ހުޅުމާލެ ދެ ވަނަ ފިޔަވަހީގައި ތަރައްގީކޮށްފައިވާ ހިޔާ ފްލެޓްތަކުގެ ލިފްޓްތައް ހުއްޓޭ މައްސަލަ ފެންމަތިވެއްޖެއެވެ.

ފްލެޓްގައި ދިރިއުޅޭ މީހުން ބުނެފައިވާ ގޮތުގައި މިފަހުން ލިފްޓްތައް ކުއްލިއަކަށް ހުއްޓޭ މައްސަލަ ވަނީ އިތުރުވެފައެވެ. އަދި ގިނައިރުތަކެއް ވަންދެން ލިފްޓްގައި ތާށިވެފައި ތިބެން ޖެހޭ ކަމަށް އެމީހުން ބުނެއެވެ. އެގޮތުން ޖެނުއަރީ 4 ވީ އަންގާރަ ދުވަހު ވެސް ލިފްޓް ހުއްޓި އަންހެނަކު އެއްގަޑިއަށް ވުރެ ގިނައިރު ލިފްޓްގައި ތާށިވި މައްސަލައެއް ފެންމަތިވެފައިވެއެވެ.

ލިފްޓްތައް މޮނިޓާ ކުރުމާއި ގުޅޭ ގޮތުން މީގެ ކުރިން ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުނީ ހިޔާ ފްލެޓްގެ ލިފްޓަށް ދިމާވާ މައްސަލަތައް ހައްލު ކުރުމަށް އެ މަޝްރޫއުގެ ކޮންޓްރެކްޓަރުގެ ފަރާތުން ހަވާލުކޮށްފައި ވަނީ ކޮންޓެކް ޕްރައިވެޓް ލިމިޓެޑާ ކަމަށެވެ. މެއިންޓެނަންސް މަސައްކަތްތަކާއެކު، ލިފްޓަށް ދިމާވާ މައްސަލަތައް ބަލައި، 24 ގަޑިއިރު ޚިދުމަތް ދިނުމަށް ހަމަޖެހިފައިވާ ކަމަށް އެޗްޑީސީން ބުނެއެވެ.

މީގެ އިތުރުން އެޗްޑީސީން ބުނީ ހިޔާ ފްލެޓްގައި ދިރިއުޅޭ ރައްޔިތުންނަށް ފަސޭހަ ދިރިއުޅުމެއް ހޯދައިދިނުމަށް ޚިދުމަތްތައް ފޯރުކޮށްދެމުންދާ ކަމަށާއި، ފަސޭހަ އިންތިޒާމްތައް ހަމަޖެއްސުމަށް މަސައްކަތް ކުރަމުންދާ ކަމަށެވެ. އަދި އެ ފްލެޓްތަކަށް ދިމާވާ އެކި މައްސަލަތައް ހައްލު ކުރުމަށް މަސައްކަތް ކުރަމުންދާ ކަމަށް އެޗްޑީސީން ބުނެއެވެ.

ހުޅުމާލެ ދެ ވަނަ ފިޔަވަހީގައި އަޅާފައިވާ ހިޔާ ފްލެޓްތަކަކީ ގާތްގަނޑަކަށް 30،000 މީހުންގެ އާބާދީއަކަށް ހަދާފައިވާ ފްލެޓްތަކެކެވެ. އެސަރަހައްދުގައި 2021 ވަނަ އަހަރުގެ ތެރޭގައި މީހުން ވަނީ އާބާދުވާން ފަށާފައެވެ.