ޕޯޓޯ ދޫކޮށް ލުއިސް ޑިއާޒް ލިވަޕޫލަށް

ޕޯޗުގަލުގެ ޕޯޓޯއަށް ކުޅެމުން އައި ކޮލަމްބިއާގެ ފޯވާޑް ލުއިސް ޑިއާޒް އިނގިރޭސި ކުލަބު ލިވަޕޫލަށް ސޮއިކޮށްފިއެވެ.

އާދީއްތަ ދުވަހުގެ ވަގުތެއްގައި ލިވަޕޫލުން ވަނީ އުމުރުން 25 އަހަރުގެ ޑިއާޒް އެ ޓީމަށް ސޮއިކުރިކަން އިއުލާން ކޮށްފައެވެ. ލިވަޕޫލުން ހާމަކޮށްފައިވާ ގޮތުން އޭނާ ވަނީ އެ ޓީމާއެކު 2027 ވަނަ އަހަރުގެ ނިޔަލަށް އެއްބަސްވުން ހަދާފައެވެ. ޑިއާޒްގެ ސޮއި ހޯދުމަށް ލިވަޕޫލުން 37.5 މިލިޔަން ޕައުންޑް ޚަރަދުކުރިއިރު، ބޯނަހުގެ ގޮތުގައި އިތުރު 12.5 މިލިޔަން ޕައުންޑް ޚަރަދުކުރާނެ ކަމަށް ރިޕޯޓުތައް ބުނެއެވެ.

ލިވަޕޫލުން ޑިއާޒްގެ ސޮއި ހޯދާފައިމިވަނީ އޭނާ ގަތުމަށް މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާއިން މަސައްކަތްކުރަމުން އައި ދަނޑިވަޅެއްގައެވެ. އެގޮތުން ޓޮޓެންހަމުން މީގެ ކުރިން ވަނީ ޑިއާޒްގެ ސޮއި ހޯދަން 45 މިލިއަން ޕައުންޑުގެ ބިޑެއް ކޮށްފައެވެ. އެއީ އެންމެ ފުރަތަމަ 30 މިލިޔަން ޕައުންޑް ދެއްކުމަށްފަހު، ބާކީ ބޯނަހުގެ ގޮތުގައި ބަހާލައިގެން ދޭ ގޮތަށެވެ.

އެކަމަކު އެ ޑީލް ލިވަޕޫލުން ހައިޖެކް ކުރިއިރު، ޑިއާޒްގެ މެޑިކަލް ޓެސްޓުތައް ހަދަން ލިވަޕޫލުގެ ޓީމެއް ދާދި ފަހުން ވަނީ އާޖެންޓީނާއަށް ގޮސްފައެވެ. އަންނަ އަންގާރަ ދުވަހުގެރޭ ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ކޮލަމްބިއާއިން އާޖެންޓީނާއާ ދެކޮޅަށް ނުކުންނައިރު، ޑިއާޒް މި ވަގުތު ހުރީ އާޖެންޓީނާގައެވެ.

ސްކޮޑު ވަރުގަދަ ކުރުމުގެ ގޮތުން ލިވަޕޫލުން ޑިއާޒްގެ ސޮއި ހޯދިއިރު، އޭނާއަކީ ޕޯޗުގީޒް ލީގާއި، ޔުއެފާ ޗެމްޕިއަންސް ލީގުގެ އިތުރުން ކޮލަމްބިއާ ގައުމީ ޓީމުގައި ވިދަމުން އަންނަ ކުޅުންތެރިއެކެވެ. އެގޮތުން ކޮލަމްބިއާގެ ޓީމުތަކަށް ކުޅުމަށްފަހު 2019 ވަނަ އަހަރު ޑިއާޒް ޕޯޓޯއާ ގުޅުނުއިރު، އޭނާ ވަނީ އެ ޓީމަށް ކުޅެދިން 125 މެޗުގައި 41 ލަނޑު ޖަހާފައެވެ. އަދި ވަނީ އެ ޓީމާއެކު ޕޯޗުގީޒް ލީގުވެސް ކާމިޔާބުކޮށްފައެވެ.

ހޯމަ ދުވަހު ބަންދުވާ މި މަހުގެ ޓްރާންސްފާ ބާޒާރުގައި ލިވަޕޫލުން ޑިއާޒްގެ ސޮއި ހޯދުމާއެކު، މި ޓްރާންސްފާގެ ތެރޭގައި ލިވަޕޫލުން ޓަކޫމީ މިނަމީނޯ ނޫނީ ޑިވޮކް އޮރީގީ ދޫކޮށްލާނެ ކަމަށް ރިޕޯޓުތައް ބުނެއެވެ.