ގޮނޑުދޮށުން ވެއްޔާއި، އަކިރި ނަގާފަރާތްތައް ޖޫރިމަނާ ކުރަނީ
25 ޖެނުއަރީ 2022 | އަންގާރަ 05:00ފުރަތަމަ ފަހަރު ނަސޭހަތް ދިނުމަށްފަހު ކުށް ތަކުރާރު ކުރާ އަދަދަށް ބަލައި 500 ރުފިޔާ އާއި 5000 ރުފިޔާ އާއި ދެމެދު އަދަދަކުން ޖޫރުމަނާ ކުރެވޭނެކަމަށް ކައުސިލުން ބުނޭ
ކުލުދުއްފުށީ ސިޓީ އާޓިފިޝިއަލް ބީޗް ސަރަހައްދު
ކުޅުދުއްފުށި ސިޓީގެ ގޮނޑުދޮށުން ވެއްޔާއި، އަކިރި ނަގާފަރާތްތައް ޖޫރިމަނާ ކުރާނެކަމަށް ކައުންސިލުން ބުނެފިއެވެ.
ކުޅުދުއްފުށި ސިޓީ ކައުންސިލުން ބުނީ މިހާރަކަށް އައިސް ގިނަ ފަރާތްތަކުން އެސިޓީގެ ގޮނޑުދޮށުން ވެއްޔާއި، އަކިރި ނަގާކަން ފާހަގަ ކުރެވިފައިވާކަމަށެވެ. އަދި ޤަވައިދާ ޚިލާފަށް ގޮނޑުދޮށުން ވެއްޔާއި، އަކިރި ނަގާ ފަރާތްތައް ތިމާވެށި ހިމާޔަތް ކުރުމާބެހޭ ޤަވާއިދު ގެ 15 މާއްދާގެ (ހ) ދަށުން، ފުރަތަމަ ފަހަރު ނަސޭހަތް ދިނުމަށްފަހު ކުށް ތަކުރާރުކުރާ އަދަދަށް ބަލައި -/500 ރުފިޔާ އާއި -/5000 ރުފިޔާ ދެމެދު އަދަދަކުން ޖޫރިމަނާ ކުރެވޭނެކަމަށެވެ.
ގޮނޑުދޮށުން ވެއްޔާއި، އަކިރި ނެގުމަކީ ރަށް ގިރުމަށް މެދުވެރިވެ ރަށަށް މިކަމުގެ ނޭދެވޭ އަސަރުކުރާނެ ކަމެއް ކަމުން މިފަދަ ޢަމަލުތައް ހުއްޓާލުމަށް އެންމެހާ ރައްޔިތުންނަށް ކައުންސިލުން ވަނީ ނަސޭހަތްތެރިވެފައެވެ.
މީގެ ކުރިންވެސް ވަނީ މިފަދަ އަމަލުތައް ކުރާމީހުންގެ މައްސަލަ ކޯޓަށް ހުށަހަޅައިގެން ޝަރީއަތްކޮށް ޖޫރިމަނާކޮށްފައެވެ.
