130 ކިލޯ ޑްރަގް މައްސަލައިގައި އިސްކޮށް އުޅުނު އަހުމަދު މޫސާ ބުނަނީ އެއީ އެކަމަށް ބޭނުންކުރި ދޯންޏެއްކަން ނޭނގޭކަމަށް
މި މައްސަލައިގައި އިސްކޮށް އުޅުނު ކަމުގެ ތުހުމަތު 2 މީހެއްގެ މައްޗަށް ކުރެވޭ
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލާގައި އިސްކޮށް އުޅުނުކަމުގެ ތުހުމަތުވާ 2 މީހުން
ދިވެހިންގެ ބަޔަކު ބޭރު ބަޔަކާ ގުޅިގެން ރާއްޖެއަށް އެތެެރެކުރި ކަމަށް ތުހުމަތު ކުރެވޭ 130 ކިލޯގެ މަސްތުވާތަކެތީގެ މައްސަލަައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އަންގާރަ ދުވަހު ކުރިއަށް ގެންގޮސްފައިވަނީ މި މައްސަލަައިގައި ދައުލަތުން ދައުވާކޮށްފައިވާ މީހުންގެ ތެރެއިން މި މައްސަލައިގައި އިސްކޮށް އުޅުނު ކަމުގެ ތުހުމަތުވާ 2 މީހުންގެ މައްޗަށް ކުރާ ދައުވާގެ އަޑުއެހުމެކެވެ. އެގޮތުން މި މައްސަލައަކީ ޑްރަގް އެންފޯސްމަންޓް ޑިޕާޓްމަންޓާއި ފުލުހުންގެ އިންޓެލިޖެންސް އަދި މެރިން ޕޮލިސް ގުޅިގެން 2020 އޮކްޓޯބަރު 12 ވަނަ ދުވަހު ހިންގި އޮޕަރޭޝަނެއްގެ ތަހުގީގު ނިންމައި ދައުވާކުރަން ފޮނުވި މައްސަލައެކެވެ.
ދިވެހިންގެ ބަޔަކު ބޭރުގެ ބަޔަކާއި ގުޅިގެން ރާއްޖެއަށް ކަނޑުމަގުން ގިނަ އަދަދެއްގެ މަސްތުވާތަކެތި އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ކަނޑުމަތީގައި ހިންގި މި އޮޕަރޭޝަނުގައި މަސްތުވާތަކެތި ރާއްޖެއަށް އެތެރެކުރުމަށް ބޭނުން ކުރި ދޯނި ފުލުހުންގެ ބެލުމުގެ ދަށަށް ގެނެސް ބަލައި ފާސްކޮށްފައިވާއިރު، އެދޯނިން ގިނަ އަދަދެއްގެ މަސްތުވާތަކެތި ފެނިފައިވެއެވެ. އަދި މި އޮޕަރޭޝަނުގައި ހުޅުމާލެއާއި މާލޭގެ ގެތަކެއްވެސް ބަލައި ފާސްކޮށްފައިވެއެވެ. އެގޮތުން ފުލުހުން ބުނެފައިވާ ގޮތުގައި، މިތަކެތި ރާއްޖެއަށް އެތެރެކުރުމުގައި އިސްކޮށް ތިބީ ގއ. ވިލިނގިލި، ލައިޓްހައުސް، ޝަހީބް އިބްރާހިމް (42އ) އާއި ހއ. ހޯރަފުށި، ވައިލެޓްވިލާ، އަހްމަދު މޫސާ (48އ) އެވެ.
މި މައްސަލަ ކުރިއަށް ގެންދަވަނީ އިސްގާޒީ އަހުމަދު ޝަކީލެވެ.
ދައުވާލިބޭ މީހުންގެ ބައި ކުރިއަށް ގެންދިޔައީ ވަކިން:
އަންގާރަ ދުވަހުގެ އަޑުއެހުމުގައި ފުރަތަމަ ވަނީ މި މައްސަލައިގައި ދައުވާލިބޭ އަހުމަދު މޫސާގެ ބައި ކުރިއަށް ގެންގޮސްފައެވެ. ޝަހީބު އިބްރާހިމްގެ ވަކީލު އަޑުއެހުމުގައި ނެތުމުގެ ސަބަބުންނެވެ. އެގޮތުން އެންމެ ފަހުން ބޭއްވި ޝަރީއަތުގެ އަޑުއެހުމުގައި އޭނާއާ ދެކޮޅަށް ހުރި ހެކިތައް ދައުލަތުން ވަނީ ހުށައަޅާފައެވެ. އެއާއެކު އަންގާރަ ދުވަހުގެ އަޑުއެހުމުގައި ވަނީ ދިފާއީ ހެކި ތަފްސީލީ ގޮތެއްގައި ހުށައެޅުމަށް ފުރުސަތު ދެއްވާފައެވެ. އެ ހެކިތައް މީގެ ކުރިން ދިފާއުން ވަނީ ތަފްސީލީ ގޮތެއްގައި ލިއުމުންވެސް ކޯޓަށް ހިއްސާކޮށްފައެވެ. އަދި އެ ހެކިވެރިންގެ މައުލޫމާތު ތަފްސީލާއެކު މި އަޑުއެހުމުގައި ދިފާއީ ވަކީލު ވަނީ ހިއްސާ ކުރައްވާފައެވެ.
ދިފާއީ ހެކިންގެ ތެރޭގައި 130 ކިލޯގެ މަސްތުވާތަކެތީގެ މައްސަލަައިގައި ބޭނުން ކޮށްފައިވާ ދޯންޏަކީ އެކަމަށްޓަކައި ބޭނުންކުރި ދޯންޏެއްކަން ނޭނގޭ ކަން ސާބިތު ކުރުމަށް ހުށައެޅި ހެކިން ހިމެނެއެވެ. އަދި އެއީ ހާލުގައި ޖެހިފައިވާ ދޯންޏެއްކަމަށް މައުލޫމާތު ލިބުމާއެކު އެހީތެރިވެދިނުމަށް އެ ދޯނި ކަފު ޖަހައިގެން ގެންދިއުމަށް އޭނާ އެޑްވާންސް ފައިސާ ނެގިކަން ސާބިތު ކުރުމަށްޓަކައި ހުށައަޅާފައިވާ ޝަފަހީ ހެކިންވެސް ހިމެނެއެވެ. އަދި އެ ދޯންޏަކީ އަސީލް މާހިރުގެ ދޯންޏެއްކަން ސާބިތު ކުރުމަށްވެސް ވަނީ ހެކި ހުށައަޅާފައެވެ. ޖުމުލަ 5 ޝަފަހީ ހެއްކެއް ދިފާއުން ވަނީ ހުށައަޅާފައެވެ.
މި އަޑުއެހުމުގައި ގާޒީ ޝަކީލް ވަނީ މިއީ މަދަނީ މިންގަނޑުން ކުރިއަށް ގެންދެވޭނެ އަޑުއެހުމެއްކަމަށް ކަނޑައަޅުއްވާފައެވެ. އަދި ދައުލަތާއި ދިފާއުންވެސް ޝަރީއަތުގެ ކުރިން ހުށައަޅާ ހުށައެޅުންތަކަށް ފުރުސަތެއް ބޭނުންވާކަން ފާހަގަ ކޮށްފައިވުމާއެކު، ގާޒީ ޝަކީލު ވަނީ 10 ދުވަހުގެ މުއްދަތެއް ދެއްވާފައެވެ.
ގާޒީ ޝަކީލް ވަނީ މި މައްސަލަ ކުރިއަށްގެންދާނެ ގޮތުގެ ތާވަލެއް އެކުލަވާލައްވާފައެވެ. އެގޮތުން ޖެނުއަރީ 24، ޖެނުއަރީ 30، ފެބްރުއަރީ 10، އަދި ފެބްރުއަރީ 27ގައި އަޑުއެހުންތައް ތާވަލް ކޮށްފައިވާކަމަށް ގާޒީ ވިދާޅުވިއެވެ.
ޝަހީބް އިބްރާހީމާއި އަހްމަދު މޫސާގެ އިތުރުން 130 ކިލޯގެ މަސްތުވާތަކެތީގެ މައްސަލައިގައި ކްރިމިނަލް ކޯޓުގައި ދައުވާކޮށްފައިވަނީ، ގއ. ވިލިނގިލި، ދުންފިނިގެ، އަސީލް މާހިރާއި ޅ. ހިންނަވަރު، ސެލް، އަނަސް ހުސައިންގެ އިތުރުން، ބަންގްލަދޭޝް ދެ މީހެއް ކަމަށްވާ މުހައްމަދު ރިޔާޒާއި އިގްބާލްގެ މައްޗަށެވެ.
އެ ހަ މީހުންގެ މައްޗަށް ޕްރޮސެކިއުޓާ ޖެނެރަލް (ޕީޖީ) އޮފީހުން ތިން ދައުވާއެއް އުފުލާފައިވެއެވެ. އެއީ މަސްތުވާތަކެތީގެ ގާނޫނުގެ ޖަދުވަލު 1 ގައިވާ މަސްތުވާއެއްޗެއް ރާއްޖެ އެތެެރެކުރުމުގެ ކުށުގެ ދައުވާއަކާއި ޖަދުވަލް 1 ގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާއަކާއި އަދި ޑައިމޯފިން ޓްރެފިކްކުރުމުގެ ކުށުގެ ދައުވާއެވެ. މި 3 ދައުވާ ސާބިތުވެއްޖެނަމަ އެމީހުންގެ މައްޗަށް 75 އަހަރުގެ ހުކުމެއް އައުމަކީ އެކަށީގެންވާ ކަމެކެވެ.
