ފުލުހުން ހިންގި އޮޕަރޭޝަނެއްގައި އަތުލައިގެންފައިވާ 100 ކިލޯގެ ޑްރަގް މައްސަލައިގައި ހިމެނޭ މީހުންގެ މައްޗަށް އުފުލާފައިވާ ދައުވާތަކުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި 8 މީހެއްގެ ވަނަވަރު ހާމަ ކުރި ނަމަވެސް، އިތުރު ބައެއް މީހުންވެސް ފުލުހުންގެ ބެލުމުގެ ދަށަށް ގެންދިޔައެވެ. އެގޮތުން 6 ދިވެހިންނާއި، ދެ ބިދޭސީއެއްގެ ވަނަވަރު ފުލުހުން ހާމަކުރިއެވެ. މުޅި މި މައްސަލައާއި ގުޅިގެން 10 މީހަކު ފުލުހުންގެ ބެލުމުގެ ދަށަށް ގެންދިޔައެވެ.

1- ހދ. ކުމުންދޫ، ޑިއާފުރެންޑް، އިބްރާހީމް ސިނާން

2- ގއ. ކޮލަމާފުށި، ސޯސަންގެ، އިބްރާހީމް ޒައިދު ހަބީބު

3- ކ މާފުށި ސްވީޓްމީޑް އަހުމަދު މާހިރު

4- ނ. ވެލިދޫ، ބީޗްހެވެން، ޖުމާން މުސްތަފާ

5- ލ. ކަލައިދޫ، ޖަނަވަރީމާގެ، މުހައްމަދު އަހްމަދު

6- ދ. ބަނޑިދޫ، ޕޮލާރިސް، މުހައްމަދު ހުސައިން

7- ޑީއެމް މޮބިން (ބަންގްލަދޭޝް)

8- އެމްޑީ ރަފީޤުލް އިސްލާމް (ބަންގްލަދޭޝް)

9- ގއ ދެެއްވަދޫ ދޭލިޔާގޭ މިދުހަތު އިބްރާހިމް

10- މ ކޮޅުފުށި ޒަހީރާ މަންޒިލް، އަހުމަދު ޝިރުހާން ޝަމީމް

މި މައްސަލައިގައި ބުދަ ދުވަހު ފުރަތަމަ ކުރިއަށް ގެންގޮސްފައިވަނީ އެ 10 މީހުންގެ ތެރެއިން 8 މީހެއްގެ މައްސަލައެވެ. އެއީ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައިވާ 8 މީހުންނެވެ. އެގޮތުން މިދުހަތު އިބްރާހިމްއާއި އަހުމަދު ޝިރުހާން ޝަމީމް ފިޔަވައި ދެން ތިބި އެންމެންގެ މައްޗަށް ވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައެވެ.

އަދި މުޙައްމަދު ހުސައިންގެ މައްޗަށް ޑައިމޯފިން ބޭނުން ކުރުމުގެ ކުށުގެ އިތުރު ދައުވާއެއްވެސް އުފުލާފައިވާއިރު، މިދުހަތާއި ޝިރުހާންގެ މައްޗަށް މި މައްސަލައިގައި އުފުލާފައިވަނީ ކެނެބިސް ބޭނުން ކުރުމުގެ ކުށުގެ ދައުވާއެވެ. އެ ދައުވާ އެ ދެމީހުންގެ އިތުރުން މި މައްސަލައިގައި ހިމެނޭ ޖުމާން މުސްތަފާއާއި، ރަފީޤުލް އިސްލާމްއާއި، މުޙައްމަދު އަހުމަދުގެ މައްޗަށްވެސް އުފުލާފައިވެއެވެ. ކެނެބިސް ބޭނުން ކުރުމުގެ ކުށުގެ ދައުވާގެ އަޑުއެހުންވެސް ކުރިއަށް ގެންގޮސްފައިވަނީ ވަކިންނެވެ.

މި މައްސަލައިގައި ބުދަ ދުވަހު ކުރިއަށް ދިޔަ އަޑުއެހުމުގައި ދައުވާލިބޭ މީހުންގެ ތެރެއިން ޖުމާން ހާޒިރުވެފައެއް ނުވެއެވެ. އެގޮތުން ޗިޓް ލިބުމަށްފަހުވެސް ހާޒިރުވެފައިނުވާތީ މައްސަލަ ބައްލަވާ ގާޒީ ދީބާނާޒް ފަހުމީ ވަނީ މަޤްބޫލު ސަބަބެއް އޮތްތޯ ބެއްލެވުމަށްފަހު ފިޔަވަޅު އަޅުއްވާނެކަމަށް ވިދާޅުވެފައެވެ.

އަދި ބާކީ ތިބި މީހުންގެ ބައި ކުރިއަށް ގެންދަވާފައިވާއިރު، އެންމެންވެސް ވަނީ ވަކީލަކު އަމިއްލައަށް އައްޔަނު ކުރުމަށް ފުރުސަތަކަށް އެދިފައެވެ. އެއާއެކު މައްސަލަ ބައްލަވާ ގާޒީ ވަނީ ވަކީލަކު އައްޔަނު ކުރުމަށް ފުރުސަތެއް ދެއްވައި، 13 ފެބްރުއަރީ 2022ށް މައްސަލައިގެ އަޑުއެހުމެއް ތާވަލު ކުރައްވާފައެވެ. ގާޒީ ވިދާޅުވީ އެ ދުވަހުގެ އަޑުއެހުމުގައި ދައުވާ އިއްވައި ޖަވާބުދާރީވުން އޮންނާނެ ކަމަށެވެ.

މި އަޑުއެހުމުގައި ޑީއެމް މޮބިންއާއި ރަފީޤުލް އިސްލާމްވެސް ވަނީ އެމީހުންގެ ޕާސްޕޯޓު ނަންބަރު ނޭނގޭކަމަށް ބުނެފައެވެ. އެ މީހުންގެ ބަންދުގެ މުއްދަތު 21 ޑިސެމްބަރަށް ހަމަވާއިރު، ދެން އޮންނަ އިބްތިދާއީ އަޑުއެހުމުގެ ކުރިން ބަންދު މުރާޖައާ އަޑޫއެހުމެއް ބާއްވަވާނެކަން ގާޒީ ފާހަގަ ކުރައްވާފައިވެއެވެ.

މި މީހުން ހައްޔަރުކުރި އޮޕަރޭޝަން ކުރިއަށް ގެންދިޔައީ، މިދިޔަ އަހަރުގެ އޮކްޓޯބަރ މަހުގެ 13 ވަނަ ދުވަހުއެވެ. އެ އޮޕރޭޝަންގައި ރާއްޖޭގެ ބައެއް ފަޅު ރަށްތަކާއި، ހުޅުމާލެއާއި މާލެ އާއި މާލޭގެ ބައެއް ގޭގޭގެ އިތުރުން ސަފާރީއަކާއި ލޯންޗެއް ބަލައި ފާސްކުރިއެވެ. 100 ކިލޯއަށްވުރެގިނަ މަސްތުވާތަކެތި ހޯދާފައިވަނީ ފަޅުރަށެއް ކަމަށްވާ އދ. ބޮޑުކާށިހުރާއިންނެވެ. އަދި މިވަގުތުވެސް ދައުވާލިބޭ ގިނަ މީހުން ތިބީ ބަންދުގައެއް ނޫނެވެ.