މޭރީގެ މަރު: ލަމްހާގެ ފަރާތުން މާވިންއަށް ކޮށްފައިވާ މެސެޖެއްގައި އަންހެނެއްގެ ގަޔަށް ސިރިންޖު ޖަހާނެ ގޮތުގެ ވާހަކަތަކެއް!
20 ޖެނުއަރީ 2022 | ބުރާސްފަތި 08:31މާވިން ވަނީ ކުރިއަށްދާން ބޭނުންވަނީ ވަކީލަކާއެކުކަމަށް ބުނެފައި
މޭރީގެ މަރުގެ މައްސަލައިގައި ދައުލަތުން ދައުވާކުރަނީ މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސްއާއި ޅ.ހިންނަވަރު، މާފިނި، ހަލީމަތު ލަމްޙާ އަބްދުއްރަހްމާނުގެ މައްޗަށް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުލަތުންދައުވާކުރަނީމޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސްއާއި ޅ.ހިންނަވަރު، މާފިނި، ހަލީމަތު ލަމްޙާ އަބްދުއްރަހްމާނުގެ މައްޗަށެވެ. އެގޮތުން ބުރާސްފަތި ދުވަހުގެ ހެނދުނު ކުރިއަށް ދިޔަ އަޑުއެހުމުގައި ވަނީ ދައުވާ ލިބޭމާވިންގެމައްސަލަ ވަކިން ކުރިއަށް ގެންގޮސްފައެވެ. އަދި މާވިންއަށް ވަކީލަކު އައްޔަނު ކުރުމަށް 10 ދުވަހުގެ މުއްދަތެއް ދީ، އޭނާ 30 ދުވަހަށް ބަންދު ކުރުމަށް ނިންމައި އެ އަޑުއެހުން ވަނީ ނިންމާލާފައެވެ.
އެއަށްފަހު ލަމްހާގެ މައްޗަށް ކުރާ ދައުވާގެ އަޑުއެހުން ކުރިއަށް ގެންގޮސްފައިވާއިރު، ލަމްހާ ހާޒިރުވެފައިވަނީ އޭނާގެ ވަކީލާއެކުއެވެ. ވަކީލު ވަނީ ލަމްހާގެ މައްސަލައިގެ ބައެއް ލިޔެކިޔުންތައް ލިބިފައިނުވާކަމަށް ވިދާޅުވެފައެވެ.
އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، ދައުވާ ފޯމު އަލުން އިސްލާޙުކޮށް ކޯޓަށް ހުށައަޅާފައިވާނެ ކަމަށާއި، އިތުރު ލިއުންތައް ހިމަނާފައިވާނެ ކަމަށެވެ. އަދި ދިފާއުން ފާހަގަކުރި އޯޑިއޯ ވީޑިއޯ ޑޮކިއުމަންޓް އަންނަ ހަފްތާގައި ލިބުމުން ހިއްސާ ކޮށްދެއްވާނެ ކަމަށާއި، ބައެއް އިތުރު ހެކިތައް ރައްކާތެރި ކުރުމަށް އެދިފައިވާނެ ކަމަށެވެ.
މި މައްސަލައިގެ ދައުވާ ކޯޓަށް ހުށައެޅި ފަހުން ދައުވާ ފޯމަށް އިސްލާޙުތަކެއް ގެނައީ އިތުރު ހެކިތަކެއް ހިމެނުމަށްކަމަށް ދައުލަތުގެ ވަކީލާ ވިދާޅުވިއެވެ. އެގޮތުން 3 ދައުވާއަށްވެސް އައު ހެކިތަކެއް ވަނީ ހުށައަޅާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ. ގާޒީ ވަނީ ދިފާއުން މަދުވާ ލިޔެކިޔުންތައް ބެލުމަށްފަހު ކޯޓު މެދުވެރިކޮށް ހޯދުމުގެ ފުރުސަތު އޮތް ކަމަށް ވިދާޅުވެފައެވެ. އަދި ދައުލަތުން އެދިފައިވާ ގޮތަށް ބައެއް ހެކިތައް ސިއްރު ކުރުމުގެ ވަގުތީ އަމުރެއް ނެރެދެއްވުމަށްވެސް ގާޒީ ނިންމެވިއެވެ. ދެން މި މައްސަލައިގެ އަޑުއެހުމެއް އޮންނާނީ ދިފާއުއަށް ލިޔެކިޔުންތައް ލިބުމުންކަމަށް ގާޒީ ވިދާޅުވިއެވެ.
އެއަށްފަހު ބަންދު މުރާޖައާ ބައި ކުރިއަށް ގެންގޮސްފައިވާއިރު، ދައުލަތުން ވަނީ ލަމްހާ ޝަރީއަތް ނިމެންދެން ބަންދު ކުރުމަށް އެދިފައެވެ.
މިމައްސަލައިގަ ދިފާއީ ވަކީލު ވަނީ މީހެއްގެ ފިރިއަކާ ރައްޓެހިވެގެން އުޅޭނަމަ އެމީހެއްގެ އަނބިމީހާއާ ޒުވާބު ކުރުމަކީ މުޖުތަމައުގައި އާންމު ކަމެއް ކަމަށާއި ލަމްހާއާއި މޭރީއާ ދެމެދުވެސް ހިނގާފައިވަނީ އެފަދަ ދެބަސްވުންތަކެއްކަން ވިދާޅުވެފައެވެ.
ނަމަވެސް ދައުލަތުގެ ވަކީލާ ވިދާޅުވީ، ލަމްހާގެ ފަރާތުން މާވިންއަށް ކޮށްފައިވާ މެސެޖެއްގައި އަންހެނެއްގެ ގަޔަށް ސިރިންޖު ޖަހާނެ ގޮތުގެ ވާހަކައާ ގުޅޭ މެސެޖުތަކެއް ކޮށްފައިވާ ކަމަށާއި، އޭގެ ފަހުން މާވިން ގޫގަލް ސާރޗު މެދުވެރިކޮށް އެފަދައިން މީހަކު މަރާނެ ގޮތް ސާރޗު ކޮށްފައިވާ ކަމަށެވެ. އަދި އޭގެ އިރުކޮޅެއް ފަހުން އެމީހުންގެ ދަރިފުޅު ލަމްހާއާ ޙަވާލުކޮށް، މޭރީ މަރާލުމުގެ އަމަލު ހިންގާފައިވާކަމަށް ވަކީލާ ވިދާޅުވިއެވެ. ލަމްހާގެ ގެއިން ބޭނުންކޮށްފައިވާ ބައެއް ސިރިންޖު ތަކަކީ ބޭނުންކޮށްފައިވާ ސިރިންޖުތަކެއް ކަމަށާއި، އޭގެ ތަހުލީލު ކުރުމަށް ބޭރަށް ފޮނުވާފައިވާނެ ކަމަށްވެސް ވަކީލާ ވިދާޅުވިއެވެ.
މި އަޑުއެހުމުގައި ލަމްހާ ވަނީ އެއްވެސް އެއްޗެއް ބުނަން ބޭނުން ނުވާކަމަށް ބުނެފައެވެ.
ބަންދު މުރާޖައާއާ ގުޅޭގޮތުން ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ނިންމެވީ މިވަގުތަށް ލަމްހާ 30 ދުވަހަށް ބަންދު ކުރުމަށެވެ.
ޙަލީމަތު ލަމްޙާ ޢަބްދުއްރަޙްމާނުގެ މައްޗަށް އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވާއިރު، ލަމްހާގެ މައްޗަށް ވަނީ އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރުހިންގުމުގެ ކުށުގެ ދަޢުވާވެސް އުފުލާފައެވެ. އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދަައުވާވެސް އުފުލާފައިވާއިރު، ލަމްޙާ ޢަބްދުއްރަޙްމާނު ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލާ ފާސްކުރިއިރު، ލަމްޙާ ދިރިއުޅޭ ކޮޓަރި ތެރެއިން، ހޮސްޕިޓަލް އަދި ފަރުވާ ދޭ މަރުކަޒުތަކުގެ ބޭނުމަށް އެކަނި ދޫކުރެވޭ ބާވަތުގެ ބޭސްތަކެއް ފެނިފައިވެއެވެ.
