ކުޅުދުއްފުށި ސިޓީއިން އިތުރު 27 މީހަކު ކޮވިޑްއަށް ޕޮޒިޓިވްވެ, އެކްޓިވް ކޭހުގެ އަދަދު 102ށް އަރައިފިއެވެ.
އެ ސިޓީން ބުރާސްފަތިދުވަހު ޕޮޒިޓިވްވި މީހުންގެތެރޭގައި، ކޮންޓެކްޓް ޓްރޭސިންގެތެރެއިން ފާހަގަކުރެވުނު މީހުންނާއި، ފްލޫ ކްލިނިކަށް ދެއްކި މީހުންނާއި މާލެ ސިޓީން އެ ސިޓީއަށް ދަތުރުކުރި މީހުން ހިމެނެއެވެ. ބުރާސްފަތި ދުވަހު ނަތީޖާ ލިބުނު ސާމްޕަލްތަކަކީ މި މަހުގެ 11 ވަނަ ދުވަހުގެ ސާމްޕަލްތަކެއް ކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެއެވެ.
ކުޅުދުއްފުށިން ކޮވިޑް ކޭހެއް ނުފެނި ދުވަސްކޮޅެއް ދިއުމަށްފަހު އެންމެ ފުރަތަމަ ކޮވިޑް ކޭހެއް ފެނިފައިވަނީ މިދިޔަ ޑިސެމްބަރ މަހުގެ 20 ވަނަ ދުވަހުއެވެ.
މިވަގުތު ކުޅުދުއްފުށީގެ އިތުރުން ހދ.ގެ 7 ރަށެއްގައި ކޮވިޑް ކޭސްތައް ދަނީ ފެތުރެމުންނެވެ. ކުޅުދުއްފުށި ފިޔަވާ އެންމެ ގިނަ ކޭސް ފެނިފައިވަނީ ނޮޅިވަރަންފަރުންނެވެ.
