ތުރުކީގެ ޚާރިޖީވަޒީރު ރާއްޖެ ވަޑައިގެންފި
ރަސްމީ މަޝްވަރާތައް އޮންނާނީ އަންނަ އާދީއްތަ ދުވަހު
ތުރުކީގެ ފޮރިން މިނިސްޓަރ ރާއްޖެ ވަޑައިގަތުން
ތުރުކީގެ ޚާރިޖީވަޒީރު މެވްލުތު ޗަވްޝޯލޫ ރަސްމީ ދަތުރުފުޅެއްގައި ރާއްޖެ ވަޑައިގެންފިއެވެ.
ވެލާނާ އިންޓަނޭޝަނަލް އެއާޕޯޓުން މަރުހަބާ ވިދާޅުވީ ރާއްޖޭގެ ޚާރިޖީވަޒީރު އަބްދުﷲ ޝާހިދެވެ. މިނިސްޓަރު މެވްލުތުގެ ދެ ދުވަހުގެ މި ދަތުރުފުޅަކީ ރާއްޖޭގެ ޚާރިޖީވަޒީރު އަދި އދ.ގެ އާންމު މަޖިލީހުގެ ރައީސް އަބްދުﷲ ޝާހިދުގެ ދައުވަތަކަށް ކުރައްވާ ދަތުރުފުޅެކެވެ.
މެވްލުތު ޗަވްޝޯލޯގެ މި ދަތުރުފުޅުގައި ދެގައުމުގެ ގުޅުން އެކި ދާއިރާތަކުން ބަދަހިކުރުމަށް ފަސް އެއްބަސްވުމެއްގައި ސޮއިކުރެއްވުމަށް ވަނީ ހަމަޖެހިފައެވެ. ރާއްޖެއާއި ތުރުކީވިލާތާ ދެމެދު ބާއްވަވާ ރަސްމީ މަޝްވަރާތައް އޮންނާނީ އަންނަ އާދީއްތަ ދުވަހުކަމަށް ފޮރިން މިނިސްޓްރީން މައުލޫމާތުދެއެވެ. އަދި އެ މަޝްވަރާތަކަށްފަހު ގުޅުން ބަދަހިކުރުމަށް އެކުލަވާލާ އެއްބަސްވުން ތަކުގައި ސޮއި ކުރެއްވުން އޮންނާނެއެވެ.
މި ދަތުރުފުޅުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި ރައްޔިތުން މަޖިލީހުގެ ރައީސް މުހައްމަދު ނަޝީދުއާވެސް ބައްދަލު ކުރައްވާނެކަމަށް ފޮރިން މިނިސްޓްރީން މައުލޫމާތުދެއެވެ.
