ރާއްޖޭގެ އާބާދީ މަދު ތިން ރަށެއްގައި ސެޓެލައިޓް ސްކޫލް އިފްތިތާހުކޮށްފިއެވެ.
ސެޓެލައިޓް ސްކޫލް އިފްތިތާހުކޮށްދެއްވީ ހޯމަ ދުވަހު މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާގެ ނާއިބު ފައިސަލް ނަސީމްއެވެ.
މި ރަސްމިއްޔާތު ބާއްވާފައިވަނީ ބ. ފެހެންދޫ ސްކޫލްގައާއި، ހުރަވީ ސްކޫލްގައެވެ. މި ރަސްމިއްޔާތު ކުރިއަށްގެންގޮސްފައިވަނީ ވަރޗުއަލްކޮށެވެ. މި ރަސްމިއްޔާތުގައި ނާއިބު ރައީސް ބައިވެރިވެވަޑައިގެންފައިވަނީ ހުރަވީ ސްކޫލްގައި ހުންނަވައިގެންނެވެ. އަދި އެޑިއުކޭޝަން މިނިސްޓަރ ބައިވެރިވެވަޑައިގެންނެވީ ފެހެންދޫ ސްކޫލުންނެވެ.
ރާއްޖޭގެ އާބާދީ މަދު ރަށްރަށުގެ ކުދިންނަށް ރަނގަޅު ތައުލީމީ ނިޒާމެއް ފޯރުކޮށްދިނުމަށް ސެޓަލައިޓް ސްކޫލް ގާއިމްކޮށްފައިވަނީ ބ. ފެހެންދޫ، ވ. ރަކީދޫ އަދި ވ. ތިނަދޫގައެވެ. މި ރަށްތަކުގައި މިކަމަށް ޚާއްސަ އިމާރާތްތައް ނިންމުމަށް ބަޔަކާ ހަވާލުކޮށްފައިވީ ނަމަވެސް އަދިވެސް ވ. ރަކީދޫ ސެޓަލައިޓް ސްކޫލަށް ޚާއްސަ އިމާރާތުގެ މަސައްކަތް ނިމިފައެއް ނުވެއެވެ.
މި ތިން ސްކޫލަށް ކިޔަވައިދޭނީ ހުރަވީ ސްކޫލްގެ ޓީޗަރުންނެވެ. އަދި އެ ޓީޗަރުންނަކީ މިކަމަށް ގާބިލް، ތަމްރީނު ލިބިފައި ތިބި ޓީޗަރުން ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވަނީ ވިދާޅުވެފައެވެ.
ސެޓެލައިޓް ސްކޫލް ގާއިމުކުރަނީ ސްކޫލް ނެތް ރަށްރަށާއި ކުދިން ހަމަނުވުމުގެ ސަބަބުން ސްކޫލް ނެތް ރަށްރަށާއި، ކުދިން ހަމަނުވުމުގެ ސަބަބުން ސްކޫލް ނުހިންގޭ ރަށްރަށުގައެވެ.
