން ނޫންކަންވެސް ދައުލަތުގެ ވަކީލާ ފާހަގަ ކުރެއްވިއެވެ.

އޭގެ އިތުރުން، ބަންދުގައި ހުރި މީހަކު ޑޮކްޓަރަށް ދައްކަން ބޭނުންވާ ކޮންމެ ފަހަރަކު އާއިލާއިން އެޕޮއިންޓްމަންޓް ހައްދައިގެން ޑޮކްޓަރަށް ދައްކަން ގެންދާ ނިޒާމު އޮންނަ ނަމަ، ޖަލުގައި ބަންދުގައި އެއްވެސް މީހަކު ނުހުންނާނެކަންވެސް ދައުލަތުގެ ވަކީލާ ވިދާޅުވިއެވެ.

މިއާއެކު، މައްސަލަ ބައްލަވާ ގާޒީ ޙަސަން ސައީދު ވަނީ އިރުފާން ބޭނުންވާ ޑޮކްޓަރަކަށް ދެއްކުމަށް އާއިލާއިން އެޕޮއިންޓްމަންޓް ހެއްދުމުން، ޑޮކްޓަރަށް ދައްކަން ގެންދިއުމަށް ދައުލަތުގެ އިއުތިރާޒެއް އޮތްތޯ ސުވާލުކުރައްވާފައެވެ. އެގޮތުން މީހެއްގެ ސިއްޙަތަކީ އެންމެ މުހިއްމު އެއް ކަންތައްކަން ފާހަގަކުރައްވައި މައްސަލަ ބައްލަވާ ގާޒީ ވަނީ ބަންދުގައި މީހަކު ހުރި ކަމުގައިވީ ނަމަވެސް، އޭނާގެ ސިއްޙަތާއި ގުޅިގެން ކަންބޮޑުވާނަމަ، ބޭނުންވާ ޑޮކްޓަރަކަށް ދެއްކުމަށް ހުރަހެއް ނެތްކަމަށް ވިދާޅުވެފައެވެ. ނަމަވެސް އެކި މައްސަލަތަކުގައި ބަންދުގައި ތިބޭ މީހުން ޑޮކްޓަރަށް ދައްކަންޖެހޭ ކޮންމެ ފަހަރަކު އާއިލާއިން އެޕޮއިންޓްމަންޓް ހަމަޖައްސައިގެން ޑޮކްޓަރަށް ދައްކާ ގޮތަށް އޮންނަ ނަމަ، ބަންދު ކުރުމުގެ މަޤްސަދު ޙާސިލު ނުވާނެކަމަށް މައްސަލަ ބައްލަވާ ގާޒީ ޙަސަން ސައީދު ވަނީ ފާހަގަކުރައްވާފައެވެ.

ދައުލަތުން އެކަމުގައި ބުނެފައިވަނީ، ބަންދުގައި ހުރި މީހެއްގެ ފަރުވާއަށް ދައުލަތުން އިންކާރު ނުކުރާ ކަމަށާއި، ނަމަވެސް އިރުފާން ބަންދުން ދޫކޮށްލުމަށް ދައުލަތުން ނޭދޭ ކަމަށެވެ. އަދި ޑޮކްޓަރަށް ދެއްކުމާއި، އޮޕަރޭޝަން ކުރުމަށް އާއިލާއިން އެޕޮއިންޓަމަންޓް ހެއްދުމުން އެކަމުގެ ތަފްސީލު ދައުލަތަށްވެސް ހިއްސާ ކުރުމަށް ވަކީލާ ވަނީ އެދިލައްވާފައެވެ.

ގާޒީ ޙަސަން ސައީދު ވަނީ އިރުފާން ތަޤިއްޔު ބޭނުންވާ ޑޮކްޓަރަށް ދެއްކުމާއި އޮޕަރޭޝަން ކުރުމަށް އާއިލާއިން އެޕޮއިންޓްމަންޓް ހެއްދުމަށްފަހު، އެކަން އެންގުމަށް ދަންނަވާފައެވެ. އަދި އޭނާ ޝަރީއަތް ނިމެންދެން ބަންދު ކުރި ކުރުން ގާޒީ ޙަސަން ސައީދު ވަނީ ދަމަހައްޓަވާފައެވެ.

އިރުފާން ތަޤިއްޔުއަކީ 72 ކިލޯ ޑްރަގް މައްސަލައިގައި އިސްކޮށް އުޅުނު ކަމުގެ ތުހުމަތު ކުރެވޭ ފަރާތެވެ.

މި މައްސަލައަކީ 2020 ވަނަ އަހަރުގެ ޑިސެމްބަރު މަހުގެ 8 ވަނަ ދުވަހު "މަސްޖަރީ 2" ނަމަކަށް ކިޔާ ދޯންޏެއްގައި, 72 ކިލޯ ހުރި މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރިކަމަށް ތުހުމަތުކުރެވުނު މައްސަލަކެއެވެ. އެގޮތުން މި މައްސަލައިގައި 10 މީހެއްގެ މައްޗަށް ދައުވާ އުފުލާފައިވާއިރު، އެ 10 މީހުންގެ މައްޗަށް މަސްތުވާތަކެއްޗާއި ބެހޭ ޤާނޫނުގެ ދަށުން ޑައިމޯފިން ޓްރެފިކްކުރުމުގެ ކުށުގެ ދަޢުވާ ވަނީ އުފުލާފައެވެ.