ކޮވިޑް-19ގެ ކޭސްތައް އިތުރުވަމުންދާ މި ދަނޑިވަޅުގައި ރައްކާތެރިކަމުގެ ފިޔަވަޅުތަކާއެކު ސްކޫލްތަކުގެ ދެވަނަ ޓާމުގެ ކިޔެވުން ފަށައިފިއެވެ.

ކޮވިޑްގެ ކޭސްތައް އިތުރުވަމުންދާ މި ދުވަސްވަރުގައި ސްކޫލްތައް ހުޅުވާލާފައިވާއިރު، ދަރިވަރުންގެ ރައްކާތެރިކަން ކަށަވަރުކުރުމަށް ސްކޫލްތައް އޮތީ ވަރަށް ބޮޑަށް ތައްޔާރުވެފައެވެ. މިގޮތުން މީގެ ކުރިން އަމަލުކުރިގޮތަށް ދަރިވަރުން ސްކޫލަށް ވަންނަ ތަނުން އެކުދިންގެ ހުން ހުރި މިންވަރު ބެލުމާއި، އަތް ސާފުކުރުމާއި މިފަދަ ކަންކަން އަދިވެސް ކުރިއަށްގެންދެއެވެ.

މީގެ އިތުރުންވެސް ވަކި ޚާއްސަ ފިޔަވަޅުތަކެއް އަޅަން ސްކޫލްތަކަށް ވަނީ އަންގާފައެވެ. މިގޮތުން ބޭރުން އަންނަ ކުދިން އަދި ސްކޫލް މުވައްޒަފުން ރާއްޖެ އަންނަތާ 3-5 ދުވަހުގެ ތެރޭގައި ޕީސީއާރު ޓެސްޓު ހަދައި އަދި އެ ޓެސްޓުގެ ނަތީޖާ ލިބުމުގެ ކުރިން ސްކޫލަށް ހާޒިރު ނުވުމާއި، މޮނިޓަރިންގެ ހާލަތުގައި އޮންނަ ރަށަކުން ކުއްޖަކު ނުވަތަ މުވައްޒަފަކު އެ ރަށަަކަށް ގޮސް 3-4 ދުވަހުގެ ތެރޭގައި ޕީސީއާރު ޓެސްޓު ހެދުމަށް ފަހު ނަތީޖާ ލިބުމުގެ ކުރިން ސްކޫލަށް ހާޒިރު ނުވުމެވެ.

މީގެ އިތުރުން ސްކޫލްގެ ތެރޭގައި ކުދިންނާއި މުވައްޒަފުން ހުރިހާ ވަގުތެއްގައި ވެސް މާސްކް އަޅައިގެން ތިބުމާއި ސައިބޯނި ލައިގެން ރަނގަޅަށް އަތްދޮވެވޭނެ އިންތިޒާމު ހަމަޖައްސާފައި ހުރުމާއި، މި ދުވަސްވަރު ސްކޫލުގެ ތެރޭގައި ގްރޫޕް ހަދައިގެން އެއްވެސް މުވައްޒަފަކު ނުވަތަ ދަރިވަރަކު ވެސް ކައިބޮއި ނުހެދުމަށް ވަނީ އަންގާފައެވެ. އަދި ސްކޫލްގެ ތެރޭގައި ގާއިމު ކޮށްފައިވާ "އިންފެކްޝަން މެޝާސް" ގެ ކަންކަން ފުރިހަމަ އަށް ތަންފީޒުކުރުމަށް ވެސް ވަނީ އަންގާފައެވެ.

މާލެ ސަރަހައްދުގެ ސްކޫލްތަކުގައި ގްރޭޑް 1ން 8 ގެ ދަރިވަރުން ފުރަތަމަ ހަފްތާގައި ސްކޫލަށް ހާޒިރުވާނީ މަދުވެގެން 2 ދުވަހުއެވެ. އެހެންނަމަވެސް ސްކޫލްތަކުގެ ކެޕޭސިޓީއަށް ބެލުމަށްފަހު އިތުރު ދުވަސްތަކުގައި ސްކޫލްތަކަށް ހާޒިރުވެގެން ކިޔަވައިދެވޭނަމަ ވަކިވަކި ސްކޫލްތަކުން އިންތިޒާމްތައް ހަމަޖައްސައިގެން ކުރިއަށް ގެންދެވޭނެ ކަމަށް އެޑިއުކޭޝަން މިނިސްޓްރީން އަންގާފައިވެއެވެ.

އެލްކޭޖީ އަދި ޔޫކޭޖީ ދަރިވަރުން ވެސް ސްކޫލަށް ހާޒިރުވެގެން ކިޔެވުން ކުރިއަށްގެންދާނީ 2 ދުވަހެވެ. ނަމަވެސް ސްކޫލްތަކުގެ އާބާދީއަށް ބެލުމަށްފަހު ފިޔަވަޅުތަކާއެކު ކިޔަވައިދެވޭނަމަ އިތުރު ދުވަސްތަކުގައި ސްކޫލަށް ދަރިވަރުން ހާޒިރުކޮށްގެން ކިޔަވައިދެވޭނެ ކަމަށް މިނިސްޓްރީން ވަނީ އަންގާފައެވެ. އަދި ސްކޫލަށް ހާޒިރު ނުވާ ދުވަސްތަކުގައި އޮންލައިންކޮށް ކިޔަވައިދިނުމުގެ ކަންކަން ކުރިއަށްދިއުމަށާއި، ސްކޫލަތަކުން އެ އިންތިޒާމްތައް ހަމަޖައްސާ ބެލެނިވެރިންނަށް އެންގުމަށްވެސް މިނިސްޓްރީން ވަނީ އަންގާފައެވެ.

މި ގްރޭޑްތަކުގެ އިތުރުން ސާނަވީ އަދި މަތީ ސާނަވީ (ގްރޭޑް 9، 10، 11 އަދި 12) ގެ ދަރިވަރުން ހުރިހާ ދުވަހެއްގައި ސްކޫލަށް ހާޒިރުވެގެން ކިޔެވުން ކުރިއަށްގެންދިއުމަށް ވަނީ އަންގާފައެވެ. ގްރޭޑްތަކުގެ ކިޔެވުން ކުރިއަށްގެންދާގޮތަށް ބަދަލުގެނެސްފައިވަނީ ހަމައެކަނި މާލެ ސަރަހައްދުގައެވެ. އަތޮޅުތެރޭގެ އެއްވެސް ސްކޫލެއްގެ ކިޔެވުމަށް ބަދަލެއް ގެނެސްފައެއް ނުވެއެވެ.

މިދިޔަ ޑިސެމްބަރު މަހުގެ ފަހުކޮޅުން ފެށިގެން މުޅި ރާއްޖެއިން ފެންނަ ކޮވިޑްގެ ކޭސްތައް ދަނީ ދުވަހަކަށްވުރެ ދުވަހެއް އިތުރުވަމުންނެވެ. އެޗްޕީއޭއިން އެންމެ ފަހުން އާންމުކުރި މައުލޫމާތުގައިވާ ގޮތުން މުޅި ރާއްޖެއިން ފެނުނު ކޮވިޑް ކޭސްތަކުގެ ޖުމްލަ ވަނީ 102،372 އަށް އަރާފައެވެ. ހޮނިހިރު ދުވަހު މުޅި ރާއްޖެއިން 954 މީހަކު ޕޮޒިޓިވްވެފައިވާއިރު، މާލެ ސަރަހައްދުން 514 މީހަކު ވަނީ ޕޮޒިޓިވްވެފައެވެ. އަދި އަތޮޅުތެރެއިން 326 މީހަކު ޕޮޒިޓިވްވެފައިވާއިރު، ރިސޯޓުތަކުން ޕޮޒިޓިވްވެފައިވަނީ 36 މީހުންނެވެ. މިއާއެކު އިތުރުވަމުންދާ ކޭސްތަކާއެކު ދަރިވަރުން ސްކޫލަށް ގެންގޮސްގެން ކިޔެވުން ކުރިއަށްގެންދިއުމުގައި އިތުރަށް ސަމާލުވާންޖެހެއެވެ.