އަރަބިއްޔާ ސްކޫލް ހުރީ ދެވަނަ ޓާމު ފެށުމަށް ވާންޖެހޭ ތައްޔާރީތައް ވެނިމިފައި: ސްޓޭޓް މިނިސްޓަރ

އަރަބިއްޔާ ސްކޫލް ކުދިންނަށް ޚާއްސަކޮށް ވަގުތީ ގޮތުން ހަމަޖައްސާފައިވާ ފޮރިން މިނިސްޓްރީގެ ވަގުތީ އިމާރާތް ވަނީ ސްކޫލް ހުޅުވެންވާއިރަށް ވާންޖެހޭ ހުރިހާ ތައްޔާރީތަކެއް ވެނިމިފައި ކަމަށް އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު ވިދާޅުވެއްޖެއެވެ.

ސަރުކާރު ހިއްސާވާ ވަރަށް ގިނަ ކުންފުނިތަކުގެ އެހީތެރިކަމާ އެކު ވަގުތީ އިމާރާތުގެ މަސައްކަތް ކޮށްފައިވަނީ ސިފައިންނެވެ. ފޮރިން މިނިސްޓްރީގެ ވަގުތީ އިމާރާތް އަރަބިއްޔާ ސްކޫލުގެ ދަރިވަރުންނަށް ހަމަޖައްސާފައިވަނީ އަރަބިއްޔާގެ ދަރިވަރުން އިއްޒުއްދީން ސްކޫލަށް ބަދަލުކުރަން ނިންމާފައިވާކަން އެޑިއުކޭޝަން މިނިސްޓްރީން 16 ޑިސެންބަރު 2021ގައި އިއުލާން ކުރުމަށްފަހުއެވެ. މިނިންމުމާއެކު މައްސަލަ ހޫނުވެ ޑިސެންބަރުމަހު 17 ވީ ހުކުރު ދުވަހުގެ ހަވީރު އަރަބިއްޔާ ސްކޫލްދޮށަށް އެއްވެ ބެލެނިވެރިން މުޒާހަރާކޮށްފައިވެއެވެ.

މީގެ އިތުރުން އެ ސްކޫލްގެ ޕޭރެންޓް ޓީޗަރސް އެސޯސިއޭޝަން (ޕީޓީއޭ)އިން ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ ބައްދަލު ކުރައްވައި، މަޝްވަރާ ކުރައްވާފައިވެއެވެ. މި ބައްދަލުކުރެއްވުމަށްފަހު 21 ޑިސެންބަރު 2021 ގައި ރައީސް ނިންމަވާފައިވަނީ އަރަބިއްޔާ ސްކޫލު ވަގުތީ ގޮތުން ފޮރިން މިނިސްޓްރީގެ ކުރީގެ ވަގުތީ އިމާރާތަށް ބަދަލު ކުރެއްވުމަށެވެ. އަދި މި އިމާރާތް ހަވާލުކުރެވޭއިރު، ކްލާސްރޫމާއި އަދި ސްކޫލު ހިންގޭނެވަރަށް އެ އިމާރާތުގެ ކަންކަން އިންތިޒާމް ކޮށްދެއްވުމަށް ރައީސް ވަނީ ނިންމަވާފައެވެ.

އަރަބިއްޔާގެ ވަގުތީ އިމާރާތައި ގުޅޭގޮތުން އެންމެފަހުގެ މައުލޫމާތު ދެއްވަމުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ސްޓޭޓް މިނިސްޓަރ ވިދާޅުވީ އަރަބިއްޔާގެ ބެލެނިވެރިން ބޭނުންވި ގޮތަށް ވަގުތީ ހައްލު ހޯދައިދެވުމުން އެކަމާ އުފާކުރައްވާކަމަށެވެ. އަދި ކޮވިޑްގެ ހާލަތާއެކު ސްކޫލް ހުޅުވޭއިރު ގައިދުރުކަމާއެކު ހުރިހާ ފިޔަވަޅުތަކަކާއެކު އަރަބިއްޔާގެ ދަރިވަރުންނަށްވެސް ދެވަނަ ޓާމުގެ ކިޔެވުން ފެށިގެންދާނެކަމަށް ސްޓޭޓް މިނިސްޓަރ ވިދާޅުވިއެވެ.

އާތިޔާ އިތުރަށް ވިދާޅުވީ އޮފީސް އިމާރާތެއް ކުލާސްރޫމްތަކަކަށް ކުޑަވަގުތުކޮޅެއްގެ ތެރޭގައި ބަދަލުކުރަން ޖެހުމަކީ ކުރިމަތިވި ގޮންޖެހުމެއްކަމަށެވެ. ނަމަވެސް އިމާރާތަށް ގެންނަންޖެހޭ ބަދަލުތައް ގެނެސްފައިވާނެ ކަމަށް އާތިޔާ ވިދާޅުވިއެވެ. އެހެން ސްކޫލްތަކުގައި ކުލާސްރޫމްތަކުގެ ކުޑަދޮރުތައް ހުޅުވޭ ގޮތަށް ހުރިނަމަވެސް މިއިމާރާތުގައި ހުރިހާ ކުލާސްތަކެއްވެސް އޭސީ ކޮށްފައި ހުރުމުން ދޮރުތައް ހުންނާނީ ބަންދުކޮށްފައި ކަމަށް އާތިޔާ ވިދާޅުވިއެވެ.

ސްކޫލެއްގައި ތިބެގެން ދަތިވަރުންނަށް ކިޔެވޭނެ ހުރިހާ އިންތިޒާމުތަކެއް ހަމަޖެހިފައިވާނެކަމަށްވެސް ސްޓޭޓް މިނިސްޓަރ އާތިޔާ ވިދާޅުވިއެވެ. މިއިމާރާތުގެ މަސައްކަތް ކުރަމުންދިޔައިރު އެޑިޔުކޭޝަން މިނިސްޓަރ ޑރ އައިޝަތު އަލީ ވަނީ ވަރަށް ކައިރިން މަސައްކަތްތައް ކުރިޔަށްދާ ގޮތް ބައްލަވާފައިކަމަށް އާތިޔާ ވިދާޅުވިއެވެ.

އަރަބިއްޔާ ސްކޫލް އެންމެ ފުރަަތަމަ ހިންގީ މަޖީދީމަގުގައި ޓާޓާ ފްލެޓްތައް އިމާރާތްކޮށްފައިވާ ބިމުގައެވެ. އެ ތަނުން ދެން ބަދަލުކުރީ، އިއްޒުއްދީން ސްކޫލު ހިންގާ، ކުރީގެެ އެމްއީއެސް އިމާރާތަށެވެ. އެ އިމާރާތުން ދެން ބަދަލުވީ މިހާރު ބޭނުންކުރާ އިމާރާތަށެވެ. ނަމަވެސް އެއިމާރާތު ބައެއް ތަންތަނުން ވަނީ ވަރަށް ބޮޑަށް ކަނޑައިގެން ގޮސް ގެއްލުންތައް ލިބިފައެވެ.

އަރަބިއްޔާ ސްކޫލްގެ އިމާރާތުގެ މައްސަލައަށް ދާއިމީ ހައްލެއް ގެނައުމަށް ރައީސުލްޖުމްހޫރިއްޔާ ނިންމަވާފައިވަނީ ބާ ޖަމާލުއްދީން ހުންނަ ބިމުގައި އެސްކޫލްގެ ދަރިވަރުންނަށް އައު އިމާރާތެއް އެޅުމަށެވެ.