ފެންވަރު ހިފެހެއްޓުމަށް މުހިންމު ދާއިރާތަކުން މިނިމަމް ސްޓޭންޑަޑެއް ކަނޑައަޅަން ޖެހޭ: ހަޔަރ އެޑިޔުކޭޝަން މިނިސްޓަރު
14 ޖެނުއަރީ 2022 | ހުކުރު 09:22ގާބިލްކަމާއެކު ސުވާލު އުފައްދާނެ ޖާގައެއް ނުލިބޭނެ
ހަޔަރ އެޑިއުކޭޝަން މިިނިސްޓަރ
މަތީ ތައުލީމުގެ ފެންވަރު ހިފެހެއްޓުމަށް މުހިންމު ދާއިރާތަކުން މިނިމަމް ސްޓޭންޑަޑެއް ކަނޑައަޅަންޖެހޭ ކަމަށް ހަޔަރ އެޑިޔުކޭޝަން މިނިސްޓަރު ޑރ.އިބްރާހީމް ހަަސަން ވިދާޅުވެއްޖެއެވެ.
ކީރިތި ގުރުއާންގެ އިލްމުގެ ތައުލީމީ ޕްރޮގްރާމްތަކުގައި ހުންނަންޖެހޭ މިނިމަމް ސްޓޭންޑަޑް އިފްތިތާހު ކުރި ރަސްމިއްޔާތުގައި މިނިސްޓަރު ވިދާޅުވީ ގުރުއާން ތައުލީމީ ޕްރޮގްރާމްތަކުގައި ހުންނަ ތަފާތުތަކުގެ ސަބަބުން ބައެއް މީހުން އެ ޕްރޮގްރާމްތައް ފުރިހަމަ ކުރާ މީހުންގެ ގާބިލްކަމާމެދު ސުވާލު އުފައްދާ ކަމަށެވެ. އެގޮތުން އެފަދަ ޕްރޮގްރާމެއް ފުރިހަމަ ކުރުމަށްފަހު ކިޔަވައިދިނުމުގެ ދައިރާއަށް ނުކުންނަ މީހުންނަށް މިމައްސަލަ ވަރަށް ބޮޑަށް ކުރިމަތިވާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ ގުރުއާންގެ އިލްމުގެ ތައުލީމީ ޕްރޮގްރާމްތަކުގައި ހުންނަންޖެހޭ މިނިމަމް ސްޓޭންޑަޑް ކަނޑައެޅުމާއެކު އެމައްސަލައަށް ހައްލު ލިބޭނެ ކަމަށާއި، ގާބިލްކަމާމެދު ސުވާލު އުފައްދާނެ އެއްވެސް ޖާގައެއް ނުލިބޭނެ ކަމަށެވެ.
މިނިސްޓަރު ވިދާޅުވީ އެހެނިހެން ދާއިރާތަކުން ވެސް މިނިމަމް ސްޓޭންޑަޑެއް ކަނޑައަޅަން ޖެހޭ ކަމަށެވެ. ކުރިއަށް އޮތްތަނުގައި މޯލްޑިވްސް ކޮލިފިކޭޝަން އޮތޯރިޓީން ލިބިދީފައިވާ ބާރާއި މަތިކޮށްފައިވާ މަސްއޫލިއްޔަތުގެ ދަށުން އެކަން ކުރެވިގެންދާނެ ކަމަށް އުންމީދު ކުރާ ކަމަށް މިނިސްޓަރު ވިދާޅުވިއެވެ.
ގުރުއާންގެ އިލްމުގެ ތައުލީމީ ޕްރޮގްރާމްތަކުގައި ހުންނަންޖެހޭ މިނިމަމް ސްޓޭންޑަޑް އިޝާރާތް ކުރައްވައި މިނިސްޓަރު ވިދާޅުވީ އެއީ ލިބުނު ކުރިއެރުމެއް ކަމަށާއި، ކުރިއަށް އޮތްތަނުގައި ތައުލީމީ ދާއިރާއަށް ރައްޔިތުން ކުރާ އިތުބާރު ބޮޑުވެގެންދާނެ ކަމަށެވެ. އަދި ފެންވަރާއި މެދު އޮންނަ ކަންބޮޑުވުމަށް ހައްލު ލިބޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ބައެއް މީހުން ސިޔާސީ މަގުސަދެއް ހާސިލް ކުރުމަށް ހަގީގަތާއި ހިލާފު ވާހަކަތައް ފަތުރާ ކަމަށެވެ. ނަމަވެސް ތައުލީމީ ހުރިހާ ދާއިރާއެއްގެ ފެންވަރު ނެގެހެއްޓުމަށް ކެނޑިނޭޅި މަސައްކަތް ކުރަމުންދާ ކަމަށެވެ. ޚާއްސަ ގޮތެއްގައި އިސްލާމް ދީނުގެ އިލްމަށް އަހައްމިއްޔަތުކަންދޭ ކަމަށްވެސް ހަޔަރ އެޑިއުކޭޝަން މިނިސްޓަރު ވިދާޅުވިއެވެ.
