ދިވެހި ޖުމްހޫރިއްޔާގެ ހަޔާތުން އެންމެ ސާފު ތާހިރު 5 އަހަރު

އަންނަ ކޮންމެ ސަރުކާރަކުން ވެސް ތަރައްގީގެ ވާހަކަ ދައްކައެވެ. ބޮޑެތި އުސް އިމާރާތްތަކާއި އެއްރަށް އަނެއް ރަށާއި ގުޅުވާލައި ކަނޑު ހުރަސްކޮށް ފާލަން އެޅުމުގެ ވާހަކައެވެ. ތާރުއެޅި މަގުތަކާއި ބޮޑުހިލައިގެ ތޮށީގެ ވާހަކައެވެ. ނަމަވެސް ހަގީގަތުގައި ރައްޔިތުން ބޭނުންވަނީ ކޮންކަމެއްތޯ އެއްވެސް ބަޔަކު ސުވާލެއް ނުކުރެއެވެ. ކޮންމެ ވެރިކަޔަކުވެސް ދައްކަން ބޭނުންވަނީ އެމީހެއްގެ ހިތުގައި ކުރަހާލާ ތަސްވީރެކެވެ. ކުލަ ޖައްސާނެ ފިހިވެސް ރައްޔިތު މީހާގެ އަތަކަށް ނުދެއެވެ.

ތަރައްގީގެ ނަމުގައި ކޮންމެ ކަމެއް ކުރި ނަމަވެސް، ތަރައްގީއާއި ހަމައަށް ވާސިލްވެވޭނީ ގައިން ތާހިރުވެގެންނެވެ. ދައްކަން މިއުޅެނީ ދޫކޮށްލެވިފައިވާ ސާފުބޯފެނާއި ނަރުދަމާ ނިޒާމުގެ ވާހަކައެވެ. ކިތަންމެ ދިގު ފާލަމެއް އަޅައި ފަޒާގައި ޖެހޭ ވަރުގެ އުސް އިމާރަތެއް އެޅިޔަސް ނިކަމެތި ރައްޔިތު މީހާ ބޭނުންވާ އަސާސީ ކަންތައްތަކެއް ހުރެއެވެ. ކޮންމެ ކަމެއްވެސް ފަށައިގަންނަނީ ގައިންތާހިރުވެގެންނޭ ބުނެވޭއިރު އެކަން ނުކުރެވި ޒަމާންތަކެއް ފާއިތުވެގެން ހިނގައްޖެއެވެ.

ނަމަވެސް ނަޖިސް ފެނުން ފެންވަރައިގެން ތިބި ރައްޔިތުންނަށް އުއްމީދުގެ ހުޅުކޮޅެއް ދިއްލާލަދިނީ މި ސަރުކާރުންނެވެ. ފާލަމަކަށް އަދި އުސް އިމާރާތަކަށް ނުވިޔަސް މިސަރުކާރުގެ އެންމެ ބޮޑު ވައުދަކީ ރައްޔިތު މީހާ ގައިންތާހިރުވެ ނަޖިސް ފެނުން ފެންނުވަރާނެ ދުވަހެއް ގެނައުމެވެ. މުޅި ދުނިޔެ ކޮވިޑުގެ ހާލަތާއި ކުރިމަތިލައި އިގްތިސާދުތައް ފުނޑެމުން ދިޔައިރުވެސް ސަރުކާރުގެ މިއަމާޒު ދުލެއް ނުކުރެއެވެ. ރިޔާސީ ކެމްޕޭނުގައި ރައީސް ސާލިހު ވެވަޑައިގެންނެވި އެންމެ ބޮޑު އެއް ވައުދުފުޅުކަމުގައިވާ ރާއްޖޭގައި ސާފުބޯފެނާއި ނަރުދަމާގެ ނިޒާމު ނެތް ހުރިހާ ރަށެއްގައި އެ ޚިދުމަތް ދެއްވާނެކަމަށް ވިދާޅުވި ވިދާޅުވުން ރަނުންރަނަށް ވަނީ ފުއްދަވައި ދެއްވާފައެވެ.

ރައީސް ސާލިހު ވިދާޅުވެފައިވަނީ ތަރައްގީގެ ވާހަކަ ދައްކަން ފަށަންވާނީވެސް ގައިންތާހިރުވެ ތިބެގެން ކަމަށެވެ. މިހިނގާ ރިޔާސީ ދައުރަކީ ދިވެހި ޖުމްހޫރިއްޔާގެ ހަޔާތުން އައި އެންމެ ސާފުތާހިރު ފަސް އަހަރު ކަމުގައި ވިދާޅުވީވެސް އެމަނިކުފާނެވެ. ރިޔާސީ މި ދައުރުގައި، ރާއްޖޭގެ ހުރިހާ ރަށެއްގައި ފެނާއި ނަރުދަމާ އަޅާނެކަމަށް ވިދާޅުވީވެސް ހަމަ އެމަނިކުފާނެވެ.

ސާފުތާހިރުކަމަކީ އީމާންކަމުގެ އެއްބައި ކަމުގައި ބުނާ ފިލާވަޅު އަދިވެސް އެމަނިކުފާނުގެ ހަނދާންފުޅުގައި އެބަހުރި ކަމަށާއި އެއީ އޭގެ ޒާތުގައި މައުނަވީ ވާޖިބެއް ކަމަށް ވެސް ރައީސް ސާލިހު ވިދާޅުވެއެވެ. މިކަންކަން ނުވާނެކަމަށް ބުނެ ފާޑުކިޔުމާއި އަދި އިތުރަށް ވިސްނާލުމުގެ ނަސޭހަތާއި މަޝްވަރާ، އެތައް ގޮތަކުން އެމަނިކުފާނަށް ލިބިވަޑައިގެންނެވި ނަމަވެސް، ވާޖިބަކަށް ވައުދުނުވެ ހުންނަން އެމަނިކުފާނުގެ ޒަމީރު ޖާގަ ނުދޭ ކަމަށްވެސް ވިދާޅުވެއެވެ.

ފެނާއި ނަރުދަމާ ނިޒާމް ނެތް ރަށްރަށުގައި އެޚިދުމަތް ގާއިމްކުރެއްވުމުގެ ވައުދުފުޅާއެކު ދިވެހިރާއްޖެ ފުރޮޅި އިންގިލާބު ވެގެން އެދަނީ، ތަރައްގީގެ މުޅިން އެހެން މަރުހަލާއަކަށެވެ. ސައިޒުން ކުޑަޔަސް، ނުވަތަ ބޮޑަސް، އަދި މީހުން މަދަސް، ނޫނީ ގިނަޔަސް، ސަރުކާރުން މިކަމުގައި އެއްވެސް ރަށެއް ތަފާތު ނުކުރެއެވެ. ފެނާއި ނަރުދަމާގެ މަސައްކަތް ހަވާލުނުކުރެވޭ އެއްވެސް ރަށެއް މިހާރަކު ނެތެވެ. އެހެންވީމާ ވެފައިވެސް ދެންވާން އޮންނާނީ ހަމައެންމެ ގޮތެކެވެ. އެއީ ކަމަށް ބޭނުންވާ އިމާރާތްތައް އުފުލި، މެޝިނަރީ ގެނެވި، ހޮޅިތައް ވަޅުލެވި، ތަރައްގީގެ ވާހަކަ ދައްކަން ފަށާ ހިސާބުގައި ގައިންތާހިރުވުމުގެ ފެން މުޅި ރާއްޖޭގައި އެކުއެކީގައި ހިނގާން ފެށުމެވެ.

ވޭތުވެދިޔަތަނުގައި އައި ހުރިހާ ސަރުކާރަކަށް ނިންމިފައިވަނީ 69 ރަށުގެ ނަރުދަމާއާއި 37 ރަށުގެ ފެނުގެ ނިޒާމެވެ. 118 ރަށުގެ ނަރުދަމާ އޮތީ ނާޅައެވެ. 150 ރަށުގެ ފެނުގެ ނިޒާމް އޮތީ ގާއިމް ނުކުރެވިއެވެ. ނަމަވެސް މި ސަރުކާރުން އެކަމެއް ދުލެއް ނުކުރިއެވެ. ސަބަބަކީ ހަމަ ހަގީގަތުގައިވެސް ތަރައްގީގެ ވާހަކަ ދައްކަން ފަށަން ޖެހޭނީ ގައިން ތާހިރުވެ ތިބެގެން ކަމަށްވާތީއެވެ.

ސުވާލަކީ މުޅި ދުނިޔެ ނުދެކޭފަދަ ބަލިމަޑުކަމެއް ނައިސް އިގްތިސާދު އޭގެ ތަންމިނުގައި ހުޅުވި ބޭރުފައިސާ ބޯކޮށް ލިބި ރާއްޖޭގެ ރަށްރަށް ވިއްކާލައިގެން ލާރި ހޯދި އިރުވެސް ހަމަ މިކަންކަމުގެ މަތިން ހަނދާން ނެތީތޯއެވެ. ރައްޔިތުން ކޮންމެ 100 ރުފިޔާއަކަށް 6 ރުފިޔާ ޓެކްސްގެ ގޮތުގައި ދައްކަމުން ދިޔައިރު، އެ ފައިސާއިން ރައްޔިތުންނަށް ތާހިރު ދިރިއުޅުމެއް ނުދެއްކުނީ ކީއްވެގެންތޯއެވެ. އެސުވާލު ރައްޔިތުން އެބަކުރެއެވެ. ކުރާނެއެވެ. ކުރިންވެސް ދެންނެވި ގޮތަށް އެއިރު ވެރިން ނުކުންނެވީ އަމިއްލަ ތަސްވީރެއް ހިއްޕަވައިގެން އަމިއްލައަށް ކުލަޖައްސަވާނެ ފިހިގަނޑަކާއެކުގައެވެ. ރައްޔިތުންނަށް ތިބެން ޖެހުނީ ކުޅި ބަލާށެވެ.