އަންނަ މާރޗް މަހު ޕްރައިމަރީ ހެލްތް ކެއަރ އިފްތިތާހުކުރެވޭނެ: މިނިސްޓަރ
ރާއްޖޭގައި މީގެ ކުރިން ޕްރައިމަރީ ހެލްތް ކެއަރ ކުރިއަށް ގެންގޮސްފައިވޭ
ހެލްތް މިނިސްޓަރ އަހުމަދު ނަސީމް
އަންނަ މާރޗް މަސް ނިމުމުގެ ކުރިން ރާއްޖޭގައި ޕްރައިމަރީ ހެލްތް ކެއަރ އިފްތިތާހުކުރައްވާނެ ކަމަށް ހެލްތް މިނިސްޓަރ އަހުމަދު ނަސީމް ވިދާޅުވެއްޖެއެވެ.
މިނިސްޓަރ ނަސީމް މިފަދައިން ވިދާޅުވީ ކޮމަންޑޫގެ ބައި އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓްގެ ކެމްޕެއިންގައި ށ. މަރޮށީގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. މިނިސްޓަރ ނަސީމް ވިދާޅުވީ ރާއްޖޭގެ ސިއްހީ ނިޒާމުގެ ކަންކަން މިހާރު ބައްޓަންވަމުން އަންނަނީ ވަރަށް ރަނގަޅަށް ކަމަށެވެ. އަދި މިއަހަރުގެ ތެރޭގައި ރާއްޖޭގެ ސިއްހީ ނިޒާމަށް ވަރަށް ބޮޑު އިންގިލާބެއް އަންނާނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.
މިގޮތުން މާރޗް މަސް ނިމުމުގެ ކުރިން ރާއްޖޭގައި ޕްރައިމަރީ ހެލްތް ކެއަރ އިފްތިތާހުކުރައްވާނެ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ޕްރައިމަރީ ހެލްތް ކެއަރ މީގެ ކުރިން ރާއްޖޭގައި ވަރަށް ރަނގަޅަށް ކުރިއަށް ގެންގޮސްފައިވާކަމަށެވެ. އެހެންނަމަަވެސް 2004 ވަނަ އަހަރު މިކަމުން ކުޑަކޮށް އެކަހެރި ވެވިފައިވާކަމަށާއި، އެއީ ވަރަށް ދެރަކޮށް ކުރެވުނު ކަމެއް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖޭގައި ޕްރައިމަރީ ހެލްތް ކެއަރ ކުރިއަށްގެންދިޔައިރު ރާއްޖޭގައި ތިބި ޑޮކްޓަރުން ވަރަށް މަދު ކަމަށެވެ. އެހެންނަމަވެސް ހެލްތް ކެއަރ ވޯކަރުން ވަނީ މިކަން ވަރަށް ފުރިހަމައަށް ބަލަހައްޓާ، ކުރިއަށްގެންގޮސްފައިކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޕްރައިމަރީ ހެލްތް ކެއަރއާއެކު މީހުންނަށް ބަލިތައް ޖެހޭ މިންވަރު މަދުކުރެވޭނެ ކަމަށެވެ. އެމީހެއްގައި ކިބައިގައި ހުރީ ކޮން ބައްޔެއްކަން މާ ކުރިން ދެނެގަނެވިގެންދާކަމަށާއި، ދުޅަހެޔޮ ސިއްހަތެއް ގާއިމްކުރެވޭނީ ޕްރައިމަރީ ހެލްތް ކެއަރގެ ތެރެއިން ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޕްރައިމަރީ ހެލްތް ކެއަރ ފެށުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަރަށް ޚާއްސަ އިސްކަމެއް ދެއްވާފައިވާ ކަމެއް ކަމަށެވެ.
މިނިސްޓަރ މިފަދައިން ވިދާޅުވެފައިވާއިރު، ޕްރައިމަރީ ހެލްތް ކެއަރ ފެށުމަށް ޕައިލެޓް ޕްރޮގްރާމެއްވެސް ވަނީ ކުރިއަށްގެންގޮސްފައެވެ. އަދި ޕްރައިމަރީ ހެލްތް ކެއަރ ކުރިއެރުވުމަށް ކިއުބާ ސަރުކާރާއެކު ވަނީ އެއްބަސްވުމެއްގައިވެސް ސޮއިކޮށްފައެވެ.
ޕްރައިމަރީ ހެލްތް ކެއަރއާ ގުޅޭގޮތުން މީގެ ކުރިން ރާއްޖެޓީވީއަށް ދެއްވި އިންޓަރވިއުއެއްގައި މިނިސްޓަރ ނަސީމް ވިދާޅުވީ ދިވެހިރާއްޖޭގެ ސިއްހީ ނިޒާމު އަލަށް ބައްޓަން ކުރެވުނު ޒަމާނުގައި، އެންމެ ބޮޑު އިސްކަމެއް ދެވުނީ ޕްރައިމަރީ ހެލްތުކެއަރ މެދުވެރިކޮށް ރައްޔިތުންނާ ގާތުން ސިއްހީ ޚިދުމަތް ފޯރުކޮށްދިނުމަށެވެ. ނަމަވެސް، ދިވެހި ރައްޔިތުންގެ ދިރިއުޅުމުގެ ވައްޓަފާޅިއަށް އައި ބަދަލުތަކާއި، ދުނިޔޭގެ ސިއްހީ އޮނިގަނޑަށް އައި ބަދަލުތަކާއި ލިބުނު ކުރިއެރުންތަކާއި، ކެއުން ބުއިމުގެ އާދަކާދަތައް ބަދަލުވުމާއި، ދިވެހި ރައްޔިތުންގެ ‘އެކްސްޕެކްޓޭޝަންސް’ ބަދަލުވުމާއި، އަދި އެހެނިހެން ކަންކަމާ ގުޅިގެން، ރާއްޖޭގެ ސިއްހީ ނިޒާމުގެ ފޯކަސް ބަދަލުވީ ކިއުރެޓިވް ކެއަރ ނުވަތަ ބަލިވުމަށްފަހު ބޭސްފަރުވާ ހޯދުމުގެ ގޮތުން، ސްޕެޝަލިސްޓް ކެއަރ ކުރިއެރުވުމުގެ ސިސްޓަމަކަށް ކަމަށް މިނިސްޓަރ ވިދާޅުވިއެވެ. އެގޮތުން، ރާއްޖޭގެ އެކި ކަންކޮޅުތަކުގައި ހޮސްޕިޓަލްތަކާއި ޒަމާނީ ހެލްތު ސެންޓަރުތައް ގާއިމު ކުރުމުގެ މަސައްކަތްތައް ވަނީ ކުރެވިފައެވެ.
