ކުޅުދުއްފުށީގައި އެކްޓިވް ކޭހުގެ އަދަދު 41ށް އަރައިފި
7 ޖެނުއަރީ 2022 | ހުކުރު 14:00މިހާތަނަށް 50 މީހުން ޕޮޒިޓިވްވެފައިވާއިރު އޭގެތެރޭގައި ރީޖަނަލް ހޮސްޕިޓަލްގެ 3 ޑޮކްޓަރަކުވެސް ހިމެނޭ
ކުޅުދުއްފުށީގައި ރެންޑަމް ސާމްޕަލް ނަގަނީ
ކުޅުދުއްފުށި ސިޓީން އިތުރު 17 މީހަކު ކޮވިޑަށް ޕޮޒިޓިވްވެ އެކްޓިވް ކޭހުގެ އަދަދު 41ށް އަރައިފިއެވެ.
ކުޅުދުއްފުށީ ރީޖަނަލް ހޮސްޕިޓަލުން މައުލޫމާތު ދިންގޮތުގައި ހުކުރު ދުވަހު ޕޮޒިޓިވްވެފައިވަނީ ރާއްޖެއިން ބޭރަށް ދިއުމަށްޓަކައި ބުރާސްފަތި ދުވަހު ނެގި ސާމްޕަލް އަކުން ޕޮޒިޓިވްވީ 39 އަހަރުގެ އަންހެނެއްގެ ކޮންޓެކްޓުންގެ ގޮތުގައި ފާހަގަކުރެވުނު މީހުންގެ 14 ސާމްޕަލަކާއި، ބަލީގެ އަލާމާތް ހުރެގެން ފްލޫ ކްލިނިކަށް ދެއްކި މީހުންގެ ތެރެއިން 3 ސާމްޕަލެކެވެ.
ކުޅުދުއްފުށި ސިޓީގައި ކޮވިޑްގެ ކޭސްތައް އިތުރުވަމުންދާތީ 101 ރޭންޑަމް ސާމްޕަލް ބުރާސްފަތި ދުވަހު ވަނީ ނަގާފައެވެ. އޭގެތެރެއިން 1 ސާމްޕަލް ފިޔަވައި ހުރިހާ ސާމްޕަލް ނެގެޓިވް ކަމަށާއި، 1 ސާމްޕަލް އިންކޮންކްލޫސިވްކަމަށް ކުޅުދުއްފުށީ ރީޖަނަލް ހޮސްޕިޓަލުން މަޢުލޫމާތުދެއެވެ.
ކުޅުދުއްފުށިން ކޮވިޑް ކޭސްއެއް ނުފެންނަތާ ދުވަސްކޮޅެއް ދިއުމަށްފަހު އެންމެ ފުރަތަމަ ކޭހެއް ފެނިފައިވަނީ މިދިޔަ ޑިސެމްބަރު މަހުގެ 20 ވަނަ ދުވަހުއެވެ. މިހާތަނަށް 50 މީހުން ޕޮޒިޓިވްވެފައިވާއިރު، އޭގެތެރޭގައި ކުޅުދުއްފުށީ ރީޖަނަލް ހޮސްޕިޓަލްގެ 3 ޑޮކްޓަރަކުވެސް ހިމެނެއެވެ.
