ހިޔާ ފްލެޓްގެ ފިނިޝިންގއަށް ފައިސާ ނަގައި، މަސައްކަތް ނުނިންމާ މައްސަލަތައް ގިނަވަނީ

ހިޔާ ފްލެޓްތަކުގެ ފިނިޝިންގ މަސައްކަތް ނިންމުމަށް ފައިސާ ނެގުމަށްފަހު މަސައްކަތް ނުނިންމާ މައްސަލާގައި ގާނޫނީ އެހީތެރިކަން ފޯރުކޮށްދޭން ޕަބްލިކް އިންޓްރެސްޓް ލޯ ސެންޓަރ (ޕީއައިއެލްސީ)ން ނިންމައިފިއެވެ.

ޕީއައިއެލްސީން ބުނީ ހިޔާ ފްލެޓްތަކުގެ ފިނިޝިންގ މަސައްކަތް ނިންމުމަށް އެކި ކުންފުނިތަކުން ހަވާލުވެ، ދިގު މުއްދަތެއް ވީއިރުވެސް މަސައްކަތް ނުނިންމާ މައްސަލަ ގިނަ ބަޔަކު އެ ސެންޓަރަށް ހުށަހަޅަމުންދާކަމަަށެވެ.

މިފަދަ ކަންތައް ދިމާވެފައިވާ ފަރާތްތަކުގެ ތެރެއިން ގާނޫނީ ވަކީލެއްގެ އެހީތެރިކަން ހޯދުމުގެ މާލީ ގާބިލްކަން ނެތް ފަރާތްތަކަށް ޕަބްލިކް އިންޓްރެސްޓް ލޯ ސެންޓަރުގެ ފަރާތުން ގާނޫނީ އެހީތެރިކަން ފޯރުކޮށްދިނުމަށްވަނީ ނިންމާފައެވެ. ޕީއައިއެލްސީން ބުނީ މިފަދައިން ހުށަހަޅާ ހުރިހާ މައްސަލަތަކެއް ނަގައި، އެމީހުންނަށް ގާނޫނީ އެހީތެރިކަން ފޯރުކޮށްދޭނެ ކަމަށެވެ.

އެހެންކަމުން މިފަދަކަމެއް ދިމާވެފައިވާ ފަރާތްތަކުގެ ތެރެއިން ގާނޫނީ ވަކީލެއްގެ އެހީތެރިކަން ހޯދުމުގެ މާލީ ގާބިލްކަން ނެތް ފަރާތްތަކުން ޕިއައިއެލްސީގެ އެހީތެރިކަން ހޯދުމަށް އެކަމަށް ޚާއްސަ ފޯމު ފުރުމަށްފަހު ހުށަހެޅުމަށް އެ ސެންޓަރުން ވަނީ އެދިފައެވެ. މިކަމަށް އެދި ހުށަހަޅާ ފޯމާއި، މިކަމާގުޅޭ އިތުރު މައުލޫމާތުތައް ޕީއައިއެލްސީގެ ވެބްސައިޓުންނާއި ސޯޝަލް މީޑިއާ ޕްލެޓްފޯމްތަކުން ލިބެން ހުންނާނެއެވެ.

ހިޔާ ފްލެޓްތަކުގެ ފިނިޝިންގ މަސައްކަތް ނިންމުމަށް އިތުރު 3 މަސް ދުވަސް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ މިދިޔަ ޑިސެމްބަރު މަހުގެ 26 ވަނަ ދުވަހު ނިންމަވާފައެވެ. މި މުއްދަތު ނިމުމުން ހިޔާ ފްލެޓްތަކުން ނަގަން ނިންމާފައިވާ ކުލި ނަގަން ފަށާނެއެވެ. ހިޔާ ފްލެޓްގެ ކުލީގެ ގޮތުގައި ނެގުމަށް ސަރުކާރުން ނިންމާފައިވަނީ 8،500ރ. އެވެ.