ރައީސް އޮފީސް ގޮއްވާލާނެކަމަށް ބުނި މީހަކު ހައްޔަރުކޮށްފި
ހައްޔަރުކޮށްފައިވަނީ އުމުރުން 34 އަހަރުގެ ދިވެހި ފިރިހެނެއް
ރައީސުލްޖުމްހޫރިއްޔާގެ އޮފީސް
ރައީސް އޮފީހުގެ ސެކިއުރޓީ ބަލަހައްޓަން ތިބި އެމްއެންޑީއެފް މީހުންނަށް އިންޒާރުދިން މީހަކު ހައްޔަރުކޮށްފިއެވެ.
ރައީސް އޮފީހުގެ އެތެރެއިން އެއްވެސް މީހަކު ބޭރަށް ނުނިކުތުމަށާއި ނުކުމެއްޖެ ނަމަ ރައީސް އޮފީސް ގޮއްވާލާނެ ކަމަށް ބުނެ އިންޒާރު ދިނީ، ޖެނުއަރީ 19 ވަނަ ދުވަހުއެވެ. މި މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައިވަނީ 34 އަހަރުގެ ދިވެހި ފިރިހެނެކެވެ. އޭނާ ހައްޔަރުކޮށްފައިވަނީ 20 ޖެނުއަރީވީ ބުރާސްފަތި ދުވަހުއެވެ.
އެމީހާގެ ބަންދާއިމެދު ގޮތެއް ނިންމުމަށް ހުޅުމާލޭ ކޯޓަށް ހާޒިރުކުރުމުން މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް ހަތް ދުވަހުގެ މުއްދަތެއް ވަނީ ދީފައެވެ. މި މައްސަލައާ ގުޅިގެން އިތުރަށް ބަލަންޖެހޭ ކަންތައްތައް ފުލުހުން އަންނަނީ ތަހުގީގު ކުރަމުންނެވެ.
މީގެ ކުރިންވެސް ސަރުކާރުގެ ބައެއް އިދާރާތަށް ގޮށްވާލާނެކަމަށް ބުނެ އިންޒާރުދިނުމާއެކު އެމީހުން ވަނީ ހައްޔަރުކޮށްފައެވެ.
