އަރަބިއްޔާ ދަރިވަރުންގެ ކިޔެވުންވެސް އަންނަ އާދިއްތަ ދުވަހު ފެށޭނެ: އެޑިޔުކޭޝަން

އަރަބިއްޔާ ސްކޫލުގެ ދަރިވަރުންގެ ކިޔެވުން ކުރިއަށް ގެންދިއުމަށް ނިންމާފައިވާ ވަގުތީ އިމާރާތުގެ މަސައްކަތް ބާރު ސްޕީޑްގައި ކުރިއަށްދާ ކަމަށާއި، އަންނަ އާދިއްތަ ދުވަހު ކިޔެވުން ފެށޭނެ ކަމަށް އެޑިޔުކޭޝަން މިނިސްޓްރީން ބުނެފިއެވެ.

އަރަބިއްޔާގެ ދަރިވަރުންނަށް ވަގުތީ އިމާރާތެއްގެ ގޮތުގައި ހަމަޖައްސާފައިވަނީ ފޮރިން މިނިސްޓްރީގެ ވަގުތީ އިމާރާތެވެ. އަދި މަސައްކަތް ކުރިއަށްދާ ގޮތް ބެލުމަށް ހޯމަ ދުވަހުގެ ވަގުތެއްގައި އެއިމާރާތަށް އެޑިއުކޭޝަން މިނިސްޓްރީން ޒިޔާރަތްކޮށް ފައިވެއެވެ.

އެޑިޔުކޭޝަން މިނިސްޓްރީން ބުނީ ތަވާލްއާ އެއްގޮތަށް މަސައްކަތް ކުރިއަށްދާ ކަމަށާއި، ޖެނުއަރީ 16 ވާ އާދިއްތަ ދުވަހު ކިޔެވުން ފެށޭނެ ކަމަށެވެ.

ސަރުކާރު ހިއްސާވާ ވަރަށް ގިނަ ކުންފުނިތަކުގެ އެހީތެރިކަމާ އެކު ވަގުތީ އިމާރާތުގެ މަސައްކަތް ކުރަނީ ސިފައިންނެވެ. ކުޑަ ނޯޓިސްއާއެކު މަސައްކަތް ފެށި ނަމަވެސް މިހާރު ބޮޑު ބައެއް ނިމިފައިވާ ކަމަށް މިނިސްޓްރީން ބުނެއެވެ.

ފޮރިން މިނިސްޓްރީގެ ވަގުތީ އިމާރާތް އަރަބިއްޔާ ސްކޫލުގެ ދަރިވަރުންނަށް ހަމަޖައްސާފައިވަނީ އަރަބިއްޔާގެ ދަރިވަރުން އިއްޒުއްދީން ސްކޫލަށް ބަދަލުކުރަން ނިންމާފައިވާކަން އެޑިއުކޭޝަން މިނިސްޓްރީން 16 ޑިސެންބަރު 2021ގައި އިއުލާން ކުރުމަށްފަހުއެވެ. މިނިންމުމާއެކު މައްސަލަ ހޫނުވެ ޑިސެންބަރުމަހު 17 ވީ ހުކުރު ދުވަހުގެ ހަވީރު އަރަބިއްޔާ ސްކޫލްދޮށަށް އެއްވެ ބެލެނިވެރިން މުޒާހަރާކޮށްފައިވެއެވެ.

މީގެ އިތުރުން އެ ސްކޫލްގެ ޕޭރެންޓް ޓީޗަރސް އެސޯސިއޭޝަން (ޕީޓީއޭ)އިން ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ ބައްދަލު ކުރައްވައި، މަޝްވަރާ ކުރައްވާފައިވެއެވެ. މި ބައްދަލުކުރެއްވުމަށްފަހު 21 ޑިސެންބަރު 2021 ގައި ރައީސް ނިންމަވާފައިވަނީ އަރަބިއްޔާ ސްކޫލު ވަގުތީ ގޮތުން ފޮރިން މިނިސްޓްރީގެ ކުރީގެ ވަގުތީ އިމާރާތަށް ބަދަލު ކުރެއްވުމަށެވެ. އަދި މި އިމާރާތް ހަވާލުކުރެވޭއިރު، ކްލާސްރޫމާއި އަދި ސްކޫލު ހިންގޭނެވަރަށް އެ އިމާރާތުގެ ކަންކަން އިންތިޒާމް ކޮށްދެއްވުމަށް ރައީސް ވަނީ ނިންމަވާފައެވެ.

އަރަބިއްޔާ ސްކޫލް އެންމެ ފުރަަތަމަ ހިންގީ މަޖީދީމަގުގައި ޓާޓާ ފްލެޓްތައް އިމާރާތްކޮށްފައިވާ ބިމުގައެވެ. އެ ތަނުން ދެން ބަދަލުކުރީ، އިއްޒުއްދީން ސްކޫލު ހިންގާ، ކުރީގެެ އެމްއީއެސް އިމާރާތަށެވެ. އެ އިމާރާތުން ދެން ބަދަލުވީ މިހާރު ބޭނުންކުރާ އިމާރާތަށެވެ. ނަމަވެސް އެއިމާރާތު ބައެއް ތަންތަނުން ވަނީ ވަރަށް ބޮޑަށް ކަނޑައިގެން ގޮސް ގެއްލުންތައް ލިބިފައެވެ.

އަރަބިއްޔާ ސްކޫލް ހުންނަ އިމާރާތަށް ލިބިފައިވާ ގެއްލުންތަކާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނުގައި ބުނެފައިވަނީ، އެ ސްކޫލްގެ އިމާރާތަށް މިވަގުތު ދިމާވެގެން އުޅޭ މައްސަލަ ބަލައި ހައްލުކުރުމަށް އިތުރު ވަގުތު ބޭނުންވާ ކަމަށެވެ. އެ ސްކޫލްގެ އިމާރާތުގެ ހާލަތު މިވަގުތު ހުރިގޮތުން އެތަނުގައި ދަރިވަރުންނަށް ތައުލީމު ފޯރުކޮށްދިނުމަކީ އެންމެ ރައްކާތެރިކަމެއްނޫން ކަމަށާއި، ޢިމާރާތަށް ލިބިފައިވާ ގެއްލުންތަކަށް އަވަސް ހައްލެއް ހޯދުމަށްޓަކައި މިނިސްޓްރީން މަސައްކަތް ކުރަމުންދާ ކަމަށެވެ. މިކަމަށް ހައްލެއް ހޯދެންދެން ވެސް ދަރިވަރުންގެ ކިޔެވުން މެދުނުކެނޑި ކުރިއަށް ގެންދަންޖެހޭ ކަމަށާއި، 700ށްވުރެ ގިނަ ދަރިވަރުންގެ ކިޔެވުން މެދުނުކެނޑި ކުރިއަށް ގެންދެވޭނީ ސްކޫލެއް ހިންގުމަށް އިމާރާތްކޮށްފައި ހުރިތަނެއްގައި ކަމަށް މިނިސްޓްރީން ބުނެފައިވެއެވެ. އަދި ވަސީލަތްތައްވެސް ހުންނަންޖެހޭ ކަމަށެވެ.