ކޮންޓްރެކްޓްގައި ސޮއިކުރެވޭ ހިސާބުން މާލޭގައި މިނީބަސް ފެށޭނެ ތާރީޚެއް ކަނޑައެޅޭނެ: އާޒިމް
އާޒިމް ވިދާޅުވީ ބަހުގެ ޚިދުމަތް ދިނުމަށް މިމަސްތެރޭގައި ބިމެއް ހަމަޖެހިފައިވާކަމަށް
އެމްޓީސީސީގެ ސީއީއޯ އާދަމް އާޒިމް
މާލޭގައި މިނީ ބަހުގެ ޚިދުމަތް ދޭން ފެށޭނެ ވަކި ތާރީޚެއް އެކަމުގެ ކޮންޓްރެކްޓްގައި ސޮއިކުރެވޭ ހިސާބަށް ދިޔުމުން އެނގިގެންދާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ޗީފް އެގްޒެކެޓިވް އޮފިސަރ (ސީއީއޯ) އާދަމް އާޒިމް ވިދާޅުވެއްޖެއެވެ.
މާލޭގައި މިނީ ބަހުގެ ޚިދުމަތް ދިނުމުގެ ކަންކަން މިހާރު ގޮސްފައިވާ ހިސާބާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ ބަހުގެ ޚިދުމަތް ދިނުމަށް މިމަސްތެރޭގައި ބިމެއް ހަމަޖެހިފައިވާކަމަށެވެ. އެތަން ތަރައްޤީ ކުރާނެ ގޮތަކާއި މިނީ ބަސް ގެނައުމާއި ގުޅޭގޮތުން ޓްރާންސްޕޯޓް މިނިސްޓްރީ އާއެކު ވާހަކަތައް މިހާރު ދެކެވެމުންދާކަމަށް އާޒިމް ވިދާޅުވިއެވެ. އަދި މިޚިދުމަތް ތަރައްޤީކުރުމުގައި ދެ ފަރާތުގެ ޚިޔާލުތަކެއްވެސް އެބަހުރިކަމަށާއި ނަމަވެސް ބަހުގެ ޚިދުމަތް ދެމުންދާނީ ސަރުކާރުން އެކަށައަޅާ ގޮތަކަށްކަމަށް އާޒިމް ވިދާޅުވިއެވެ.
މިނީބަހުގެ ޚިދުމަތުގައި މިހާތަނަށް ވެފައިއޮތީ އެމްއޯޔޭއެއް ކަަމަށް އާޒިމް ވިދާޅުވިއެވެ.
މާލޭގައި މިނީ ބަހުގެ ޚިދުމަތް ދިނުމަށް ޓްރާންސްޕޯޓް މިނިސްޓްރީން އެމްޓީސީސީ އާއި ހަވާލުކޮށްފައި ވަނީ މާލެއަށް ދިމާވެފައިވާ ޓްރެފިކް މައްސަލައަށް ހައްލު ހޯދުމުގެ ގޮތުންނެވެ. މި ޕްރޮޖެކްޓް އެމްޓީސީސީ އާއި ހަވާލުކޮށްފައި ވަނީ 2019 ވަނަ އަހަރުގެ ފެބްރުއަރީ މަހުގައެވެ.
ދާދިފަހުން ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ޝިމާޒް އަލީ މިކަމާއި ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން ވިދާޅުވީ މިނީ ބަހުގެ ޚިދުމަތް ފެށުމަށް ބޭނުންވާ ބަޖެޓު މިހާރު ހަމަޖެހިފައިވާކަމަށެވެ. އަދި މި މަސައްކަތް ފެށުމަށް އެންމެ އެކަށޭނަ ބަހެއް ދެނެގަތުމުގެ މަސައްކަތް އެމްޓީސީސީ އާއި ހަވާލުކޮށްފައިވާއިރު، ބަސްތަކުގެ ތެރެއިން އެންމެ ރަނގަޅު ބަހެއް ކަނޑައަޅާނީ ޓްރާންސްޕޯޓް މިނިސްޓްރީން ކަމަަށެވެ.
ޝިމާޒް ވިދާޅުވީ މިކަމަށް އެންމެ އެކަށޭނަ ބަހަކީ ކޮބައިކަން ކުރިއަށް އޮތް ދެތިން މަސް ތެރޭގައި ކަނޑައެޅިގެންދާނެ ކަމަށެވެ. އަދި އެއަށްފަހު އެ ބަސްތައް ގެނެވި، މި އަހަރުގެ ތެރޭގައި މަސައްކަތް ފެށިގެންދާނެ ކަމަށެވެ.
މީގެއިތުރުން ތިމާވެއްޓާ ރައްޓެހި މިނީ ބަހާއި ޗާޖިންގ ސްޓޭޝަން ޤާއިމްކުރުމަށް އެންވަޔަރަމަންޓް މިނިސްޓްރީ އަދި ޓްރާންސްޕޯޓު މިނިސްޓްރީ އާއި ދެމެދު އެއްބަސްވުމެއްގައި މިދިޔަ އަހަރުގެ ނޮވެމްބަރު މަހުގެ 30 ވަނަ ދުވަހު ސޮއިކޮށްފައިވެއެވެ. އެއްބަސްވުމުގައި ސޮއިކުރެއްވުމަށްފަހު އެންވަޔަރަންމަންޓް މިނިސްޓަރ ޝައުނާ ވިދާޅުވީ ގްލޯބަލް އެންވަޔަރަމަންޓް ފެސިލިޓީގެ ހިލޭ އެހީގެ ދަށުން އިލެކްޓްރިކް މިނީ ދެ ބަސް ގަނެ ޗާޖިންގ ސްޓޭޝަނެއް ގާއިމްކުރާނެ ކަމަށެވެ. އެއީ 2030 ވަނަ އަހަރު އަންނަން ވާއިރަށް ނެޓްޒީރޯގެ އަމާޒަށް ވާސިލްވުމަށް ވަރަށް މުހިއްމު ކަމެއް ކަމަށް އޭނާ ވިދާޅުވި އެވެ. އެ ރަސްމިއްޔާތުގައި ޓްރާންސްޕޯޓު މިނިސްޓަރު ނަހުލާ ވިދާޅުވީ އޭނާއަށް އެންމެ ގިނަ ސުވާލު އަމާޒުވަނީ ވެސް މިނީ ބަހާ ގުޅޭގޮތުން ކަމަށެވެ. ނަމަވެސް ބަޖެޓުގެ ދަތިކަމާއި ހެދި އެކަން ވެގެން ނުދިޔައީ ކަމަށާއި އޭގެ ފެށުމެއްގެ ގޮތުން ހިލޭ ދެ ބަސް ލިބުމަކީ ވަރަށް ބޮޑު ހިތްހަމަޖެހުމެއް ކަމަށެވެ.
ފިޔަވަހިތަކަކަށް ބަހާލައިގެން ތިމާވެއްޓާއި ރައްޓެހި ބަސްތަކެއް ގެނައުމަށް ޓްރާންސްޕޯޓު މިނިސްޓްރީން ވަނީ ފިނޭންސް މިނިސްޓްރިއާއި ވެސް ބައްދަލުކޮށްފައެވެ.
މާލެއަށް މިނީ ބަސް ތައާރަފު ކުރުމަކީ މި ސަރުކާރުގެ 100 ދުވަހުގެ ވައުދުގެ ތެރޭގައި ހިމެނޭ ކަމެކެވެ. މިނިސްޓަރ ނަހުލާ ވިދާޅުވީ 100 ދުވަހުގެ ވައުދުގެ ތެރެއިން އެ މިނިސްޓްރީއަށް ނުފުއްދި އޮތީ ހަމައެކަނި މިނީ ބަސް ގެނައުމުގެ ވައުދު ކަމަށެވެ. އެކަންނުވެ އޮތް ސަބަބެއްކަމަށް ތަކުރާރުކޮށް މިނިސްޓަރު ފާހަގަކުރައްވަމުން ގެންދަވާފައިވަނީ އެކަމަށް ބޭނުންވާ ބަޖެޓް ނުލިބުމެވެ.
