ރާއްޖޭގައި މި ދުވަސްވަރު ކޮވިޑް-19 ބަލިޖެހޭ މީހުންގެ ޢަދަދު އިތުރުވަމުންދާތީ ކޮވިޑް-19ގެ ޙާލަތާ ގުޅޭގޮތުން ވަޒީރުންގެ މަޖިލީހުގައި މިއަދު މަޝްވަރާކުރައްވައިފިއެވެ.

މިއަދު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި ކޮވިޑް-19ގެ ޙާލަތާ ގުޅޭގޮތުން މަޝްވަރާކުރައްވަމުން ވަޒީރުންގެ މަޖިލީހުގެ މެންބަރުން ވަނީ، ކޮވިޑް-19 ބަލި ހުރިކަން ދެނެގަތުމަށް ހަދަންޖެހޭ ޓެސްޓް އާންމުންނަށް ފަސޭހަކަމާއެކު ހެދޭނެ ގޮތްތައް ހަމަޖެއްސުމަށް ކުރެވެންހުރި ކަންކަމާ ގުޅޭގޮތުން މަޝްވަރާކުރައްވާފައެވެ. އަދި މީގެ އިތުރުން ކޯވިޑް-19 ވެކްސިންގެ ބޫސްޓަރ ޑޯޒް ޖެހުމުގެ ކަންކަން ފުޅާކުރާއިރު، ކުރު މުއްދަތެއްގެ ތެރޭގައި ވީހާވެސް ގިނަ ފަރާތްތަކަށް ވެކްސިން ޖެހޭނެ އިންތިޒާމުތައް، އާންމުންނަށް އެންމެ ލުއިފަސޭހަވާނެ ގޮތަކަށް ހަމަޖެއްސުމާ ގުޅޭގޮތުންވެސް މިއަދުގެ ވަޒީރުންގެ މަޖިލީހުގައި މެންބަރުން މަޝްވަރާކުރެއްވިއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްއީއޯސީގެ ތަރުޖަމާނު ޑރ. ނަޒްލާ ވިދާޅުވީ, ރާއްޖެއިން މިހާތަނަށް 8 ދިވެހިންނާއި 19 ފަތުރުވެރިން އޮމިކްރޯންއަށް ޕޮޒިޓިވްވެފައިވާކަމަށެވެ. އަދި ކުރިއަށް އޮތް ދުވަސްތަކުގައި ޑެލްޓާ ވޭރިއެންޓަށް ވުރެ އޮމިކްރޯންގެ ކޭސްތައް ގިނަވާނެ ކަމަށާއި، މިދިޔަ ޑެލްޓާ ވޭވްގަ ކޭސްތައް ގިނައިން ފެނުނީ މާލޭ ސަރަައްދުން ނަމަވެސް މިފަހަރު މުޅި ރާއްޖެއިން ކޭސްތައް ފެންނާނެކަމަށް ބެލެވޭކަމަށް ނަޒްލާ ވިދާޅުވިއެވެ.

ހެލްތު މިނިސްޓްރީގެ ސްޓޭޓް މިނިސްޓަރު ޑރ. ޝާހު އަބްދުﷲ މާހިރު ވިދާޅުވީ، ވެކްސިން ލިބިފައިވާ ނަމަވެސް ވެކްސިން ޖެހުމަށް ބޭނުންވާ އެހެނިހެން ސާމާނު ލިބޭނީ ހަފްތާއެއްހާ ދުވަހުގެ ތެރޭގައި ކަމަށެވެ. އޭނާ ވިދާޅުވީ އެއްލައްކަ ޑޯޒްގެ ވެކްސިން އެބަހުރި ކަމަށެވެ. މީގެ އިތުރުން ބޫސްޓަރ ޑޯޒް ޖެހުމުގެ ކެމްޕޭން ހަލުވި މިނެއްގައި މި މަހުގެ މެދެއްހާ ހިސާބުގައި ކުރިއަށް ގެންދާނެ ކަމަށް ޝާހް ވިދާޅުވިއެވެ.