ކުޑަކުދިން ގްރޫމްކޮށް ޓެރަރިޒަމްގެ އަމަލު ހިންގަން މަސައްކަތް ކުރޭ - ފުލުހުން
ކުޑަކުދިން ގްރޫމްކޮށްގެން ކުށްތަކަށް އަރައިގަތުން އިތުރުވަމުންދޭ
ކުޑަކުދިންނަށް ރައްކާތެރިކަން ކަށަވަރުކޮށްދިނުމަކީ މުޅި ދައުލަތުގެ ޒިންމާއެއް
ކުޑަކުދިން ގްރޫމްކޮށްގެން ޓެރަރިޒަމްގެ އަމަލުތަކެއް ކުރުމަށް މަސައްކަތް ކޮށްފައިވާކަން ފާހަގަކުރެވޭ ކަމަށް ފުލުހުން ބުނެފިއެވެ.
ބުދަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމްގައި ސަބް އިންސްޕެކްޓަރ އޮފް ޕޮލިސް އަހުމަދު ފާރިޝް ވިދާޅުވީ ކުޑަކުދިން ގްރޫމްކޮށްގެން ކުށްތަކަށް އަރައިގަތުން އިތުރުވަމުންދާ ކަމަށާއި، ޓެރަރިޒަމް ފަދަ ބޮޑެތި ކުށްތައް ކުރުމުގެ ކަންކަމުގައި ވެސް ކުޑަކުދިން ބޭނުންކުރާކަން ފާހަގަކުރެވިފައިވާ ކަމަށެވެ. ނަމަވެސް ޖުމްލަ ގޮތެއްގައި ކުޑަކުދިން ބޭނުންކޮށްގެން އެޒާތުގެ ބޮޑެތި ކަންކަން ކުރުވާފައިނުވާ ކަމަށް އޭނާ ވިދާޅުވިއެވެ. އަދި ވިދާޅުވީ ކުޑަކުދިންނާއި ގުޅުންހުރި މިފަދަ މައްސަލަތަކަށް ޚާއްސަ ސަމާލުކަމެއްދޭ ކަމަށާއި، ވަރަށް ގާތުން ބަލަމުންދާ ކަމަށެވެ.
ކުޑަކުދިންނަށް ރައްކާތެރިކަން ކަށަވަރުކޮށްދިނުމަކީ މުޅި ދައުލަތުގެ ޒިންމާއެއްކަން ފާހަގަކުރައްވައި ފާރިޝް ވިދާޅުވީ މައްސަލައެއްގައި ކުޑަކުއްޖަކީ ވިޓްނަސް ކަމުގައިވާނަމަ ވިޓްނަސް ޕްރޮޓެކްޝަން ދިނުމަކީ ދައުލަތުގެ ހުރިހާ މުއައްސަސާތަކުގެ ގުޅިގެން ކުރަމުން އަންނަ ކަމަށެއް ކަމަށާއި، އެފަދަ ކަންކަން ކަށަވަރުކުރުމަށް ވެސް މަސައްކަތް ކުރަމުންދާ ކަމަށެވެ.
މީގެ އިތުރުން ފާރިޝް ވިދާޅުވީ މައްސަލައެއްގައި ކުޑަކުއްޖަކު ހައްޔަރުކުރަނީ އެނޫން އެއްވެސް ގޮތެއް ނެތުމުން ކަަމަށެވެ. ހައްޔަރު ކުރުމުގެ ކުރިން ކުއްޖާގެ އުމުރުގެ އިތުރުން މައްސަލާގެ ކުޑަ ބޮޑުމިނަށް ބަލާ ކަމަށް އޭނާ ވިދާޅުވިއެވެ.
ފާރިޝް ވިދާޅުވީ ހައްޔަރުކުރާ ކުޑަކުދިން ބަލަހައްޓަމުންދަނީ ޚާއްސަ އިންތިޒާމްގެ ތެރެއިން ކަމަށާއި، އެކުދިން ގެންގުޅެނީ ބޮޑެތި މީހުންނާއި ވަކިން ދެޖިންސް ވަކިން ކަމަށެވެ. އަދި ގިނަ ފަހަރަށް ޝަރީއަތުގެ މަރުހަލާގައި ފުލުހުންގެ ބަންދުން ދޫވެ، ކަރެކްޝަންސްގެ ބެލުމުގެ ދަށަށްދާ ކަމަށާއި، އެކުދިންނަށް ލިބެންޖެހޭ ރައްކާތެރިކަމާއެކު، ތައުލީމާއި އެހެނިހެން ވެސް ލިބެންޖެހޭ ހައްގުތައް ލިބޭނެ ކަމަށް ފާރިޝް ވިދާޅުވިއެވެ.
