މިދިޔަ އަހަރު ނިމުނުއިރު ލާރނިންގ ލޮސް ހުރި މިންވަރު ދެނެގަތުމަށް ހުރިހާ ސްކޫލެއްގައި އެސެސްމެންޓެއް ވަނީ ހެދިފައި: ސްޓޭޓް މިނިސްޓަރ
ކޮވިޑް-19 އާ ގުޅިގެން ރާއްޖޭގައި ދަރިވަރުންނަށް ވަނީ އޮންލައިންކޮށް ކިޔަވައިދިނުމުގެ އިތުރުން ޓެލެކްލާސް މެދުވެރިކޮށްވެސް ކިޔަވައިދީފައި
އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު ފަލަސުރުޚީ ޕްރޮގްރާމްގައި ވާހަކަދައްކަވަނީ
ކޮވިޑް-19 އާ ގުޅިގެން ކިޔަވައިދިނުމުގެ ވައްޓަފާޅިއަށް ގެންނަންޖެހުނު ބަދަލުތަކުގެ ސަބަބުން ކުދިންނަށް ކަރިކިޔުލަމްއިން ހާސިލުވެފައިވާ މިންވަރު ނުވަތަ ލާރނިންގ ލޮސް ހުރި މިންވަރު ދެނެގަތުމަށް މިދިޔަ އަހަރު ނިމުނުއިރު ރާއްޖޭގެ ހުރިހާ ސްކޫލެއްގައިވެސް އެސެސްމެންޓެއް ކުރިޔަށް ގެންގޮސްފައިވާކަމަށް އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު ވިދާޅުވެއްޖެއެވެ.
ކޮވިޑް-19 އާ ގުޅިގެން ރާއްޖޭގައި ދަރިވަރުންނަށް ވަނީ އޮންލައިންކޮށް ކިޔަވައިދިނުމުގެ އިތުރުން ޓެލެކްލާސް މެދުވެރިކޮށްވެސް ކިޔަވައިދީފައެވެ. ދަރިވަރުންގެ ކިޔެވުން މެދު ނުކެނޑި ކުރިޔަށް ގެންދިޔަނަމަވެސް ކުދިން ސްކޫލަށް ހާޒިރުނުވެ ކިޔެވުން ފުރިހަމަކުރަން ޖެހުމުގެ ސަބަބުން ކުދިންނަށް ހާސިލުކުރެވިފައިވާ މިންވަރު ދެނެގަތުމަށް ވަނީ ދަތިތަކާ ކުރިމަތިވެފައެވެ.
މިކަންކަމާއި ގުޅޭގޮތުން ރާއްޖެ ޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އާތިޔާ ވިދާޅުވީ ކޮވިޑްގެ ތެރޭގައި ދިމާވި އެންމެ ބޮޑު ގޮންޖެހުމަކީ އޮންލައިންކޮށް ޓެސްޓްކުރަން ޖެހުންކަަށެވެ. ނަމަވެސް އެކަމަށްވެސް މިހާރު ތައްޔާރުވެވިފައިވާކަމަށް އާތިޔާ ވިދާޅުވިއެވެ. އަދި މިދިޔަ އަހަރު ރާއްޖޭގެ ހުރިހާ ސްކޫލެއް ޕްރައިވެޓް ސްކޫލްތައްވެސް ހިމެނޭ ގޮތަށް ލަރނިން ލޮސް ހުރި މިންވަރު ދެނެގަތުމަށް މަސައްކަތްކުރި ކަމަށް އާތިޔާ ވިދާޅުވިއެވެ.
އެސެސްމެންޓްގެ ނަތީޖާއަށް ބަލާ ރިމީޑިއަލް ކްލާސްތަކާއި ދެންކުރަން ހުރި ކަންކަމުގެ ޕްލޭންތައް މިހާރު އެކުލަވާލެވެމުންދާކަމަށް އާތިޔާ ވިދާޅުވިއެވެ.
އާތިޔާ އިތުރަށް ވިދާޅުވީ އެނަލިސިސް އާއި ފައިނަލް ރިޕޯޓް އަދި ނުނިމޭކަމަށެވެ. ނިމުމުން އެކަންކަން ހިއްސާކުރެވޭނެކަމަށެވެ.
ޖެނުއަރީ މަހުގެ 16 ވަނަ ދުވަހު ދެވަނަ ޓާމުގެ ކިޔެވުން ފެށޭއިރު ރާއްޖެއަށް ވަނީ އަނެއްކާވެސް ކޮވިޑް-19ގެ ރާޅެއް ކުރިމަތިވެފައެވެ. އެއާއެކު އެޑިއުކޭޝަން މިނިސްޓްރީން ވަނީ ގްރޭޑް 1ން 8 ގެ ދަރިވަރުން ފުރަތަމަ ހަފްތާގައި މަދުވެގެން 2 ދުވަހު ސްކޫލަށް ހާޒިރުވާ ގޮތަށް ޓައިމްޓޭބަލް ރޭވުމަށް މާލޭގެ ސްކޫލްތަކަށް އަންގާފައެވެ. އެހެންނަމަވެސް ސްކޫލްތަކުގެ ކެޕޭސިޓީއަށް ބެލުމަށްފަހު އިތުރު ދުވަސްތަކުގައި ސްކޫލްތަކަށް ހާޒިރުވެގެން ކިޔަވައިދެވޭނަމަ ވަކިވަކި ސްކޫލްތަކުން އިންތިޒާމްތައް ހަމަޖައްސައިގެން ކުރިއަށް ގެންދެވޭނެއެވެ. ރާއްޖެ.އެމްވީއަށް މައުލޫމާތުދެމުން އެޑިއުކޭޝަން މިނިސްޓްރީން ބުނީ އެލްކޭޖީ އަދި ޔޫކޭޖީ ދަރިވަރުން ވެސް ސްކޫލަށް ހާޒިރުވެގެން ކިޔަވަން އަންގާފައިވާނީ 2 ދުވަހު ކަމަށާއި، ނަމަވެސް ސްކޫލްތަކުގެ އާބާދީއަށް ބެލުމަށްފަހު ފިޔަވަޅުތަކާއެކު ކިޔަވައިދެވޭނަމަ އިތުރު ދުވަސްތަކުގައި ސްކޫލަށް ދަރިވަރުން ހާޒިރުކޮށްގެން ކިޔަވައިދެވޭނެ ކަމަށެވެ. އަދި ސްކޫލަށް ހާޒިރު ނުވާ ދުވަސްތަކުގައި އޮންލައިންކޮށް ކިޔަވައިދިނުމުގެ ކަންކަން ކުރިއަށްދާނެ ކަމަށާއި، ސްކޫލަތަކުން އެ އިންތިޒާމްތައް ހަމަޖައްސާ ބެލެނިވެރިންނަށް އަންގާނެ ކަމަށެވެ.
އެޑިއުކޭޝަން މިނިސްޓްރީން ބުނީ ސާނަވީ އަދި މަތީ ސާނަވީ (ގްރޭޑް 9، 10، 11 އަދި 12) ގެ ދަރިވަރުން ހުރިހާ ދުވަހެއްގައި ސްކޫލަށް ހާޒިރުވާން ޖެހޭނެ ކަމަށެވެ. އަދި ދަންފަޅިތައް ބަހާލައިގެން ކިޔަވައިދޭނެ ގޮތްތަކާއި ސްކޫލްތަކުން ހަމަޖައްސާ އުސޫލުތައް ބެލެނިވެރިންނަށް ސްކޫލްތަކުން އަންގާނެ ކަމަށެވެ. އަދި ކިޔަވައިދިނުމުގައި ބަދަލުތަކެއް ގެނެސްފައިވަނީ ހަމައެކަނި މާލެ ސަރަހައްދުގެ ސްކޫލްތަކަށް އެކަނި ކަމަށާއި، އަތޮޅުތެރޭގެ އެއްވެސް ސްކޫލެއްގެ ކިޔެވުމަށް ބަދަލެއް ގެނެސްފައި ނުވާ ކަމަށް އެޑިއުކޭޝަން މިނިސްޓްރީން ބުނެއެވެ.
