ކުލަބު ވެލެންސިއާގެ ކޯޗުގެ މަގާމަށް ތަޖުރިބާކާރު ކޯޗު އަޙްމަދު މުޖުތަބާ (ފެސްކޯ) އަލުން ހަމަޖައްސައިފިއެވެ.
ވެލެންސިއާގެ ކޯޗުގެ މަގާމު ހުސްވެފައި އޮތީ މިދިޔަ ސީޒަނުގައި އެ ޓީމުގެ ކޯޗުކަމުގެ މަގާމުގައި ހުރި ތަޖުރިބާކާރު ކޯޗު މުޙައްމަދު އާތިފް (އާތީ) މި ސީޒަނަށް މަގާމުން ވަކިވުމާ ގުޅިގެންނެވެ. އެއާއެކު ނިމިދިޔަ ޕްރެޒިޑެންޓްސް ކަޕުގައި ވެލެންސިއާއަށް އިރުޝާދުދީފައިވަނީ އެސިސްޓެންޓް ކޯޗު އިސްމާޢީލް އާސިފް (ކުޑަހީނާ) އެވެ. އަދި ކުޑަހީނާގެ އިރުޝާދުގެ ދަށުން ވެލެންސިއާއިން ވަނީ ތަފާތު މޮޅު ކުޅުމެއް ދައްކައި، ޕްރެޒިޑެންޓްސް ކަޕް ކާމިޔާބުކޮށްފައެވެ.
އަންނަ ފެބްރުއަރީ މަހުގެ ހަވަނަ ދުވަހު ދިވެހި ޕްރިމިއާ ލީގު ފަށާއިރު، ބުދަ ދުވަހުގެ ވަގުތެއްގައި ފެސްކޯ ވަނީ ވެލެންސިއާގެ ކޯޗުގެ މަގާމާ އަލުން ހަވާލުވެފައެވެ. ވެލެންސިއާގެ ކޯޗުގެ މަގާމާ ހަވާލުވުމަށްފަހު "ރާއްޖެ.އެމްވީ" އަށް ދިން އިންޓަވިއުއެއްގައި ފެސްކޯ ބުނީ ކުޑަހީނާގެ އިރުޝާދުގެ ދަށުން ވެލެންސިއާއިން ޕްރެޒިޑެންޓްސް ކަޕް ކާމިޔާބުކުރިއިރު، އަމާޒަކީ އެ ކާމިޔާބީއަށްވުރެ ބޮޑު ކާމިޔާބީއެއް މި ސީޒަނުގައި ހޯދުން ކަމަށެވެ. އަދި ވެލެންސިއާގައި މި ވަގުތު އޮތީ ވަރުގަދަ ސްކޮޑެއް ކަމަށާއި، ކުޑަހީނާ އާއެކު ތަފާތު މަސައްކަތްތަކެއް ކުރެވޭނެ ކަމުގެ އުއްމީދު އެބައޮތް ކަމަށްވެސް ވަނީ ބުނެފައެވެ.
ވެލެންސިއާއިން ނުވަދިހައިގެ އަހަރުތަކުގެ ކުރީކޮޅު ފުޓްބޯޅަ ކެރިއަރު ފެށި ފެސްކޯ އެންމެ ފުރަތަމަ ވެލެންސިއާގެ ކޯޗުގެ މަގާމާ ހަވާލުވީ 2001 ވަނަ އަހަރުގެ ފަހުކޮޅެވެ. އަދި އެ އަހަރުގެ ޕޮމިސް ކަޕް އެ ޓީމަށް ކާމިޔާބުކޮށްދީ ބައިނަލްއަގުވާމީ މުބާރާތެއް ކާމިޔާބުކުރި މަދު ދިވެހި ކޯޗުންގެ ލިސްޓުން ފެސްކޯ ޖާގަ ހޯދިއިރު، ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާގު (ދަގަނޑޭ) އުމުރުން 16 އަހަރުގައި ފުރަތަމަ ފަހަރަށް ގަލޮޅު ދަނޑަށް ނެރުނީ އެ މުބާރާތުގައި ފެސްކޯއެވެ. އަދި އެއަށްފަހު އޭނާ ވަނީ 2002-2003 ވަނަ އަހަރުގެ ސީޒަނުގެ އޭއެފްސީ ޗެމްޕިއަންސް ލީގުގެ ކޮލިފައިންގައި ވެލެންސިއާއަށް ކޯޗުކޮށްދީފައެވެ.
އެކަމަކު ވެލެންސިއާއަށް ދެ އަހަރު ކޯޗުކޮށްދިނުމަށް ފަހު 2003 ވަނަ އަހަރު ފެސްކޯ ވަނީ އެ ޓީމުގެ ކޯޗުގެ މަގާމުން ވަކިވެފައެވެ. އޭގެ ފަހުން 2009 ވަނަ އަހަރު ގައުމީ ފުޓްބޯޅަ ޓީމުގައިވެސް މަސައްކަތްކުރި ފެސްކޯ ވަނީ އޭވައިއެލް އާއި ވިޔަންސާ އަދި ވިކްޓަރީ ސްޕޯޓްސް ކުލަބަށްވެސް އިރުޝާދުދީފައެވެ.
އޭގެ ފަހުން 2017 ވަނަ އަހަރުގެ ސީޒަނުގައި ފެސްކޯ ވެލެންސިއާއަށް އިރުޝާދުދިންއިރު، އެ އަހަރު ވެލެންސިއާ ވަނީ އޭއެފްސީ ކަޕުގެ ކޮލިފިކޭޝަނުގައި ވާދަކޮށްފައެވެ. ފެސްކޯ އާއެކު މި އަހަރުވެސް އޭއެފްސީ ކަޕް ކޮލިފިކޭޝަނުގައި ވެލެންސިއާ ވާދަކުރާނެއެވެ.
