ކޮވިޑާ ގުޅިގެން ކުޅުދުއްފުށި ސިޓީގައި އަޅާފައިވާ ފިޔަވަޅުތަކަށް ލުއިދީފިއެވެ.
ކުޅުދުއްފުށީގައި ގާއިމުކޮށްފައިވާ ކޮވިޑް ޓާސްކް ފޯހުގައި އަންގާރަދުވަހު ބޭއްވި ބައްދަލުވުމުގައި ނިންމާފައިވަނީ, ކުރިން, ކޮވިޑަށް ޕޮޒިޓިވްވާ މީހުންނާއި ކޮންޓެކްޓުން ކަރަންޓީންކޮށްގެން މޮނިޓަރ ކުރިކުރުން ހުއްޓާލުމަށެވެ. ގެނެވުނު ބަދަލާއެކު, މުޅި ގެ އެއްކޮށް ކަރަންޓީނު ކުރުމުގެ ބަދަލުގައި ޕޮޒިޓިވްވާ މީހުން މީގެ ފަހުން ކަރަންޓީނުވާނީ ކޮޓަރީގައެވެ.
މިއީ މާލެ ސަރަހައްދުގައިވެސް ޕޮޒިޓިވްވާ މީހުންނާމެދު އަމަލުކުރަމުން އަންނަ އުސޫލެވެ.
ކުޅުދުއްފުށީގެ އާބާދީގެ ބޮޑު ބައެއް ވެކްސިން ފުރިހަމަ ކޮށްފައިވާއިރު މިއީ ރައްޔިތުންނަށް ފަސޭހަކުރުމުގެ ގޮތުން ނިންމި ނިންމުމެކެވެ.
މި ނިންމުމާއެކު މިމަހުގެ 25 ވަނަ ދުވަހުން ފެށިގެން, ޕޮޒިޓިވްވާ މީހާއަށް ޕޮޒިޓިވްވީކަން ޕަބްލިކް ހެލްތުން އަންގާނެއެވެ. ނަމަވެސް ކޮންޓެކްޓް ޓްރޭސިން ހެދުމަކަށް ނުގުޅާނެއެވެ.
އެމީހަކު ކަރަންޓީންވުމާއި، ކޮންޓެކްޓުންގެ މައުލޫމާތު ޕަބްލިކް ހެލްތަށް އެންގުމަކީ އެ މީހެއްގެ އަމިއްލަ ޒިންމާއެކެވެ. އަދި ކޮންޓެކްޓުން ހޮސްޕިޓަލަށް ގޮސް ޓެސްޓްކުރުމަކީވެސް އެމީހުންގެ އަމިއްލަ ޒިންމާއެކެވެ.
ކަރަންޓީނުކުރާ ގެތަކުގެ ދޮރޯށީގައި ކައުންސިލް އިދާރާއިން ހަރުކުރާ "ކަރަންޓީން ކުރިކަމުގެ ނޯޓިސް" މީގެ ފަހުން ހަރެއްނުކުރާނެއެވެ.
ކޮވިޑް ޓާސްކް ފޯހުން މައުލޫމާތުދިންގޮތުގައި، އެ ވަގުތަކާ އެންމެ ގުޅޭ ފިޔަވަޅުތައް ކުޅުދުއްފުށި ސިޓީ ކޮވިޑް ޓާސްކު ފޯހުން އެޅޭތޯ އަބަދުވެސް މަސައްކަތް ކުރެއެވެ. އެގޮތުން އާންމު ދިރިއުޅުމުގެ ކަންކަމަށް ވީހާ ވެސް ބުރޫ ނާރާނެ ފަދަ ގޮތަކަށް ކަންތައްތައް ހަމަޖެއްސޭތޯ މަސައްކަތް ކުރާކަމަށާއި، މިވަގުތު ލުއިތަކެއް މި ގެންނަން ޖެހުނީ, ބަލިވެގެން އެޑްމިޓް ކޮށްގެން ފަރުވާ ދޭން ޖެހޭ މީހުންގެ ނިސްބަތް މަދުވުމާއި ބޮޑު އާބާދީއަކަށް ވެކްސިންވެސް ޖެހިފައިވުމާއެކުއެވެ.
ކުޅުދުއްފުށި ސިޓީގައި އަންގާރަދުވަހުވެސް އިތުރު 49 މީހުން ކޮވިޑް-19އަށް ޕޮޒިޓިވްވެފައިވެއެވެ. އެގޮތުން މި ވަގުތު ފަރުވާ ހޯދަމުންދާ މީހުންގެ އަދަދު 209އަށް ވަނީ އިތުރު ވެފައެވެ.
