ރާއްޖޭގައި 1900އެއްހާ އިންޑިއާ ޓީޗަރުން، މިނިސްޓްރީން ބުނަނީ ރައްކާތެރިކަން ކަށަވަރު ކޮށްދޭނެ ކަމަށް

އިދިކޮޅު ޕީޕީއެމް-ޕީއެންސީން ހިންގަމުން ގެންދާ އިންޑިއާ އައުޓް ކެމްޕޭންގެ ސަބަބުން ރާއްޖޭގައި އުޅެމުންދާ އިންޑިއާ ޓީޗަރުންނަށްވެސް އެކި ބާވަތުގެ ފުރައްސާރަ ކުރިމަތިވަމުންދާއިރު، ޓީޗަރުންގެ ރައްކާތެރިކަން ކަށަވަރު ކުރުމަށް ކުރަންޖެހޭ ހުރިހާ މަސައްކަތަކެއް ކުރާނެކަމަށް އެޑިއުކޭޝަން މިނިސްޓްރީން ބުނެފިއެވެ.

ސިޔާސީ މަންފާއަށް ހިންގާ މިބާވަތުގެ ދަށުދަރަޖައިގެ އަމަލުތަކުގެ ސަބަބުން ދަރިވަރުންގެ އުނގެނުމާއި އުނގަންނައިދިނުމަށް އޭގެ ނުރަނގަޅު އަސަރު ފޯރަމުންދާކަން ފާހަގަކޮށް އެޑިޔުކޭޝަން މިނިސްޓްރީން ވަނީ އެފަދަ އަމަލުތައް ކުރާ މީހުންނާއި އެފަދަ ކަންކަމުގައި ބައިވެރިވެ ހިތްވަރުދޭ މީހުންގެ އަމަލުތައް ކުށްވެރިކޮށްފައެވެ. ރާއްޖޭގެ ސްކޫލްތަކުގައި މަސައްކަތް ކުރާ ބިދޭސީ ޓީޗަރުންގެ ސަލާމަތާއި ރައްކާތެރިކަން ކަށަވަރު ކުރުމަށް ޚާއްސަ އިސްކަމެއް ދޭނެކަމަށް އެޑިޔުކޭޝަން މިނިސްޓްރީން ބުނެއެވެ.

މިކަމާ ގުޅޭގޮތުން ރާއްޖެއެމްވީއިން ސުވާލު ދެންނެވުމުން އެޑިއުކޭޝަން މިނިސްޓްރީގެ ޕާމަނަންޓް ސެކެޓަރީ އަހުމަދު އަލީ ވިދާޅުވީ، ޓީޗަރުންގެ ރައްކާތެރިކަން ކަށަވަރު ކުރުމަށް ކުރަންޖެހޭ ކަންކަން މިނިސްޓްރީން ކުރާނެ ކަމަށެވެ. އެގޮތުން ރާއްޖޭގައި 1900 އެއްހާ އިންޑިއާ ޓީޗަރުން އުޅެމުންދާއިރު، އެ ފަރާތްތަކުގެ ރައްކާތެރިކަން ކަށަވަރު ކުރުމަށް ކުރަންޖެހޭ ކަންކަން ކުރައްވާނެކަމަށް ވިދާޅުވިއެވެ. އެގޮތުން މިހާރު އެމައްސަލަ ފުލުހުންނަށް ހުށައަޅާފައިވާކަމަށް އޭނާ ވިދާޅުވިއެވެ.

އެ މައްސަލަ ފުލުހުންނަށް ހުށައަޅާފައިވާ ކަމަށް ފުލުހުންގެ މީޑިއާ އޮފިޝަލު ރާއްޖެއެމްވީއަށް ކަށަވަރު ކޮށްދެއްވިއެވެ.

އާދިއްތަ ދުވަހު އެޑިޔުކޭޝަން މިނިސްޓްރީން ނެރުނު ބަޔާނެއްގައި ބުނީ މި ފަހަކަށް އައިސް، ރާއްޖޭގެ އެކި ހިސާބުތަކުގައި ސިޔާސީ ވާދަވެރިން އިސްވެތިބެ ހިންގަމުން ގެންދާ "އިންޑިއާއައުޓް" ހަރަކާތުގެ ތެރެއިން ސްކޫލްތަކާއި ދަރިވަރުން އެއްވެ އުޅޭ ތަންތަނުގައި ބެނާތައް ހަރުކުރުމާއި ސްކޫލް ފާރުތަކުގައި އެ އިބާރާތް ބޭނުންކޮށް ގްރެފިޓީގެ ގޮތުގައި ލިޔެ، ކުރަހަމުން ގެންދިއުމާއި، އިންޑިއާ ޓީޗަރުންނަށް ބޭރުތެރެއިން ފުރައްސާރަކުރުން އިތުރުވެފައިވާކަމަށެވެ.

އެގޮތުން، ވޭތުވެދިޔަ ހަފުތާ ތެރޭގައި އިދިކޮޅު ސިޔާސީ ވާދަވެރިންގެ ފަރާތުން ށ. އަތޮޅުގައި ކުރިއަށްގެންދިޔަ ބައެއް ރޯލުތަކުގައި އެފަދަ ބެނާތައް ސްކޫލް ސަރަހައްދުގައި ހަރުކޮށްފައިވާ ކަމަށެވެ. އަދި ފުނަދޫގައި ކުރިއަށްގެންދިޔަ ރެލީއެއްގައި އިދިކޮޅު ސިޔާސީ ލީޑަރެއްގެ ފަރާތުން، ގޭގޭގެ ފާރުތަކުގައި އެ އިބާރާތުން ލިޔަންވެއްޖެކަމަށް ބުނެ ވާހަކަދެއްކިތާ މާ ގިނައިރުތަކެއްނުވެ، ފުނަދޫ ސްކޫލް ފާރުގެ ބޭރުގައި "އިންޑިއަން-އައުޓް" މި މޭރުމުން ލިޔެފައިވާ ކަމަށް މިނިސްޓްރީން ބުނެއެވެ.

އެޑިޔުކޭޝަން މިނިސްޓްރީން ބުނީ، އެ އިބާރާތްތަކަށް ބަލާއިރު ސީދާ ޓާގެޓް ކުރެވެނީ މިތަންތަނުގައި މަސައްކަތްކުރާ އިންޑިއާގެ ރައްޔިތުންނަށްކަން ފާހަގަކުރެވޭ ކަމަށާއި، ސްކޫލް މަދަރުސާ ތަކަކީ ގިނަ އަދަދަކަށް ބިދޭސީ (އިންޑިއާ) ޓީޗަރުން ވަޒީފާ އަދާކުރަމުންދާ ތަންތަނަށްވެފައި ސްކޫލް ސަރަހައްދު ތަކުގައި އެގޮތަށް ގޮވުމާއި، ބެނާތައް ހަރުކުރުމާއި، ފާރުތަކުގައި ލިޔެ ހެދުމުގެ ސަބަބުން އެތަންތަނުގައި މަސައްކަތްކުރާ ޓީޗަރުންގެ ހިތްތަކުގައި ވަނީ ބިރުވެރިކަން އުފެދިފައިވާ ކަމަށެވެ. އަދި އެމީހުންނަށް އެތަންތަނުގައި ރައްކާތެރިކަން ކަށަވަރުކޮށްދިނުމަށް ސްކޫލްތަކުގައި އެދެމުންދާ ކަމަށް މިނިސްޓްރީން ބުނެއެވެ.