ރައީސް ނަޝީދާ ގުޅޭގޮތުން ފުލުހަށް ހުށަހެޅި މައްސަލާގައި ޖިނާއީ ތަހުގީގެއް ހިންގަންޖެހޭ ކަމެއްނެތް: ފުލުހުން
ޖަމްއިއްޔަތުލް އިއްތިހާދުގެ ފަރާތުން ފުލުހަށް ހުށަހެޅި ސިޓީގައި ބުނެފައިވަނީ 2020 އަދި 2021 ވަނަ އަހަރުވެސް ރައީސް ނަޝީދު ކްރިސްމަސް ދުވަހުގެ ތަހުނިޔާ ފޮނުއްވާފައިވާ ކަމަށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާ ގުޅޭގޮތުން ޖަމްއިއްޔަތުލް އިއްތިހާދުގެ ނަމުގައި ފުލުހުންނަށް ހުށަހަޅާފައިވާ ސިޓީގައި ބަޔާންކޮށްފައިވާ ކަންތައްތައް ބެލިބެލުމުން، ޖިނާއީ ތަހުގީގެއް ހިންގަންޖެހޭފަދަ ކަމެއް ފާހަގަކުރެވިފައިނުވާތީ އެކަމާގުޅިގެން ތަހުގީގެއް ކުރިޔަށްނުދާ ކަމަށް ފުލުހުން ބުނެފިއެވެ.
ރައީސް ނަޝީދާ ގުޅޭ މައްސަލައެއް ޖަމިއްޔަތުލް އިއްތިހާދުގެ ފަރާތުން ފުލުހަށް ހުށަހަޅާފައިވާ ހޯމަ ދުވަހުއެވެ. ފުލުހުން އަންގާރަ ދުވަހު ހެނދުނު ބުނެފައިވަނީ، އެސިޓީއާ ގުޅޭގޮތުން ބަލަންޖެހޭ ކަމެއްވާނަމަ އެކަމެއް ބަލަމުންދާކަމަށެވެ. ނަމަވެސް އަންގާރަ ދުވަހުގެ ރޭ ފުލުހުން ބުނެފައިވަނީ ފުލުހުން ބެލިބެލުމުގައި، އެސިޓީ ހުށަހަޅާފައިވަނީ ދައުލަތުގެ އެއްވެސް އިދާރާއެއްގައި ރަޖިސްޓްރީ ކުރެވިގެން ހިންގާ ގާނޫނީ ޝަޚުސަކުން ކަމުގައިނުވާތީ އެސިޓީއާ މެދު އަމަލުކުރި ގޮތް އެސިޓީ ފޮނުވި ފަރާތަށް އަންގާފައިނުވާކަމަށެވެ. އަދި އެސިޓީއާ މެދު ފުލުހުން އަމަލުކޮށްފައިވާނީ ފުލުހުންނާ ހިއްސާކުރާ މައުލޫމާތުތަކާމެދު އަމަލުކުރަމުންދާ އުސޫލުންކަމަށެވެ.
ފުލުހުން އިތުރަށް ބުނެފައިވަނީ، އިސްލާމްދީނާ ޚިލާފަށް ރާއްޖޭގައި ބައެއް ފަރާތްތަކުން ހިންގާ ކަންކަމަކީ ފުލުހުން ވަރަށް އިސްކަމެއްދީގެން ތަހުގީގުކުރަމުންދާ، އަދި މުސްތަގުބަލުގައިވެސް ތަހުގީގުކުރާނެ މައްސަލަތަކެއްކަމަށެވެ. ނަމަވެސް ޖަމްއިއްޔަތުލް އިއްތިހާދުގެ ފަރާތުން ފާހަގަކޮށްފައިވަނީ މިފަދަ ކަމެއްގެ މައުލޫމަތު ނޫންކަމަށް ފުލުހުން ވަނީ ބުނެފައެވެ.
ޖަމިއްޔަތުލް އިއްތިހާދުގެ ފަރާތުން ފުލުހަށް ހުށަހެޅި ސިޓީގައި ބުނެފައިވަނީ، 2020 ވަނަ އަހަރު އަދި 2021 ވަނަ އަހަރުވެސް ރައީސް ނަޝީދު ކްރިސްމަސް ދުވަހުގެ ތަހުނިޔާ ފޮނުއްވާފައިވާ ކަމަށެވެ. އެހެންކަމުން އެ މައްސަލަ ބަލައިދިނުމަށް ވަނީ ހުށަހަޅާފައެވެ.
މިމައްސަލަ ފުލުހުން ބަލައިގަތުމާ ގުޅިގެން ރައްޔިތުންގެ މަޖިލީހުގެ އިދާރާއިން ވަނީ ނޫސްބަޔާނެއް ނެރެފައެވެ. އެނޫސްބަޔާނުގައި ރައީސް ނަޝީދު ވިދާޅުވެފައިވަނީ އިސްލާމް ދީނުގެ އަސާސްތަކާ ޚިލާފަށް އުޅޭ މީހެއްގެ ގޮތުގައި ތަސައްވުރެއް ކުރަހަން ކުރާ މަސައްކަތުގެ ހަމައެކަނި މަގުސަދަކީ ޖާނަށް ނުރައްކާދިނުން ކަމަށެވެ. ރައީސް ނަޝީދު ވިދާޅުވެފައިވަނީ ރާއްޖޭގައި ހަރަކާތްތެރިވާ ސިޔާސީ ފަރާތްތަކުން ދޭ ބަހުގެ ހަމަލާތަކާއި މީޑިޔާގެ ރިޕޯޓުތަކުގައި، އެމަނިކުފާނަކީ އިސްލާމްދީނުގެ އަސާސްތަކާ ޚިލާފަށް އުޅޭ މީހެއްގެ ގޮތުގައި ތަސައްވަރެއް ކުރަހަން މަސައްކަތް ކުރާތާ މިހާރު އަހަރުތަކެއް ވެއްޖެކަމަށެވެ. އަދި އެމަނިކުފާނާ ދެކޮޅަށް އެއްލާ އެތިފަހަރުތަކުގެ ބަސްމަގު، ހަރުކަށި ފިކުރުގެ މީހުން ހިތާވާ ރާގަށް އަނބުރަމުން ދާތީ ކަންބޮޑުވާތާ ދުވަސްކޮޅެއް ވެއްޖެކަމަށް ވަނީ ވިދާޅުވެފައެވެ.
މިފަދަ ބަސްމަގާއި ހަރުކަށި ފިކުރުގެ މީހުންނަށް ލަވައިދޭ ބަސްމަގާ އެއް މަގުން ހިނގާތާ ދުވަސްތަކެއް ވެއްޖެކަމަށްވެސް ރައީސް ނަޝީދު ވަނީ ވިދާޅުވެފައެވެ. އެމަނިކުފާނު ވިދާޅުވެފައިވަނީ ލާދީނީ މީހެއްކަމަށް ބުނެ، ފަތުރާ އިލްޒާމުތަކަށް ފިޔަވަޅު އަޅާނެކަމުގެ އުންމީދުގައި ހުންނެވިކަމަށެވެ.
މިދިޔަ އަހަރުގެ މެއި މަހުގެ 6 ވަނަ ދުވަހުގެ ރޭ އެމަނިކުފާނު އަވަހާރަކޮށްލުމަށް ދިން ހަމަލާއިން އެމަނިކުފާނުގެ ފުރާނަ ސަލާމަތްވީ ކިރިޔާއެވެ. އެހަމަލާގެ ފަހަތުގައި ތިބީ ދީނީ ގޮތުން ހަރުކަށި ފިކުރުގެ ބައެއްކަމަށް ތަހުގީގުތަކުން ހޯދިފައިވާކަމަށް ފުލުހުން ވަނީ ބުނެފައެވެ. އެމަނިކުފާނު އަވަހާރަކޮށްލުމަށް ދިން ހަމަލާއަކީ އެތައް ފަހަރަކު އެމަނިކުފާނަށް ފާރަލައިގެން ދީފައިވާ ހަމަލާއެއްކަންވެސް ވަނީ އެނގިފައެވެ.
