ހދ. އަތޮޅު ތައުލީމީ މަރުކަޒަކީ ކުޅުދުއްފުށީ ސިޓީގައި ހުރި އެންމެ ގިނަދުވަސްވީ ސްކޫލެވެ. އެސްކޫލްގެ ހިޔާވަހި ކަމުގެ ދަށުން ތައުލީމް ހާސިލްކޮށްފައިވާ އެތައް ދަރިވަރުންނެއް މިހާރު އެސިޓީގެ ޒިންމާދާރު ވަޒީފާތައް އަދާކުރަމުންގެންދެއެވެ.

އެސްކޫލަކީ ބޮޑުތިލަދުންމަތީގެ ތައުލީމުގެ ބިންގާކަމުގައި ގިނަބަޔަކު ގަބޫލްކުރެއެވެ. ކުޅުދުއްފުށީގެ އިތުރުން އުތުރުގެ ރައްތަކުގެ ގިނަ ދަރިވަރުން ވަނީ އެސްކޫލުން ތައުލީމް ހާސިލްކޮށްފައެވެ. ގިނަ ތައުލީމީ ދަރިންތަކެއް އުފައްދާ ބޮޑެތި ކާމިޔާބީތަކެއް އެސްކޫލުންވަނީ ހާސިލްކޮށްފައެވެ. މީގެއިތުރުން ހދ.އަތޮޅު ތައުލީމީ މަރުކަޒަކީ އެހެން ސްކޫލްތަކަށް ނަމޫނާއެއްގޮތުގައި ބަލަމުން އައި ސްކޫލްއެކެވެ.

އެހެންނަމަވެސް މިއަދު މިކަން ބަދަލުވަމުންދާތީ ބެލެނިވެރިންދަނީ ކަންބޮޑުވުން ފާޅުކުރަމުންނެވެ. 970 ދަރިވަރުން ކިޔަވަމުންދާ މި ސްކޫލްގައި ޕްރިންސިޕަލެއް ނެތި އަހަރަކާއި ގާތްވެފައިވާއިރު ޑެޕިއުޓީ ޕްރިންސިޕަލެއްގެ އިތުރުން ސްކޫލްގައި އެޑްމިނިސްޓްރޭޓިވް އޮފިސަރެއްވެސްނެތެވެ. ގްރޭޑް 10 އާއި ހަމަޔަށް ކިޔަވައިދެމުންދާ މިސްކޫލްގެ ކިޔެވުން އިއްޔެ ފެށި އިރު ވަގުތީ ގޮތުން ހިންގުމާ ހަވާލްވެހުންނެވި ބޭފުޅާ ހުންނެވީ ކަރަންޓީންގައެވެ.

ކުދިންގެ އޯލެވެލް ކައިރިވަމުން އަންނައިރު ސްކޫލްގެ އިދާރީ ހިންގުން މިފެންވަރުގައި ހުރުމުން ބެލެނިވެރިން ވަނީ ވަރަށް ބޮޑު މާޔޫސްކަމެއްގައެވެ. އެސްކޫލްގެ ބެލެނިވެރިން މައުލޫމާތު ދެއްވިގޮތުގައި އިއްޔެ ސްކޫލްގެ އޮފީހުން ދިން މައުލޫމާތުން އެނގުނު ގޮތުގައި ސްކޫލަށް ޕްރިންސިޕަލެއް ހަމަޖެއްސުމަށް އިންޓަވިއު މަރުހަލާވަނީ ނިމިފައެވެ. އެހެންނަމަވެސް އަދި އެޕްރިންސިޕަލް ސްކޫލާއި ހަވާލުވެ ލައްވާނީ ކޮންއިރަކުންކަމެއް ޔަޤީންވެފަނެތެވެ.

ކުޅުދުއްފުށީ އުތުރު ދާއިރާގެ މަޖިލިސް މެމްބަރު ޔާސިރު އަބްދުއްލަތީފް އާއި ހަވާލާދީ ބެލެނިވެރިން ބުނީ ސްކޫލަށް އިންޓަވިއު ކުރި ޕްރިންސިޕަލް ސްކޫލާ ހަވާލުވެލައްވާނީ އަންނަމަހުކަމަށެވެ. އަދި އެޕްރިންސިޕަލަކީ މިހާރުވެސް އެހެން ސްކޫލަކާއި ހަވާލުވެ ހުންނެވި ޕްރިންސިޕަލެއްކަމަށެވެ.

ކަންމިހެން ހުރުމުން އެސްކޫލްގެ ޕީޓީއޭގެ ބައެއް ބެލެނިވެރިންނާއި އަދި އާންމު ބައެއް ބެލެނިވެރިން މިއަދު ކުލުދުއްފުށީ ސިޓީ ކައުންސިލާއި ބައްދަލުކުރުމަށް ހަމަޖެހިފައިވާކަމަށް ބެލެނިވެރިން ބުނެއެވެ.

ބެލެނިވެރިން ބުނީ ދަރިވަރުންގެ ކިޔެވުމަށް ސްކޫލަށް ބެލެނިވެރިންގެ ފަރާތުން ކުރަންޖެހުން ކޮންމެ ކަމެއް ކުރުމަށް ބެލެނިވެރިން ތައްޔާރަށް ތިބިކަމަށެވެ. އެހެންކަމުން ހދ.އަތޮޅު ތައުލީމީ މަރުކަޒާމެދު މިހާރު ވަމުންދާ އިހުމާލު ހުއްޓާލައި އެސްކޫލްގެ މެނޭޖްމެންޓް ރަނގަޅުކޮށްދިނުން އެދޭކަމަށެވެ.