ކްރިމިނަލް ކޯޓުގައި ބައެއް މައްސަލަތައް ތާވަލުނުކުރާތާ ގިނަ ދުވަސްތަކެއް ވެފައިވާއިރު، އެކަމަކީ ކަންބޮޑުވެވަޑައިގަންނަވާ ކަމެއް ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ހޮނިހިރު ދުވަހު ރާއްޖެއެމްވީއާ ވާހަކަ ދައްކަވަމުން ޝަމީމް ވިދާޅުވީ، ދައުވާ އުފުލައި ކޯޓަށް ހުށައަޅާފައިވާ މައްސަލަތައް ތާވަލު ނުކުރެވި ގިނަ ދުވަސްތަކެއް ވެގެން ދިއުމަކީ ކަންބޮޑުވެވަޑައިގަންނަވާކަމެއް ކަމަށެވެ. އެގޮތުން ޖިނާއީ އިޖުރާއާތުގެ ގާނޫނުގެ 116 ވަނަ މާއްދާގައި ބަޔާންކޮށްފައިވާ ގޮތަށް މައްސަލަތައް ޝެޑިއުލް ކުރެވެމުން ނުދިއުމަކީ ނުހަނު ބޮޑު ކަންބޮޑުވުމެއްގެ ގޮތުގައި ޝަމީމް ސިފަ ކުރެއްވިއެވެ. ވަކިން ޚާއްސަކޮށް ރައްޔިތުންގެ މަސްލަހަތު މަތީ މިންވަރަކަށް ހިމެނޭ މައްސަލަތައް ތާވަލު ނުކުރެވި ގިނަ ދުވަސްތައް ވެގެންދާ ދިއުން ޝަމީމް މިސާލެއްގެ ގޮތުން ފާހަގަ ކުރެއްވިއެވެ.
ޖިނާއީ އިޖުރާއަތުގެ ގާނޫނުގެ 116 ވަނަ މާއްދާގައި ބަޔާންކޮށްފައިވަނީ; ދައުވާ ލިބޭ ފަރާތުގެ މައްޗަށް ހުށަހެޅިފައިވާ ދައުވާއައިގެން ކުރިއަށްދާނެ ތަނެއް އޮތް ކަމަށް ފަނޑިޔާރު ނިންމަވައިފިނަމަ، އެ ގާނޫނުގެ ސާދަވަނަ ބާބުގައިވާ ގޮތުގެމަތިން ޝަރީއަތް ފެށުމުގެ ކުރިން ހުށަހަޅަން ބޭނުންވާ ހުށަހެޅުންތައް ހުށަހެޅުމަށް މުއްދަތެއް ކަނޑައަޅައި، އެ މުއްދަތުން އުނިނުވާ ގޮތަށް، މައްސަލައިގެ ޝަރީއަތުގެ އަޑުއެހުންތައް ބާއްވާނެ ދުވަސްތައް، ދައުލަތާއި ދައުވާ ލިބޭ ފަރާތާ މަޝްވަރާކުރުމަށްފަހު، ކޯޓުން ކަނޑައަޅައި ތާވަލު ކުރަންވާނެ ކަމަށެވެ.
ގާނޫނުގައި އެހެން ބަޔާންކޮށްފައި އޮތް ނަމަވެސް، މިހާރުވެސް ގިނަ ދުވަސްވީ އެތައް މައްސަލައެއް ކޯޓުގައި ފުނި ޖެހިފައިވެއެވެ. އޭގެ ތެރޭގައި ރައްޔިތުންގެ ކަންބޮޑުވުން ގުޅިފައިވާ ބޮޑެތި މައްސަލަތައްވެސް ހިމެނެއެވެ. މިސާލެއްގެ ގޮތުން ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރ އައިޝަތު އާޒިމާ ޝަކޫރުގެ މައްޗަށް އުފުލާފައިވާ މަނީ ލޯންޑަރ ކުރުމާ ގުޅޭ ދެ ދައުވާގެ އަޑުއެހުން ކްރިމިނަލް ކޯޓުގައި ކުރިއަށް ނުގެންދާތާ ގިނަ ދުވަސްތަކެއް މިވަނީ ވެފައެވެ. މި މައްސަލާގައި އެންމެ ފަހުން އަޑުއެހުމެއް ބާއްވާފައިވަނީ މީގެ ދޮޅުއަހަރު ކުރިންނެވެ. އެގޮތުން އިބްތިދާއީ އަޑުއެހުންތަކެއް ބޭއްވުމަށްފަހު، މި މައްސަލަ އިތުރަށް ކުރިއަށް ގެންގޮސްފައެއް ނުވެއެވެ.
މި މައްސަލާގައި އެންމެ ފަހުން އަޑުއެހުމެއް ބާއްވާފައިވަނީ މީގެ ދޮޅުއަހަރު ކުރިންނެވެ. އެގޮތުން އިބްތިދާއީ އަޑުއެހުންތަކެއް ބޭއްވުމަށްފަހު، މި މައްސަލަ އިތުރަށް ކުރިއަށް ގެންގޮސްފައެއް ނުވެއެވެ.
އޭގެ އިތުރުން، ޓެކްސީ ޑްރައިވަރ ގާސިމް ހަސަންގެ މަރުގެ މައްސަލަވެސް ކޯޓުގައި ކުރިއަށް ނުދާތާ ގިނަ ދުވަސްތަކެއް މިވަނީ ވެފައެވެ. އެ މައްސަލާގައިވެސް އެންމެ ފަހުން އަޑުއެހުމެއް ބާއްވާފައިވަނީ ނިމިދިޔަ އަހަރުގެ ކުރީކޮޅުއެވެ. މަރުގެ މިފަދަ ބޮޑެތި މައްސަލަތަކުގެ ޝަރީއަތްތައް ދިގުލައިގެން ދިއުމަކީ ރައްޔިތުން އެކަމުގެ ކަންބޮޑުވުން އިންތިހާއަށް ފާޅުކުރާ ކަންކަމެވެ.
