މިއީ ޒާތީކަމެއް، ދައުވާކުރަން ބޭނުންވާ ނަމަ ޕީޖީއަށް ފޮނުވާ: ފާރިސް
ފާރިސް ވަނީ ފުލުހުންނަން ބަޔާން ދެއްވާފައި
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަޙުމަދު ފާރިސް މައުމޫނާ
އިދިކޮޅު ސިޔާސީ ހަރަކާތުގައި އިސް ދައުރެއް އަދާކުރައްވާ ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު، އަދި ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމްގެ ދަރިކަލުން، އަޙުމަދު ފާރިސް މައުމޫނާ މެދު ރައީސް އަބްދުﷲ ޔާމީންގެ ސަރުކާރުން ކަންކުރަނީ ޒާތީވެގެން ކަމަށް ފާރިސް މައުމޫން ވިދާޅުވެއްޖެއެވެ.
ފުލުހުން ތަހްގީގް ކުރަމުންދާ މައްސަލައަކާ ގުޅިގެން ބުރާސްފަތި ދުވަހު ފާރިސް ފުލުހުންގެ އިދާރާއަށް ހާޒިރުވުމަށް ފަހު ރާއްޖެއެމްވީއަށް މައުލޫމާތު ދެއްވަމުން ވިދާޅުވީ ފުލުހުންގެ އިދާރާއަށް ހާޒިރުކޮށް ބަޔާން ނަގާފައި ވަނީ ޕީޕީއެމްގެ ދިދަ ބޭނުން ކުރި މައްސަލައިގައި ކަމަށެވެ. އެހެންނަމަވެސް ޕީޕީއެމްގެ ދިދަ އާއި ލޯގޯ އެއްވެސް އިރެއްގައި އެޕާޓީގެ އަސާސީ ގަވައިދާ ހިލާފަށް ބޭނުންކުރައްވާފައި ނުވާނެ ކަމަށް ފާރިސް ވިދާޅު ވިއެވެ.
"އަޅުގަނޑުގެ ގަބޫލުކުރާ ގޮތުން ، އަޅުގަނޑު ގާނޫނީ ކުށެއް ކޮށްފައި ނުވާނެ. ހާއްސަމކޮށް ޖިނާއީ ކުށެއް ކޮށްފައެއް ނޯންނޯނެ، އަޅުގަނޑުމެން އެއްޗެއް ބޭނުންކުރި ނަމަ، ލޯގޯއެއް ނަމަވެސް ދިދައެއް ބޭނުންކުރި ނަމަ، އެހެން އާލާތެއް ވެސް ބޭނުން ކުރި ނަމަ، އޮންނާނީ ގާނޫނީ ހަމަތަކުގެ ތެރެއިން ބޭނުންކޮށްފައި،" ފާރިސް ވިދާޅުވިއެވެ.
މައުލޫމާތު ލިބިފައިވާ ގޮތުގައި ފާރިސް ފުލުހަށް ހާޒިރުކުރީ މޫކައި ސޫޓްސްގައި އިދިކޮޅު ފަރާތްތަކުން ބޭއްވި ނޫސްވެރިންގެ ބައްދަލުވުމެއްގައި ޕީޕީއެމްގެ ދިދަ ބޭނުންކުރި މައްސަލައިގައެވެ.
ބުރާސްފަތި ދުވަހުގެ ރޭ ފާރިސް ވަނީ މި މައްސަލައާ ގުޅިގެން ފުލުހުންނަން ބަޔާނެއް ވެސް ދެއްވާފައެވެ. އިތުރަށް ސާފްކުރަންޖެހޭނެ މައުލޫމާތެއް ނޯންނާނެކަން ފާހަގަކުރަައްވަމުން ފާރިސް ވިދާޅުވީ މައްސަލައިގައި އޭނާ ކުށްވެރިވާ ނަމަ ދައުވާކުރަން ޕްރޮސިކިއުޓަރ ޖެނެރަލް އޮފީހަށް ފޮނުވިއަސް އެއްވެސް މައްސަލައެއް ނެތް ކަމަށެވެ.
"މި ދެންނެވި ގޮތަށް ބަޔާނުގައި އޮންނާނީ، އިތުރަށް އަޅުގަނޑު ހާމަކުރަން ބޭނުންވާ މައުލޫމާތެއް، ހާމަ ކުރާނެ މައުލޫމާތެއް، އަޅުގަނޑުގެ ފަރާތުން ދެން ލިބެންޖެހޭ މައުލޫމާތެއް އޮތްކަމަށް ނުވަތަ އަޅުގަނޑު ދޭންޖެހޭނެ މައުލޫމާތެއް ނެތް ކަމަށް ދަންނަވާފައި. އޭގެ އިތުރުން އެބޭފުޅުން އަޅުގަނޑާ މެދު މައްސަލަ އޮތް ކަމަށްވާނަމަ ، އެބޭފުޅުން ކުރިއަށް ގެންދަވަން ބޭނުންވާ ގޮތަކަށް ކުރިއަށް ގެންދަން އެބޭފުޅުންގެ އަރިހުގައި، ދައުވާކުރަން ބޭނުންވާނަމަ ޕީޖީއަށް ހުށައަޅާއިގެން ކުރިއަށް ގެންދިއުމަށް އަޅުގަނޑު ދެންނެވިން،" ފާރިސް ވިދާޅުވިއެވެ.
މި މައްސަލާގައި ފާރިސް ފުލުހުންގެ އިދާރާއަށް ހާޒިރުކޮށްފައި މި ވަނީ އެނާގެ މައްސަލައެއް އެ މުއައްސަސާގައި އޮތްކަމަށް ވާނަމަ ތަޙްގީގް އަވަސްކޮށްދިނުމަށް އެދިވަޑައިގެންފައި ވަނިކޮށްށެވެ. ސަރުކާރުން ވަނީ ފާރިސްގެ ޕާސްޕޯޓް ވެސް ހިފަހައްޓާފައެވެ. އަދި ގައުމުން ބޭރަށް ފުރުމަށް ހުއްދަ ދިނުމަށް ދެކޮޅު ހަދާފައެވެ.
