ކުޅުދުއްފުށީ ރީޖަނަލް ހޮސްޕިޓަލްގެ 3 ޑޮކްޓަރަކުވެސް ކޮވިޑްއަށް ޕޮޒިޓިވްވެއްޖެ
4 ޖެނުއަރީ 2022 | އަންގާރަ 14:35ކުޅުދުއްފުށި ސިޓީން ބަލި ޖެހުނު މީހުންގެ ޖުމްލަ އަދަދު ވަނީ 26އަށް އަރާފައި
ކުޅުދުއްފުށީ ރީޖަނަލް ހޮސްޕިޓަލް
ކުޅުދުއްފުށި ސިޓީން ކޮވިޑް-19އަށް ޕޮޒިޓިވްވި މީހުންގެ ތެރޭގައި ކުޅުދުއްފުށީ ރީޖަނަލް ހޮސްޕިޓަލްގައި މަސައްކަތްކުރާ ތިން ޑޮކްޓަރަކުވެސް ހިމެނިއްޖެއެވެ.
ކޮވިޑްގެ ބަލި މީހެއް ނުފެންނަތާ ދުވަސްތަކަކަށްފަހު އެ ބަލީގެ މީހެއް ފެނުނީ މިދިޔަ ޑިސެމްބަރ މަހުގެ 20 ވަނަ ދުވަހު އެވެ. އެއަށްފަހު އެއާ ގުޅުމެއް ނެތް ގިނަ ބަޔަކު ޕޮޒިޓިވްވެ ކުޅުދުއްފުށި ސިޓީން ބަލި ޖެހުނު މީހުންގެ ޖުމްލަ އަދަދު ވަނީ 26އަށް އަރާފައެވެ.
ކޮމިއުނިޓީ ސްޕްރެޑެއްގެ ބިރު އޮތުމުން ކައުންސިލް ބައިވެރިވެގެން ކުރަން ނިންމާފައިވާ ހަރަކާތްތައް އަންނަނީ ކެންސަލްކުރަމުންނެވެ. މީގެ އިތުރުން ބަލި ފެތުރުން ކޮންޓްރޯލްކުރުމަށް ރައްކާތެރި ފިޔަވަޅުތައް އެޅުމަށް ސިއްހީ ފަރާތްތަކުން އަންނަނީ އިލްތިމާސްކުރަމުންނެވެ.
ކުރިއަށް އޮތް ތިން ހަފްތާއެއްހާ ދުވަހު، ކޮވިޑް-19 ކޭސްތައް ރާއްޖޭގައި އިތުރުވުމުގެ ފުރުސަތު އެބައޮތް ކަމަށް ސިއްހީ ތަޖުރިބާކާރުން ބުނެފައިވާކަމަށް ރައީސް އިބްރާހިމް މުހައްމަދު ސޯލިހުވެސް ވަނީ ވިދާޅުވެފައެވެ.
ކޮވިޑާ ގުޅިގެން އަޅާފައިވާ ފިޔަވަޅުތަކަށް ސަމާލުވުމަށް އިލްތިމާސް ކުރައްވަމުން ރައީސް ސޯލިހު ވިދާޅުވީ، ކޮވިޑްގެ އާލަމީ ވަބާއިން ސަލާމަތް ވުމުގެ އުންމީދަކާ ހަމައަށް ދިވެހިންނަށް މިހާރު އާދެވިފައިވާ ކަމަށެވެ.
އަދި ފާއިތުވި ދެ އަހަރަކީ، ރާއްޖޭގައި ތާރީޚު ލިޔެވެން ފެށި ފަހުން ދިމާވި އެންމެ ހައްސާސް ދެ އަހަރު ކަމަށާއި އަލަށް ފެތުރެމުން އަންނަ ކޮވިޑް ވޭރިއަންޓުގެ ބިރު ރާއްޖެއަށްވެސް އެބަ އޮތްކަމަށް ރައީސް ވިދާޅުވި އެވެ.
