ޖެނެރަލް ސުލައިމާނީ އަވަހާރަކޮށްލި ހާދިސާ އާ ގުޅިގެން އިރާނުގެ ބްލެކް ލިސްޓަށް އެމެރިކާގެ 51 އޮފިޝަލުން
9 ޖެނުއަރީ 2022 | އާދީއްތަ 03:41މީގެތެރޭގައި ގިނަ މީހުންނަކީ އަސްކަރިއްޔާގައި ހިމެނޭ އަދި ވަކިން ޚާއްސަކޮށް ސުލައިމާނީ އަވަހާރަކޮށްލުމަށް ހިންގި އޮޕަރޭޝަންގައި ކޮންމެސް ގޮތަކުން ބައިވެރިވެފައިވާ އޮފިޝަލުން
ޖެނެރަލް ސުލައިމާނީ އަވަހާރަކޮށްލިތާ ދެ އަހަރު ފުރުން ފާހަގަކުރަނީ
އެމެރިކާއިން ދިން ހަމަލާއެއްގައި އީރާންގެ އެންމެ ވަރުގަދަ ލަޝްކަރު ގުދުސް ފޯސްގެ ވެރިޔާ އަދި އެ ގައުމުގެ ސަލާމަތީ ބާރުތަކުގެ އިސްވެރިޔާ ގާސިމް ސުލައިމާނީ އަވަހާރަކޮށްލި ހާދިސާ އާ ގުޅިގެން އިރާނުން އެމެރިކާގެ އޮފިޝަލުންތަކަކާ ދެކޮޅަށް ދަތިކުރުމުގެ ފިޔަވަޅު އަޅައިފިއެވެ.
މިއޮފިޝަލުންގެ ތެރޭގައި ހިމެނޭ ގިނަ މީހުންނަކީ އަސްކަރިއްޔާގައި ހިމެނޭ އަދި ވަކިން ޚާއްސަކޮށް ސުލައިމާނީ އަވަހާރަކޮށްލުމަށް ހިންގި އޮޕަރޭޝަންގައި ކޮންމެސް ގޮތަކުން ބައިވެރިވެފައިވާ އޮފިޝަލުންނެވެ. އިރާނުގެ ފޮރިން މިނިސްޓްރީން ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ އެމެރިކާގެ 51 އޮފިޝަލުން ސުލައިމާނީ އަވަހާރަކޮށްލުމަށް ހިންގި ޓެރަރިސްޓް އަމަލުގައި ބައިވެރިވެފައިވާތީ ބްލެކް ލިސްޓުކޮށްފައިވާކަމަށެވެ.
އޭގެތެރޭގައި އެމެރިކާގެ ޖޮއިންޓް ޗީފް އޮފް ސްޓާފްގެ ޗެއަރމަން މާކް މިލީ އާއި ސެންޓްރަލް ކޮމާންޑް ޗީފް ކެނެތު މެކެންޒީ އާއި ޕެންޓަގަންގެ އޮފިޝަލުންނާއި ކޮމާންޑަރުން ހިމެނެއެވެ.
މީގެ އަހަރެއްކުރިން އިރާނުން ވަނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް އާއި ސެކެޓްރީ އޮފް ސްޓޭޓް މައިކް ޕޮމްޕެއޯ އާއި 8 އޮފިޝަލުންނާ ދެކޮޅަށްވެސް ދަތިކުރުމުގެ ފިޔަވަޅު އަޅާފައެވެ. މީގެއިތުރުން އިރާނުން ވަނީ މިމީހުން ހައްޔަރުކުރުމަށްވެސް އިންޓަރޕޯލުގައި އެދިފައެވެ.
ހޮނިހިރު ދުވަހު އިރާނުން އައު ފިޔަވަޅުތަކެއް އަޅާފައިވާކަން ހާމަކޮށްފައިމިވަނީ ސުލައިމާނީ އަވަހާރަކޮށްލިތާ ދެ އަހަރު ފުރުމާ ދިމާކޮށެވެ. ދެ އަހަރު ފުރުމާ ދިމާކޮށް އިރާނުގެ ރައީސް އިބްރާހީމް ރައީސީ ވަނީ ސުލައިމާނީ އަވަހާރަކޮށްލުމުގައި ބައިވެރިވާ ޓްރަމްޕް އާ ޕޮމްޕެއޯ އިންސާފުގެ ކުރިމައްޗަށް ގެންނަންޖެހޭކަމަށް ވިދާޅުވެފައެވެ.
އިރާނުން ވަނީ ސުލައިމާނީ އަވަހާރަކޮށްލުމާއި ގުޅިގެން އދ ގެ އާންމު މަޖިލީހާއި ސެކިޔުރިޓީ ކައުންސިލްގައި އެމެރިކާ އާއި އިޒްރޭލާ ދެކޮޅަށް ފިޔަވަޅު އެޅުމަށްވެސް އެދިފައެވެ.
2020 ވަނަ އަހަރުގެ ޖެނުއަރީ މަހުގެ 3 ވަނަ ދުވަހު ސުލައިމާނީ އަވަހާރަކޮށްލާފައިވަނީ ބަޣުދާދުގެ ބައިނަލްއަގްވާމީ ވައިގެ ބަނދަރުން ކާރުކޮޅެއްގައި ނިކުންނަވަނިކޮށް ދިން ހަމަލާތަކެއްގައެވެ.
