ފުލުހުންގެ ޚިދުމަތާމެދު އެއްވެސް ޝައްކެއް ވާނަމަ ނެޝަނަލް އިންޓެގްރިޓީ ކޮމިޝަން ނުވަތަ ކަމާގުޅޭ މުއައްސަސާއަކަށް ހުށަހެޅުމަށް ފުލުހުން އެދިއްޖެއެވެ.
މާލޭގައި މިހާރު ބާއްވަމުންދާ އެއްވުންތަކުގައި ފުލުހުން ބާރުގެ ބޭނުންކޮށް، ފުލުހުންގެ ބެލުމުގެ ދަށަށް މީހުން ގެނައުމުގައި އަމަލުކުރަމުންދާ ގޮތާމެދު ދެކެވޭ ވާހަކަތަކާ ގުޅޭގޮތުން ފުލުހުން ނެރުނު ބަޔާނެއްގައި ވަނީ، މުޒާހަރާތަކާ އެނޫން ވެސް ހާލަތްތަކުގައި މީހުން ހައްޔަރުކުރުމުގައި ފުލުހުން އަމަލުކުރަނީ ޖިނާއީ އިޖުރާއަތުގެ ގާނޫނާއި އެނޫންވެސް ޚާއްސަ ގާނޫނަކާގުޅޭ ކަމެއްނަމަ އެ ގާނޫނަކާ އެއްގޮތަށް ކަމަށެވެ.
އެހެންނަމަވެސް މިފަދަ ހާލަތްތަކުގައި ފުލުހުން އަމަލުކުރާ ގޮތާމެދު އާންމުންގެ ފާޑުކިޔުން އަމާޒުވާތީ ފުލުހުން ވަނީ، މީހަކު ހައްޔަރުކުރުމުގައި ނުވަތަ އެނޫންވެސް ކަމެއްގައި ފުލުހުން ބާރުގެ ބޭނުންކޮށްފައިވާ ގޮތާމެދު އެއްވެސް ޝަކުވާއެއްވާނަމަ ހަމަޖެހިފައިވާ އިންތިޒާމުތަކުގެ ތެރެއިން ހުށަހެޅުމުން އެކަން ބަލާނެ ކަމަށް ބުނެފައެވެ. އަދި ފުލުހުންގެ ޚިދުމަތާމެދު އެއްވެސް ޝައްކެއް ވާނަމަ ނެޝަނަލް އިންޓެގްރިޓީ ކޮމިޝަން ނުވަތަ ކަމާގުޅޭ މުއައްސަސާއަކަށް ހުށަހެޅުމުން އެކަން ބަލާނެ ކަމަށް ފުލުހުން ބުނެފައިވެއެވެ.
ފުލުހުން ބުނީ އަންހެނުން ހައްޔަރުކުރުމުގައި އަންހެން ފުލުހުން ހަރަކާތްތެރިވުމަށް އިސްކަންދޭކަމަށާއި، އަދި ގާނޫނުތައް ތަންފީޒުކޮށް ނެގެހެއްޓުމަށާއި އާންމު ސަލާމަތާއި ރައްކާތެރިކަމަށްޓަކައި ގާނޫނާއި ގަވާއިދުތަކުގެ ތެރެއިން އެ ވަގުތަކަށް އަޅަންޖެހޭ ފިޔަވަޅުތައް އަޅާނެ ކަމަށް ފުލުހުން ބުނެފައިވެއެެވެ.
އެހެންނަމަވެސް މާލޭގައި ސިޔާސީ ޕާޓީއަކުން އިސްވެ، ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ޚިލާފަށް އެއްވުންތަކެއް ބާއްވަމުން އަންނަކަން ފުލުހުން ވަނީ ފާހަގަކޮށްފައެވެ. މި އެއްވުންތަކުގައި އާންމު ދަތުރުފަތުރަށް ދަތިކޮށް، މާލެއާއި ހުޅުމާލެއާ ދޭތެރޭގައި ދަތުރުކުރާ ބަސް މާލޭ މަގުމަތިން ހުއްޓުވައި އަދި ގާނޫނާ ޚިލާފު އަމަލުތައް ކުރުމަށް ތަކުރާރުކޮށް ހިތްވަރުދީ އެކަމަށް ގޮވާލަމުންދާކަން ފާހަގަކުރެވި އެފަދަ މީހުންގެ މައްސަލަތައް ތަހުގީގު ކުރަމުންދާކަމަށް ފުލުހުން ބުނެފައިވެއެވެ.
އަދި އެއްވުންތައް ރޫޅާލުމުގައި ފުލުހުން ބާރުގެ ބޭނުންކުރުމުގައި އަމަލުކުރާ އުސޫލަކީ އެ ހާލަތާ އެއްވަރުގެ ނުވަތަ އެއަށްވުރެ ދަށް މިންގަނޑެއްގެ ބާރެއް ބޭނުންކުރުން ކަމަށާއި، މިފަދަ އެއްވުންތަކުގައި ބައިވެރިވާ ބައެއް މީހުން ފުލުހުންނަށް ހަމަލަދީ، ދައުލަތުގެ މުދަލަށް ގެއްލުންދީ ހަދާކަން ފުލުހުން ވަނީ ފާހަގަކޮށްފައެވެ. އަދި ދައުލަތުގެ ކަމާ ގުޅުންހުރި އިދާރާތަކުގެ ހިންގުމަށް ހުރަސްއެޅުމުގެ މަސައްކަތް ކުރާކަންވެސް ފާހަގަކުރެވިފައިވެއެވެ.
