މި ހަފުތާތެރޭގައި އޮންލައިންކޮށް ކިޔަވައިދިނުމެއް ނޯންނާނެ: ސްޓޭޓް މިނިސްޓަރ
ޕްރީ ސްކޫލްވެސް ބަންދު ކުރަން ނިންމާފައެއްނުވޭ
ކޮވިޑާއެކު ސްކޫލުތަކުގައި ގައިދުރުކަމުގެ ފިޔަވަޅު ވަނީ އަޅާފައި
މި ހަފުތާތެރޭގައި އޮންލައިންކޮށް ކިޔަވައިދިނުމެއް ނޯންނާނެ ކަމަށް އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު ވިދާޅުވެއްޖެއެވެ.
ކޮވިޑްގެ އައު ރާޅެއް ރާއްޖެއަށް ބިންދާލާފައިވާއިރު ކޮވިޑަށް ޕޮޒިޓިވްވާ މީހުންގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ. އެއާއެކު އެޑިއުކޭޝަން މިނިސްޓްރީން ވަނީ ގްރޭޑް 1އިން 7އަށް ކިޔަވަމުންދާ ދަރިވަރުން ސްކޫލަށް ދާން ޖެހޭނީ ދެ ދުވަހު ކަމަށް ނިންމާފައެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ސްޓޭޓް މިނިސްޓާ އާތިޔާ ނަސީރު ވިދާޅުވީ، މިފަހަރު މިގެނެވުނީ އެއް ހަފުތާގެ އިންތިޒާމެއް ކަމަށާއި، މީގެ ކުރިން ކޮވިޑާއެކު ގެނެވުނު ބަދަލަކީ ވަގުތު ލިބިގެން ސަރވިސް ޕްރޮވައިޑަރސްއާ ވާހަކަ ދެކެވިގެން ގެނެވުނު ބަދަލެއް ކަމަށާއި، އެކަމަކު ކުއްލިއަކަށް މިފަހަރު އިންތިޒާމުތައް ހަމަޖައްސަން ޖެހުމާ ގުޅިގެން ސަރވިސް ޕްރޮވައިޑަރސްއާ ވާހަކަ ދައްކަން ވަގުތު ލިބިފައިނުުވާ ކަމަށާއި، އެހެންކަމުން މި ހަފުތާގައި އޮންލައިންކޮށް ކިޔަވައިދިނުމެއް ނޯންނާނެކަމަށެވެ.
އާތިޔާ ވިދާޅުވީ ސްކޫލުތަކުގެ ޕްރިންސިޕަލުންނާ ބައްދަލުކޮށް ވާހަކަ ދެއްކުމުން ސްކޫލުތަކުގެ ވިސްނުން ހުރިގޮތް އެނގިގެންދިޔަ ކަމަށާއި، އެގޮތުން ސްކޫލު ގަޑީގައި ދަރިވަރުން ކިޔެވޭނެ ގޮތްތަކެއް ސްކޫލުތަކުން މިހާރު ވިސްނާފައިވާކަމަށެވެ.
އާތިޔާ ވިދާޅުވީ ޕްރީ ސްކޫލުތަކުގައިވެސް ކިޔަވައިދިނުން ކުރިޔަށްދާނީ ވެސް ދެ ދުވަހު ކަމަށާއި، ޕްރީ ސްކޫލުތައް ބަންދުކުރަން ނިންމާފައިނުވާ ކަމަށެވެ.
އަދި މަތީ ސާނަވީ ދަރިވަރުން ކޮންމެ ދުވަހަކުވެސް ސްކޫލަށް ހާޒިރުކުރަން ނިންމީ ގިނަ ކަންކަމަށް ވިސްނާފައި ކަމަށާއި، އެގޮތުން ގިނަ ދަރިވަރުން މިހާރުވެސް ވަނީ ވެކްސިން ފުރިހަމަކޮށްފައި ކަމަށާއި، މަތީ ސާނަވީ ދަރިވަރުންނަކީ ބައިނަލްއަގުވާމީ އިމްތިހާންތަކަށް ތައްޔާރުވަމުންދާ ކުދިން ކަމަށެވެ.
