ކުޅުދުއްފުށި ސިޓީ އެކްޓިވް ކޭހުގެ އަދަދު 300ން މަތީގައި
ކުޅުދުއްފުށި ސިޓީގެ އެކްޓިވް ކޭހުގެ އަދަދު 319ށް ވަނީ އަރާފައި
ކުޅުދުއްފުށި ސިޓީ
ކުޅުދުއްފުށި ސިޓީން އިތުރު 109 މީހުން ކޮވިޑް-19 އަށް ޕޮޒިޓިވްވެ، އެ ސިޓީގެ އެކްޓިވް ކޭހުގެ އަދަދު 319ށް އަރައިފިއެވެ.
ކުޅުދުއްފުށި ރީޖަނަލް ހޮސްޕިޓަލުން މައުލޫމާތުދޭގޮތުގައި ހުކުރުދުވަހު މިބައްޔަށް އަލަށް 109 މީހުން ވަނީ ޕޮޒިޓިވްވެފައެވެ. އެއީ ބަލީގެ އަލާމާތްތައް ހުރެގެން ފްލޫ ކުލިނިކަށް ދެއްކި 121 މީހުންނާއި، ކޮންޓެކްޓުންގެ ގޮތުގައި ފާހަގަ ވެފައިވާ 176 މީހުންގެ އިތުރުން 21 ރެންޑަމް ސާމްޕަލް އަދި 1 ޑިޕާޗާރ ސާމްޕަލެވެ. ހުކުރުދުވަހު 11 މީހުން ބަލިން ރަނގަޅުވެފައިވާ ކަމަށްވެސް އެ ހޮސްޕިޓަލުން މައުލޫމާތުދެވެ.
މީގެ ކުރިންވެސް އެކި ފަހަރުމަތިން ކުޅުދުއްފުށިން ކޮވިޑް ކޭސްތައް ފެނި މޮނިޓަރިންގެ ހާލަތަށް ގެނެސްފައިވާއިރު, މިއީ މިހާތަނަށް އެންމެ ގިނަ ކޭސް ރިޕޯޓް ކުރެވުނު ފަހަރު ކަމަށް ކުޅުދުއްފުށީ ރީޖަނަލް ހޮސްޕިޓަލުން މައުލޫމާތުދެއެވެ.
އާންމުކޮށް ހުޅުވާލައިގެން އިއްޔެ ކުޅުދުއްފުށީގައި ބޫސްޓަރ ޑޯޒް ޖަހަން ފަށާފައިވާއިރު ކުޅުދުއްފުށީގެ އާބާދީގެ 93 އިންސައްތަ މީހުން ވަނީ ވެކްސިންގެ ދެ ޑޯޒު ފުރިހަމަކޮށްފައެވެ.
މޮނިޓަރިންގައި އޮތްނަމަވެސް މިފަހަރު ވަނީ އަޅާފައިވާ ފިޔަވަޅުތަކަށް ވަރަށް ބޮޑެތި ލުއިތަކެއް ދީފައެވެ. އެގޮތުން ގޭގެ ވަކި ކޮޓަރިއެއްގައި ކަރަންޓީނު ވެވޭނެ ގޮތަށް ނިންމައި ގޭގެ ބޭރުގައި ނޯޓިސް ތަތްކުރުން ވެސް ހުއްޓާލުމަށް އެންމެ ފަހުން ބޭއްވި ޓާސްކްފޯސް ބައްދަލުވުމުގައި ވަނީ ނިންމާފައެވެ.
މީގެ އިތުރުން, ޕޮޒިޓިވްވާ މީހާއަށް ޕޮޒިޓިވްވީކަން ޕަބްލިކް ހެލްތުން އެންގި ނަމަވެސް ކޮންޓެކްޓް ޓްރޭސިން ހަދާކަށް ނުގުޅާނެއެވެ. އެމީހަކު ކަރަންޓީންވުމާއި، ކޮންޓެކްޓުންގެ މައުލޫމާތު ޕަބްލިކް ހެލްތަށް އެންގުމަކީ އެ މީހެއްގެ އަމިއްލަ ޒިންމާއެކެވެ. އަދި ކޮންޓެކްޓުން ހޮސްޕިޓަލަށް ގޮސް ޓެސްޓްކުރުމަކީވެސް އެމީހުންގެ އަމިއްލަ ޒިންމާއެކެވެ.
ލުއިތަކެއް ދީފައިވީނަމަވެސް ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށް ކައުންސިލާއި ރީޖަނަލް ހޮސްޕިޓަލުން ރައްޔިތުންނަށް އިލްތިމާސްކުރެއެެވެ.
