ކުޅުދުއްފުށީ ސިޓީގައި ކޮވިޑް ކޭސްތައް އިތުރުވަނީ
ކޭސްތައް އިތުރުވަމުންދާތީ ބުރާސްފަތި ދުވަހު ވަނީ 100 ރެންޑަމް ސާމްޕަލް ނަގާފައި
ކުޅުދުއްފުށި ސިޓީ
ކުޅުދުއްފުށީ ސިޓީއިން އިތުރު 5 މީހަކު ކޯވިޑަށް ޕޮޒިޓިވްވެ ޖުމްލަ އަދަދު 23ށް އަރައިފިއެވެ.
ކުޅުދުއްފުށި ސިޓީން ބުދަދުވަހު ޕޮޒިޓިވްވެފައިވަނީ ބަލީގެ އަލާމާތްތައް ހުރެގެން އަންގާރަ ދުވަހު ފްލޫ ކްލިނިކަށް ދެއްކި 4 މީހަކާއި، ކޮންޓްރެކްޓް ޓްރޭސިންގެތެރެއިން ފާހަގަ ކުރެވުނު މީހެކެވެ. ފްލޫ ކްލިނިކަށް ދެއްކި 4 މީހުންގެތެރެއިން 2 މީހުންނަކީ ވަރަށް ފަހުން މާލެ ދަތުރުކޮށްފައިވާ ބައެކެވެ.
ކުޅުދުއްފުށީ ރިޖަނަލް ހޮސްޕިޓަލުން މައުލޫމާތު ދެއްވިގޮތުގައި، މިދުވަސްވަރު ކުޅުދުއްފުށީގައި ކޯވިޑްގެ ކޭސްތައް އިތުރުވަމުންދާތީ ބުރާސްފަތި ދުވަހު ވަނީ 100 ރެންޑަމް ސާމްޕަލް ނަގާފައެވެ.
ކުޅުދުއްފުށިން ކޯވިޑް ކޭސްއެއް ނުފެނި ދުވަސްކޮޅެއް ދިއުމަށްފަހު އެންމެ ފުރަތަމަ ކޯވިޑް ކޭހެއް ފެނިފައިވަނީ މިދިޔަ ޑިސެމްބަރ މަހުގެ 20 ވަނަ ދުވަހުއެވެ.
މިހާތަނަށް 32 މީހުން ޕޮޒިޓިވްވެފައިވާއިރު، އޭގެތެރޭގައި ކުޅުދުއްފުށީ ރީޖަނަލް ހޮސްޕިޓަލްގެ 3 ޑޮކްޓަރަކުވެސް ހިމެނެއެވެ. މިވަގުތު އެ ސިޓީގައި އެކްޓިވް ކޭސްގެ އަދަދަކީ 23 އެވެ.
