އެންސީޓީސީ ސަލްމާން މިސްކިތަށް ބަދަލުކުރަން އުޅޭކަމަށް މުއިއްޒު ދެއްކެވި ވާހަކަތައް ދޮގުކޮށްފި

ނޭޝަނަލް ކައުންޓަރ ޓެރަރިޒަމް ސެންޓަރު (އެންސީޓީސީ)، ކިންގް ސަލްމާން މިސްކިތަށް ބަދަލު ކުރަން އުޅޭކަމަށް މާލޭ ސިޓީގެ މޭޔަރ ޑރ މުހައްމަދު މުއިއްޒު ދެއްކެވި ވާހަކަތައް އެންސީޓީސީން ދޮގު ކޮށްފިއެވެ.

ސަލްމާން މިސްކިތުގައި ކީރިތި ގުރުއާނާބެހޭ މަރުކަޒަށް ޚާއްސަކޮށްފައިވާ ޖާގައަށް އެންސީޓީސީ ބަދަލުކުރަން އުޅޭކަމުގެ ރަސްމީ މައުލޫމާތު ކައުންސިލަށް ލިބިފައިވާކަމަށް ޑރ މުއިއްޒު ވަނީ ވިދާޅުވެފައެވެ.

އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން އެންސީޓީސީގެ ޑިރެކްޓަރ ޖެނެރަލް ޒަކަރިއްޔާ މަންސޫރު ވިދާޅުވީ، އެއީ ދޮގު ވާހަކައެއްކަމަށެވެ.

ޒަކަރިއްޔާ ވިދާޅުވީ، އެންސީޓީސީއާއެކު އެކަމާއި ގުޅޭ އެއްވެސް މަޝްވަރާއެއްވެސް އަދި މަސައްކަތެއްވެސް ސަރުކާރުގެ އެއްވެސް ލެވެލްއެއްގައި ކުރެވެމުން ނުދާކަމަށެވެ.

އޭގެ އިތުރުން، އެންސީޓީސީގެ އޮޕަރޭޝަންތަކަކީ މިސްކިތެއްފަދަ ތަނެއްގައި ކުރިއަށް ގެންދަން ފަސޭހަ އޮޕަރޭޝަންތަކެއްވެސް ނޫންކަމަށް ޒަކަރިއްޔާ ވިދާޅުވިއެވެ.

ޒަކަރިއްޔާ އެހެން ވިދާޅުވެފައިވާއިރު، ސަލްމާން މިސްކިތުގެ ތެރެއަށް ކައުންޓަރ ޓެރަރިޒަމް ސެންޓަރު ބަދަލު ކުރަން އުޅެނީ ވަރަށް ނުބައި މަގުސަދެއްގައިކަމަށް ގަބޫލު ކުރެއްވޭ ކަމަށާއި، އެކަމުގެ ސަބަބުން އިސްލާމީ ތައުލީމާއި އަދި އިސްލާމީ ހަލޯރަތާ ނުގުޅޭ އެތައް ކަމެއް އެތަނުގައި ހިންގާނެ ކަމަށް މުއިއްޒު ވިދާޅުވެއެވެ.