ބެލެނިވެރިންގެ ކެތްތެރިކަން ކޮޅުންލައިފި

22 އަހަރަށްފަހު ހދ.އަތޮޅު ތައުލީމީ މަރުކަޒުގެ ދަރިވަރުން މިއަހަރު އޯލެވެލް އިމްތިހާނު ހަދަން ތައްޔާރުވަމުންދާއިރު ސްކޫލްގައި ޕްރިންސިޕަލެއް ނެތި އަހަރަކާއި މިވަނީ ގާތްވެފައެވެ.

970 ދަރިވަރުން މިހާރުވެސް ކިޔަވަމުން އަންނަ ސްކޫލްގައި ޕްރިންސިޕަލްގެ އިތުރުން ޑެޕިއުޓީއެއް އަދި އެޑްމިނިސްޓްރޭޓިވް އޮފިސަރ އެއްވެސް ނެތި ސްކޫލްގެ ހިންގުންވަނީ ވަރަށްބޮޑަށް ބޮއްސުންލާފައިކަމަށް އެސްކޫލްގެ ބެލެނިވަރިން ދަނީ ބުނަމުންނެވެ. ފުރަތަމަ ޓާމްގެ ޓެސްޓްގެ ނަތީޖާ ލިބުނުއިރު ގްރޭޑްގެ 10 ގެ ދަރިވަރުންގެ އެވަރެޖް ނަތީޖާ ދައްވެ ބެލެނިވެރިންވަނީ ގޮތްހުސްވެފައެވެ.

ބެލެނިވެރިން މައުލޫމާތު ދޭގޮތުގައި، ސްކޫލްގައި ޕްރިންސިޕަލެއް ނެތުމުން އެކަމަށް އެދި އެކި ފަރާތްތަކާއި އެކި ގޮތްގޮތަށް ވާހަކަ ދެކެވިއްޖެކަމަށެވެ. އަބަދުވެސް ލިބޭޖަވާބަކީ ވަރަށް އަވަހަށް ޕްރިންސިޕަލެއް ހަމަޖެހޭނެ ކަމަށެވެ. އެހެންނަމަވެސް އަހަރަކާ ގާތްވެފައި ވާއިރު އަދިވެސް ސްކޫލަށް ޕްރިންސިޕަލެއް ނުލިބެއެވެ. ބެލެނިވެރިން ބުނީ މިޓާރމް ފެށޭއިރު ޕްރިންސިޕަލް ސްކޫލްގައި ހުންނާނެކަމަށް ވަރަށް ބޮޑު އުންމީދެއް އޮތްކަމަށެވެ. އެހެންނަމަވެސް ކަންވީ މުޅިން އިދިކޮޅަށެވެ.

އާދީއްތަ ދުވަހު ކިޔެވުން ފެށުންއިރު ސްކޫލްގެ ކަންކަން ހުރި ގޮތުން ބެލެނިވެރިންގެ ކެއްތެރިކަން ކޮޅުންލިއެވެ. މަސައްކަތް ދެގުނަކުރަން ނިންމިއެވެ. އެގޮތުން އަނެއްކާވެސް ސްކޫލްގައި ތިއްބެވި ބޭފުޅުންނާއި ބައްދަލުކޮށް މިކަމާއި މަޝްވަރާކުރިއެވެ. ލިބުން މައުލޫމާތަކީ ޕްރިންސިޕަލް ހަމަޖެހިފައިވާ ކަމަށެވެ. އެހެންނަމަވެސް އަދި ސްކޫލާއި ހަވާލުވާނެ ދުވަހެއް ނޭގެއެވެ. މިވަރުން ބެލެނިވެރިންގެ މަސައްކަތް ހުއްޓާނުލާއެވެ. ކުޅުދުއްފުށީ އުތުރު ދާއިރާގެ އެމްޕީ ޔާސިރު އަބްދުއްލަތީފްގެ އެހީތެރިކަން ލިބޭތޯވެސް މަސައްކަތް ކުރިއެވެ. އެމްޕީއާއި ހަވާލާދީ ބެލެނިވެރިން ބުނީ ޕްރިންސިޕްލެއް ހަމަޖެހިފައިވާކަމަށެވެ. އެހެންނަމަވެސް އެއީ މިހާރުވެސް އެހެން ސްކޫލް އަކާއި ހަވާލްވެ ހުރި ޕްރިންސިޕަލްއެކެވެ. އަދި އެޕްރިންސިޕަލް ތައުލީމީ މަރުކަޒާއި ހަމަޔައް ފޯރަނީ އަންނަމަހު ކަމަށެވެ.

އޯލެވެލް އަށް ވަރަށް ކުޑަދުވަސްކޮޅަކަށް ވެފައިވާއިރު ސްކޫލްގެ ސީނިއަރ މެނޭޖްމެންޓް ނެތި ދޯދިޔާވެ ކުދިންގެ ކިޔެވުމަށް ބުރޫއަރަމުންދާއިރު އެންމެ ދުވަހެއް ލަސްވުމަކީވެސް ބެލެނިވެރިންނަށް ކެތްކުރަން ފަސޭހަކަމެއް ނޫނެވެ.

އެހެންކަމުން ގްރޭޑް 10 ގެ މަންދޫބުން އިސްނަގައިގެން އިތުރު ބައެއް ބެލެނިވެރިންނާއެކު ހޯމަދުވަހު ސިޓީ ކައުންސިލްއާއި ވަނީ ބައްދަލްކޮށްފައެވެ. އަދި ބެލެނިވެރިންގެ ކަންބޮޑުވުންތައް ކައުންސިލްއާއި ވަނީ ހިއްޞާކޮށްފައެވެ. ބެލެނިވެރިން ކައުންސިލްއާއި ބައްދަލްކޮށް ދަރިވަރުންގެ ކިޔެވުމަށް ދިމާވާ ދަތިތައް ހިއްޞާކުރިއެވެ. އެގޮތުން ސީނިއަރ މެނޭޖްމެންޓް ނެތުމުން ސްކޫލްގެ ކިޔެވުން ވަރަށް ދޯދިޔާވެގެން ގޮސްފައިވާކަމަށާއި ފުރަތަމަ ޓާރމްގެ ނަތީޖާ ހުރިހާ ކުދިން ދައްވާނީ ކިޔަވައި ދިނުމުގެ މައްސަލަޔަކުންކަމަށް ފާހަގަކުރިއެވެ.

މީގެއިތުރުން ސްކޫލްގައި ލެބް އެއް ހުރިނަމަވެސް ކެމިކަލް ނެތުމުން އެތަނުގެ ބޭނުން ނުހިފޭކަމަށް ބެލެނިވެރިން ބުނެއެވެ. އެގޮތުން އެހެން ސްލޫކް އެއްގެ ލެބް އަށް ކުދިންގެން ގޮސްގެން ކިޔަވައިދިނުމާއި ކުދިން ކިޔަވާ ސްކޫލްގައި ލެބް ހުރުމާ ތަފާތުވާނެކަމަށް ބެލެނިވެރިން ފާހަގަކުރިއެވެ. މީގެއިތުރުން ބެލެނިވެރިން ބުނީ އެސްކޫލްގައި ގްރޭޑް 9 އުފައްދަން މިނިސްޓްރީން ބެލެނިވެރިންނަށް ދެއްކި ހުވަފެންތަކުގެ ތެރޭގައި ހަފްތާއެއްގެ ތެރޭގައި ލެބްގެ ހިދުމަތް ލިބޭނެ ކަމަށް މިނިސްޓްރީން ބުނިކަމަށާއި އެެހެންނަމަވެސް އެހަފްތާ އަދިވެސް ނާންނަކަމަށެވެ.

ބެލެނިވެރިންގެ ކަންބޮޑުވުންތައް ކައުންސިލްއާއި ހިއްޞާކރުމަށްފަހު މިކަންކަމަށް ހައްލެއް ހޯދުމަށް ކައުންސިލަށް ކޮއްދެވެން އޮތް ކޮންމެކަމެއް ކޮއްދެއްވުމަށް ބެލެނިވެރިންވަނީ ކައުންސިލްގައި އެދިފައެވެ.

ބެލެނިވެރިންގެ ކަންބޮޑުވުންތައް އަޑުއައްސަވައި މޭޔަރ މުހައްމަދު އާތިފް ވިދާޅުވީ ބެލެނިވެރިންގެ ކަންބޮޑުވުމަކީ ކައުންސިލްގެވެސް ކަންބޮޑުވުންކަމަށާއި، ހުރި ދަތިތައް ހައްލުކުރުމަށް ކަމާގުޅޭ ފަރާތްތަކާއި މަޝްވަރާކޮށް ވީ އެންމެ އަވަހަށް ހައްލެއް ހޯއްދެވުމަށް ކުރެވެން ހުރި ކޮންމެ މަސައްކަތެއްވެސް ކުރައްވާނެކަމަށެވެ. އެގޮތުން މިނިސްޓަރ އާއި ރައީސް އަށްވެސް ބެލެނިވެރިންގެ ކަންބޮޑުވުން ހިއްޞާކުރައްވާނެކަމަށް މޭޔަރ ވިދާޅުވިއެވެ.

މިބައްދަލްވުން ނިންމާލަމުން ބެލެނިވެރިން ބުނީ ކުޅުދުއްފުށީ ރައްޔިތުންނަކީ އަބަދުވެސް މަސްލަހަތު ހުރި ގޮތައް ކަންކަން ކުރަން އިސްކަންދޭ ބައެއްކަމަށާއި، އެހެންނަމަވެސް ކެތްކުރެވޭނީ ވަކި ވަރެއްވަންދެން ކަމަށެވެ. އަދި މިފަހަރު މިކަމަށް ހައްލެއް ނުލިބެނިސް މަސައްކަތް ހުއްޓާ ނުލާނެކަމަށް ބެލެނިވެރިން ބުނެއެވެ.