ޑާރކް ރެއިން އެންޓަރޓެއިންމެންޓް ސްޓޫޑިއޯ ފަޅާލައި، ވަގަށް ނެގި ތަކެތީގެ ތެރެއިން އެކަތި ހޯދިފައިވާކަމަށް އެ ސްޓޫޑިއޯއިން ބުނެފިއެވެ.

ރާއްޖެއެމްވީއަށް މައުލޫމާތުދެއްވަމުން ޑާރކް ރެއިންގެ ވެރިޔާ މުހައްމަދު އަލީ (މޮގާ) ވިދާޅުވީ, ބުރާސްފަތި ދުވަހު އެ ސްޓޫޑިއޯ ފަޅާލައި 2 ރޮނިން އާރްއެސް2 އާއި، ސިގްމާ 50-100 އެމްއެމްގެ ލެންސެއް ވަގަށް ނަގާފައިވާކަމަށެވެ. މިތަކެއްޗަކީ 40،000އާ 50،000އާ ދެމެދުގެ އަގުހުރި ތަކެތި ކަމަށް މޮގާ ވިދާޅުވިއެވެ.

މޮގާ ވިދާޅުވީ މިތަކެތި ހޯދަން ކަމާ ބެހޭ ފަރާތްތަކަށް އަންގައި، ސޯޝަލް މީޑިއާގައި އާންމުންގެ އެހީއަށް އެދިފައިވާނެ ކަމަށެވެ. އާންމުންގެ އެހީތެރިކަމާއެކު މިތަކެތީގެ ތެރެއިން އެކަތި މިހާތަނަށް ހޯދިފައިވާކަމަށް މޮގާ ވިދާޅުވިއެވެ. ހޯދިފައިވަނީ ދެ ރޮނިންގެ ތެރެއިން ރޮނިންއެކެވެ.

ރޮނިން ހޯދުނީ ބަންގްލަދޭޝް މީހަކު އޭތި ވިއްކާލަން އުޅެނިކޮށް ކަމަށާއި، އެމީހާ ކައިރިން ކަން ވީގޮތުން ސާފުކުރިއިރު، އޭތި އޭނާއަށް ވިއްކާފައިވަނީ ވަގަށް ނެގި މީހުން ކަމަށް ބެލެވޭ ކަމަށް މޮގާ ވިދާޅުވިއެވެ. އަދި ބަންގްލަދޭޝް މީހާއަށް އޭތި ވިއްކީ 500 ރުފިޔާއަށްކަމަށް މޮގާ ވިދާޅުވިއެވެ.

މޮގާ ވިދާޅުވީ އެއް ރޮނިން ފެނުނު ނަމަވެސް އަދިވެސް އެއް ރޮނިންއާއި ލެންސު ފެނިފައިނުވެއެވެ. މިމައްސަލައާ ގުޅޭ އިތުރު އަޕްޑޭޓެއް ފުލުހުންގެ ފަރާތުން ލިބިފައިނުވާކަމަށްވެސް މޮގާ ވިދާޅުވިއެވެ.