ޑްރަގް އޮޕަރޭޝަންގެ މައުލޫމާތު، ކައުންސިލުގެ ރައީސް ލީކުކޮށްލެއްވި ކަމުގެ ހެއްކެއް ނެތް، މައްސަލަ ފައިލް
މައްސަލަ ފައިލްކޮށް އެކަން އާސިފަށް ލިއުމުން އަންގާފައިވަނީ 22 ޑިސެމްބަރު 2021ގައި
ގއ. ދާންދޫ ކައުންސިލުގެ ރައީސް މުހައްމަދު އާސިފު
ގއ. ދާންދޫގައި ފުލުހުން ހިންގަން އުޅުނު ޑްރަގް އޮޕަރޭޝަނެއްގެ މައުލޫމާތު އެރަށު ކައުންސިލުގެ ރައީސް މުހައްމަދު އާސިފު ލީކުކޮށްލި ކަމަށް ތުހުމަތު ކުރެވޭ މައްސަލާގައި ދައުވާ ކުރެވޭވަރަށް ހެކި ނެތުމުން އެ މައްސަލަ ފައިލްކޮށްފިއެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން އާސިފްގެ ވަކީލު މުހުތާޒު މުހުސިން ވިދާޅުވީ، އެ މައްސަލާގައި އާސިފް ފުލުހުންގެ ބެލުމުގެ ދަށަށް ގެންގޮސް، އޭނާގެ ބަޔާން ނަގާފައިވަނީ 2021 ވަނަ އަހަރުގެ ސެޕްޓެމްބަރު މަހުގެ ތެރޭގައި ކަމަށެވެ. އެހެންނަމަވެސް، އެ މައްސަލައިގެ ހެކި ނެތުމުން ފުލުހުން ވަނީ މައްސަލަ ފައިލްކޮށް، އެކަން ލިއުމުން އާސިފަށް އަންގާފައެވެ. އެ ލިއުމުގައި ބުނެފައިވަނީ އާސިފްގެ މައްޗަށް ތުހުމަތު ކުރެވޭ މައްސަލައިގައި ދައުވާ ކުރެވޭ މިންވަރަށް ހެކި ގަރީނާ ލިބިފައިނުވާތީ މައްސަލަ ފައިލް ކޮށްފައިވާ ކަމަށެވެ.
މައްސަލަ ފައިލްކޮށް އެކަން އާސިފަށް ލިއުމުން އަންގާފައިވަނީ 22 ޑިސެމްބަރު 2021ގައެވެ.
ވަކީލު ވިދާޅުވާ ގޮތުގައި މި މައްސަލައިގައި އޭނާގެ ފޯނު ފުލުހުންގެ ބެލުމުގެ ދަށަށް ގެންދިޔަ ނަމަވެސް ފޯނުން އެ ތުހުމަތުތަކަށް ބާރުދޭ ހެތްކެއް ފެނިފައެއް ނުވެއެވެ. އެގޮތުން މި މައްސަލައާ ގުޅިގެން އޭނާގެ ފޯނު ގެންދިޔައީ ޑްރަގް އޮޕަރޭޝަނާގުޅޭ ވާހަކަތަކެއް މެސެންޖަރ އެޕްލިކޭޝަން މެދުވެރިކޮށް ދައްކަވާފައިވާކަމަށް ފުލުހުންގެ އިންޓެލިޖެންސްއަށް ލިބުނު މައުލޫމާތަކާ ގުޅިގެންނެވެ.
ވަކީލު އިތުރަށް ވިދާޅުވީ، ރައްޔިތުން އިންތިޚާބު ކޮށްފައިވާ މަގާމުތަކުގައި ތިއްބަވާ ބޭފުޅުންނަށް ކުރެވޭ ބޮޑެތި ތުހުމަތުތަކާއި ގުޅިގެން އެފަދަ އާދައިގެ ގޮތަކަށް ފުލުހުން އަމަލު ކޮށްފައިވާތީ ކަންބޮޑުވުން ފާޅު ކުރައްވާފައެވެ. އެގޮތުން އެ ތުހުމަތުތައް ފުލުހުން އެކަށީގެންވާ ގޮތެއްގައި ސާފުކޮށްދީފައިވެސް ނުވާކަމަށް މުހުތާޒް ވިދާޅުވިއެވެ.
