ފޮތްތައް ނެރޭއިރު ކުށް ނުލައި ނެރެވޭނެ ކަމުގެ ޔަގީންކަން ވަރަށް ބޮޑުކަމަށް މިނިސްޓަރ އޮފް ސްޓޭޓް ފޯރ އެޑިޔުކޭޝަން ޑރ އަބްދުﷲ ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޑރ. އަބްދުﷲ ރަޝީދު ވިދާޅުވީ ފޮތްތައް ލިޔުއްވާ ބޭފުޅުން ފޮތްތަކުގައި ކުށް ލިޔުއްވުމަކީ ގަސްދުގައި ކުރައްވާނެ ކަމެއް ނޫން ކަމަށެވެ. ނަމަވެސް ފޮތްތަކުގައި ކުށެއް ހުރެގެން ގަސްދުގައި ކޮށްގެން އުޅޭ ކަމެއްކަން ދެއްކުމުގެ ގޮތުން ބައެއް ބޭފުޅުން ވާހަކަދެއްކެވި ކަމަށެވެ. ނަމަވެސް ހަގީގަތުގައި އެ ވާހަކަ ދެއްކެވި ބޭފުޅުން ފޮތްތައް ލިޔުމާއި، ފާސްކުރުމުގެ މަގާމުގައި ތިއްބެވި އިރުގައި ހަދާފައި ހުރި ފޮތްތަކުގައި ކުށްތައް މާގިނައިން ހުރެގެން އެ ރަނގަޅުކުރަން މަސައްކަތް ކޮށްފައިވާ ކަމަށް ޑރ. އަބްފުﷲ ރަޝީދު ވިދާޅުވިއެވެ.
ޔަގީނުންވެސް ނެޝަނަލް އިންސްޓިޓިއުޓްގެ ފަރާތުން ނުވަތަ ފަންނީ ބޭފުޅުން ފޮތް ލިޔާއިރުގައި ގަސްތުގައި ކުށް ނުޖަހާނެ. އެއީ މީހުން ކުރާކަހަލަ ކަންތައްތަކެއް ނޫން. އެކަހަލަ ކަންކަން ޓްވިސްޓްކޮށްގެން ވާހަކަ ދެއްކުމުން ދަރިވަރުންނަށް ކިޔަވާ ފޮތްތަކުގެ އިތުބާރުކެނޑި ބެލެނިވެރިންގެ ކުރިމަތީގައި ފޮތްތަކުގެ އިތުބާރުކެނޑިގެންދޭ.
ފޮތުގައި ކުށް ހުރެގެން އެކަންކަން ފާހަގަކުރެވުމުން ރިފަރެންސް ދޭނީތޯ ނުވަތަ ނޫންތޯ މަޝްވަރާ ކުރެވުނު ކަމަށް ވެސް ޑރ. އަބްދުﷲ ރަޝީދު ވިދާޅުވިއެވެ.
ޑރ. އަބްދުﷲ ރަޝީދު ވިދާޅުވީ ދުނިޔޭގެ ބައެއް ގައުމުތައި ރިފަރެންސް ދޭކަމަށް ބައެއް ދީނީ އިލްމުވެރިން ވެސް ވިދާޅުވާ ކަމަށެވެ. އިސްލާމް ފޮތްތަކުގައި ރިފަރެންސް ދީފައި އެބަހުންނަ ކަމަށާއި، ނަމަވެސް މިނިސްޓްރީގެ ފަރާތުން ކުރި މަޝްވަރާއަށްފަހު ކުށް ނުލައި ނެރެވޭނެކަމުގެ ޔަގީންކަން ވަރަށް ބޮޑަށް އެބައޮތްކަމަށް ޑރ. އަބްދުﷲ ރަޝީދު ވިދާޅުވިއެވެ.
އިސްލާމާއި ގުރުއާން ފޮތުން އާޔަތްތައް އުނިކޮށް ގުރުއާން ޚަތިމަށް ރިފަރެންސް ދޭ ގޮތަށް ހަމަޖައްސަން އެންގީ ގުރުއާން ލިޔާއިރު ޖެހޭ ކުށްތައް ތަކުރާރުނުވާނެ ގޮތަށް ހެދުމަށް ކަމަށް އެޑިއުކޭޝަން މިނިސްޓްރީން މީގެ ކުރިން ބުނެފައިވެއެވެ. ކުށްހުރިކަންް ފާހަގަކުރެވޭތީ ގުރުއާންގެ އާޔަތްތައް ލިޔުމުގެ ބަދަލުގައި ޚަތިމަށް ރިފަރެންސް ދޭ ގޮތަށް މަޝްވަރާކުރެވުނީ ދަރިވަރުން ގުރުއާނަށް ދޭ އަހައްމިއްޔަތުކަން ކުޑަކުރުމުގެ ނިޔަތުގައި ނޫންކަމަށެވެ.
ގުރުއާން ލިޔާއިރު ޖެހޭ ކުށްތައް ތަކުރާރުނުވާނެ ގޮތް ހެދުމަށާއި އެ ފޮތްތައް ނައްތާލާއިރު ގުރުއާންގެ އާޔަތްތަކަށް އިހާނެތިކޮށް ބައެއް ފަހަރު އަމަލުކުރެވޭކަމަށް ބައެއް އިލްމުވެރިން ވިދާޅުވާތީ އެކަމާއި މަޝްވަރާކުރެވުނު ކަމަށާއި، ނަމަވެސް އެއީ ރަނގަޅު ކަމެއް ނޫންކަމަށް ވިސްނި އަދި ދަރިވަރުންނަށް ކޮންމެ ފަހަރަކު ޚަތިމަށް ނުވަތަ އައްމާފޮތަށް ބެލުމަކީ ދަތި ކަމަކަށް ވާނެ ކަމުން އެ ސިޓީއަށް އަމަލުނުކުރުމަށް ޖެހިގެން އައި ދުވަހު އެންއައިއީއަށް އަންގާފައިވެއެވެ.
މިނިސްޓްރީން ބުނީ އެ ތަނުން ނިންމާފައިވަނީ އިސްލާމާއި ގުރުއާން ފޮތްތަކުގައި ހުރި ކުށްތައް އިސްލާހުކޮށް ޕްރޫޕް ރީޑިން ވަރުގަދަކުރުމަށެވެ. މި ފަހަރު ފޮތްތައް ޗާޕްކުރަން ފޮނުވާއިރު ކުށްތައް އިސްލާހުވެފައިވާކަން ކަށަވަރުކުރަން ވެސް އެ އިންސްޓިޓިއުޓަށް އަންގާފައިވެއެވެ.
