ހދ. އަތޮޅުގެ 7 ރަށަކުން ކޮވިޑް ކޭސްތައް ފެންނަމުންދާއިރު، 2 ރަށެއް މޮނިޓަރިންގައި
ކުޅުދުއްފުށި ސިޓީގެ މިވަގުތު އެކްޓިވް ކޭހުގެ އަދަދުވަނީ 51ށް އަރާފައި
ނެއްލައިދޫ ހެލްތު ސެންޓަރ
ކުޅުދުއްފުށި ސިޓީ ހިމެނޭހެން ހދ. އަތޮޅުގެ 7 ރަށަކުން ކޮވިޑްގެ ކޭސްތައް ފެންނަމުންދާއިރު 2 ރަށެއް މިހާރު އޮތީ މޮނިޓަރިންގެ ހާލަތުގައެވެ.
އެގޮތުން ކުޅުދުއްފުށި ސިޓީ، ކުރިނބީ، ނޮޅިވަރަންފަރު، ނައިވާދޫ، ވައިކަރަދޫ، ނޮޅިވަރަމް އަދި ނެއްލައިދޫއިން ވަނީ ކޮވިޑްގެ ކޭސްތަކެއް ފެނިފައެވެ. މީގެ ތެރެއިން މޮނިޓަރިންގައި އޮތީ ނައިވާދޫއާއި ނެއްލައިދޫއެވެ.
ހަލުވިކަމާއެކު ކޮވިޑް ފެތުރެމުން އަންނައިރު އާދީއްތަ ދުވަހުވެސް ކުޅުދުއްފުށި ސިޓީން 7 މީހަކުވަނީ ޕޮޒިޓިވްވެފައެވެ. އެއާއެކު މިވަގުތު އެ ސިޓީގައި އެކްޓިވް ކޭހުގެ އަދަދު ވަނީ 51ށް އަރާފައެވެ. މީގެއިތުރުން ކުރިނބީން 2 ކޭސް، ނޮޅިވަރަންފަރުން 39 ކޭސް، ނައިވާދޫއިން 23 ކޭސް، ވައިކަރަދޫއިން 6 ކޭސް، ނޮޅިވަރަމުން 1 ކޭސް އަދި ނެއްލައިދޫއިން 4 ކޭސް ފެނިފައިވާކަމަށް ކުޅުދުއްފުށީ ރީޖަނަލް ހޮސްޕިޓަލުން ހާމަކުރެއެވެ.
ނޮޅިވަރަންފަރާއި ކުޅުދުއްފުށި ސިޓީގައި ގުޅުމެއްނެތް އެކި ކްލަސްޓަރތައް އުފެދިފައިވާތީ، ބަލި ފެތުރިދާނެކަމުގެ ބިރު އޮތްކަމަށް ވެސް ރީޖަނަލް ހޮސްޕިޓަލުން ބުނެއެވެ.
އެހެންކަމުން ހުރިހާ ފަރާތްތަކުން ބަލި ނުފެތުރޭނެހެން އުޅުމަށް ސިއްހީ މާހިރުން ވަނީ އިލްތިމާސްކުރައްވާފައެވެ. ޚާއްސަކޮށް ކަރަންޓީނުގައި ތިބޭ ފަރާތްތަކުން ކަރަންޓީނު އުސޫލަށް ފުރިހަމައަށް އަމަލުކުރުމާއި، މާސްކް އެޅުމާއެކު ބޭރުގައި އުޅޭއިރު ގައިދުރުކަން ބެހެއްޓުން އަދި ގިނައިން އަތް ދޮވުމަށް ވަނީ އިލްތިމާސްކުރައްވައެވެ.
