މޮނިޓަރިންގ ގަ އޮތް ކުޅުދުއްފުށީގެ އެކްޓިވް ކޭސްތަކުގެ އަދަދު މައްޗަށް

މޮނިޓަރިންގ ގެ ހާލަތުގައި އޮތް ކުޅުދުއްފުށި ސިޓީގެ އެކްޓިވް ކޭސްތައް ހުއްޓުމެއްނެތި މައްޗަށް އުފުލިއްޖެ އެވެ.

ކުޅުދުއްފުށީ ރީޖަނަލް ހޮސްޕިޓަލުން މައުލޫމާތު ދިން ގޮތުގައި މިވަގުތު ކުޅުދުއްފުށީ ސިޓިގެ ކޮވިޑް އެކްޓިވް ކޭހުގެ އަދަދަކީ 201 އެވެ. ކުޅުދުއްފުށިން ހޯމަ ދުވަހު ކޮވިޑަށް އަލަށް ޕޮޒިޓިވްވީ 30 މީހުންނެވެ. އޭގެ ތެރޭގައި ހިމެނެނީ ކޮންޓެކްޓުންގެ ގޮތުގައި ނެގި 27 ސާމްޕަލަކާއި އަލާމާތް ހުރެގެން ނެގި 2 ސާމްޕަލެއްގެ އިތުރުން ރެންޑަމް ސާމްޕަލެކެވެ. އަދި ހޯމަ ދުވަހު 22 މީހަކު ބަލިން ރަނގަޅުވެފައިވެ އެވެ.

Advertisement

ކުޅުދުއްފުށި ސިޓީގައި، ކޮވިޑް ކޭސްތައް އިތުރުވަމުންދާތީ އެސިޓީ މޮނިޓަރިންގެ ހާލަތައް ގެނެސް، އަރައި ފޭބުން ހެލްތް ޕްރޮޓެކްޝަން އެޖެންސީން މަނާކޮށްފައިވަނީ މިދިޔަ ހޮނިހިރު ދުވަހުއެވެ.

މޮނިޓަރިންގއަށް ލުމުން ކުޅުދުއްފުށީގައި އަޅާފައިވާ ފިޔަވަޅުތައް ވަނީ ވަރުގަދަކޮށްފަ އެވެ. ޒަރޫރީ ބޭނުންތަކަށް ފިޔަވާ ގެއިން ބޭރަށް ނުނިކުތުމަށާއި އެއް ގެއިން އަނެއް ގެއަށް ޒިޔާރާތް ނުކުރުމަށް ކައުންސިލުންވަނީ އިލްތިމާސްކޮށްފައެވެ. އަދި އާންމު މައިދާންތަކާއި ޕާކުތަކަށް އެއްވެއުޅުން ހުއްޓާލުމަށާއި އެއްފަހަރާ 3 މީހުންނަށް ވުރެ ގިނަ މީހުން މަގުމައްޗަށާއި އާންމު ތަންތަނަށް އެއްވެ އުޅުން ހުއްޓާލުމަށްވެސް ސިޓީ ކައުންސިލުން ވަނީ އެދިފައިވެއެވެ.

މީގެ އިތުރުން ކޮމިއުނިޓީ ޖިމާއި ބެޑްމިންޓަން ކޯޓު ބަންދުކޮށް ހުރިހާ ކުޅިވަރު ހަރަކާތްތަކާއި ގިނަ މީހުން ބައިވެރިވެގެން ކުރިއަށް ގެންދާ ކަސްރަތު ހަރަކާތްތައް ހުއްޓާލުމުގެ އިތުރުން ފިހާރަތަކުން ހިދުމަތް ލިބިގަންނައިރު އެޗްޕީއޭއިން އާންމުކޮށްފައިވާ ގައިޑްލައިނަށް ސަމާލުވުމަށްވެސް އެދިފައިވެ އެވެ.

ކުޅުދުއްފުށީ ސިޓީ މޮނިޓަރިންގ އަށް ލުމާގުޅިގެން އެސިޓީގެ ހުރިހާ ސްކޫލްތަކެއްގައިވެސް ކިޔަވައިދެނީ ގްރޭޑް 7 ފެށިގެން މަތީގެ ދަރިވަރުންނަށެވެ.

ކުޅުދުއްފުށީ ސިޓީގެ އިތުރުން ހދ އަތޮޅުގެ ގިނަ ރަށްތަކެއްގައި ކޮވިޑް ފެތުރެމުންދާއިރު އެ އަތޮޅުގެ 8 ރަށަކުން ވަނީ ބަލި ފެނިފަ އެވެ.