ކުޅުދުއްފުށި ސިޓީގައި ކޮވިޑް ކޭސްތައް އިތުރުވަމުން އަންނާތީ، ރައްކާތެރިކަމުގެ ފިޔަވަޅުތަކަށް އިތުރަށް ސަމާލުކަން ދިނުމަށް ސިޓީ ކައުންސިލުން އިލްތިމާސް ކޮށްފިއެވެ،
ހަލުވިކަމާއެކު ކޮވިޑް ކޭސްތައް އިތުރުވަމުންދާތީ އިތުރަށް ހާލަތު ގޯސްވިޔަ ނުދިނުމަށް ހޮނިހިރު ދުވަހު އެސިޓީ ވަނީ މޮނިޓަރިންގެ ހާލަތަށް ގެނެސްފައެވެ. އެގޮތުން ހޮނިހިރު ދުވަހު އެކަނިވެސް 24 މީހުން ޕޮޒިޓިވްވެފައިވާކަމަށް ރީޖަނަލް ހޮސްޕިޓަލުން ބުނެއެވެ. ހޮނިހިރު ދުވަހު ޕޮޒިޓިވްވެފައިވަނީ ބަލީގެ އަލާމާތްތައް ހުރެގެން ފްލޫ ކްލިނިކަށް ދެއްކި 5 މީހަކާއި، ކޮންޓެކްޓް ޓްރޭސިންގގެ ގޮތުގައި ފާހަގަކުރެވުނު 17 މީހެއްގެ އިތުރުން 2 ރެންޑަމް ސާމްޕަލްއެވެ. އެ ސިޓީގައި މިވަގުތު ހުރި އެކްޓިވް ކޭސްތަކުގެ އަދަދަކީ 181 އެވެ. އަދި ހޮނިހިރު ދުވަހު 22 މީހަކު ބަލިން ރަނގަޅުވެފައި ވާކަމަށްވެސް ހޮސްޕިޓަލުން ވިދާޅުވިއެވެ.
ކޮވިޑް ފެތުރުން ކޮންޓްރޯލް ކުރުމަށް ރައްކާތެރިކަމުގެ ފިޔަވަޅުތަކަށް ސަމާލުކަން ދިނުމަށް ކައުންސިލުން މިއަދު އާންމުކުރި އިއުލާނުގައިވަނީ، މި ހާލަތުގައި ޒަރޫރީ ބޭނުންތަކަށް ފިޔަވާ ގެއިން ބޭރަށް ނުނިކުތުމަށާއި އެއްގެއިން އަނެއްގެއަށް ޒިޔާރަތްކުރުން ހުއްޓާލުމަށް އެދިފައެވެ.
އަދި އާންމު މައިދާންތަކާއި ޕާކުތަކަށް އެއްވެއުޅުން ހުއްޓާލުމަށާއި އެއްފަހަރާ 3 މީހުންނަށް ވުރެ ގިނަމީހުން މަގުމައްޗަށާއި އާންމުތަންތަނަށް އެއްވެ އުޅުން ހުއްޓާލުމަށްވެސް އެދިފައިވެއެވެ.
މީގެ އިތުރުން ކޮމިއުނިޓީ ޖިމާއި، ބެޑްމިންޓަން ކޯޓު ބަންދުކުރެވިފައިވާތީ އެތަންތަން ބޭނުންކުުރުން ހުއްޓާލުމަށާއި، ހުރިހާ ކުޅިވަރު ހަރަކާތްތަކާއި ގިނަ މީހުން ބައިވެރިވެގެން ކުރިއަށް ގެންދާ ކަސްރަތު ހަރަކާތްތައް ހުއްޓާލުމުގެ އިތުރުން، ފިހާރަތަކުން ޚިދުމަތް ލިބިގަންނައިރު އެޗްޕީއޭއިން އާންމުކޮށްފައިވާ ގައިޑްލައިނަށް ސަމާލުވުމަށްވެސް ކައުންސިލުން އިލްތިމާސްކޮށްފައިވެއެވެ.
