ކޮވިޑް ކޭސްތަކެއް ފެނުމުން މާފުށި ޖަލު ކުއްލި ހާލަތަށް

ކ.މާފުށީ ޖަލުުން ކޮވިޑް ކޭސްތަކެއް ފެނި ޖަލު ކުއްލި ހާލަތަށް ގެނައުމަށް ނިންމައިފިއެވެ.

މޯލްޑިވްސް ކަރެކްޝަނަލް ސަރވިސްއިން ބުނީ ގައިދީންތަކަކާއި އޮފިސަރުންތަކެއް ކޮވިޑަށް ޕޮޒިޓިވްވެ، އެ ޖަލު ކުއްލި ހާލަތަށް ގެނައުމަށް ނިންމާފައިވާ ކަމަށެވެ. އެގޮތުން ކޮވިޑުގެ އަލާމާތްތައް ހުރެގެން މިހާތަނަށް ނެގި ސާމްޕަލްތަކުން 7 އޮފިސަރަކާއި 4 ގައިދީއަކު ޕޮޒިޓިވް ވެފައިވާ ކަމަށެވެ. އަދި އެ ހާލަތާ ގުޅިގެން އެޗްޕީއޭގެ ގައިޑްލައިންތަކާ އެއްގޮތަށް ކަރެކްޝަނުން ކަނޑައަޅާފައިވާ އުސޫލުތަކުގެ ދަށުން ފިޔަވަޅު އަޅުމަށް ހުކުރު ދުވަހުގެ ހަވީރު 4:00 އިން ފެށިގެން މާފުށީ ޖަލު ކުއްލި ހާތަލަށް ގެނައުމަށް ނިންމާފައިވާ ކަމަށެވެ.

ޖަލު އާންމު ހާލަތަށް ގެނެވެންދެން ރައްކާތެރިކަމުގެ ފިޔަވަޅެއްގެ ގޮތުން ގައިދީންނާއި ބަންދުކޮށްފައިވާ މީހުންނަށް އާއިލީ ބައްދަލުވުންތަކާއި ވަކީލު ބައްދަލުވުންތަކުގެ އިތުރުން ކޯޓު އަޑުއެހުންތައް ކުރިއަށް ގެންދިއުމަށް ނިންމާފައި ވަނީ އޮންލައިންކޮށެވެެ.

މީގެ ކުރިންވެސް ޖަލުތަކުގައި ހާލަތު ގޯސްވެ 522 މީހުން ޕޮޒިޓިވްވެ، 17 ހައިރިސްކް ގައިދީން ވަގުތީ ގޮތުން ގޭބަންދަށް ބަދަލުކުރަން ޖެހުނެވެ. މިގޮތުން އެމްއެމްޕީއާރުސީ ޚިޔާނާތުގެ މައްސަލައިގައި ހުކުމް އިއްވާފައިވާ ކުރީގެ ރައީސް އަބްދުﷲ ޔާމީން ވެސް ވަނީ ގެއަށް ބަދަލުކުރައްވާފައެވެ. 

އެންމެ ފަހުން ޖަލުން ކޮވިޑް ކޭސްތައް ފެނި ކުއްލި ހާލަތަށް ގެންގޮސްފައިވަނީ މިދިޔަ އަހަަރުގެ ސެޕްޓެމްބަރު މަހުއެވެ.