ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ގޯލްޑަން ފުޓްސަލް ޗެލެންޖް" ގައި ބައިވެރިވުމުގެ ފުރުސަތު ބަންދުވެ 91 ޓީމާއެކު އަންނަ ފެބްރުއަރީ މަހު މުބާރާތް ފެށުމަށް ތައްޔާރުވަމުންދާ ކަމަށް ގޯލްޑަން ފުޓްސަލް އެސޯސިއޭޝަނުން ބުނެފިއެވެ.

އެންމެ ގިނަ ޓީމުތަކާއިއެކު ރާއްޖޭގައި ބާއްވާ މި މުބާރާތުގައި މިއަހަރު 177 މެޗު ކުޅެވިގެންދާނެ އެވެ. މުބާރާތާއި ބެހޭ ގޮތުން ވާހަކަ ދައްކަމުން ގޯލްޑަން ފުޓްސަލް އެސޯސިއޭޝަންގެ ރައީސް ރިލްވާން މޫސާ ވިދާޅުވީ ވ. އަތޮޅު ފިޔަވާ މުޅިރާއްޖެއިން ޓީމުތައް ވާދަކުރާނެ ކަމަށާއި އެހެންކަމުން މިއީ ވާދަވެރި އަދި ފޯރީގެ ގޮތުން ތަފާތު މުބާރާތަކަށް ވެގެންދާނެ ކަމަށެވެ.

ކުރިޔަށް އޮތް ހަފްތާއެއްގެ ތެރޭގައި ކޮންމެ އަތޮޅެއްގެ ޝެޑިއުލް އިއުލާން ކުރަމުންދާނެ ކަމަށާއި މި ފަހަރު މުޅި މުބާރާތުގައި 177 މެޗު ކުޅެވިގެންދާއިރު ފުރަތަމަ ބުރުގައި އެެކަނި ވެސް 120 މެޗު ކުޅެވިގެންދާނެ ކަމަށް ގޯލްޑަން ފުޓްސަަލް އެސޯސިއޭޝަނުން ބުނެއެވެ. މިއީ މިދިޔަ އަހަރު މުޅި މުބާރާތުގައި ކުޅެފައިވާ އަދަދެވެ. މުބާރާތަށް ތައްޔާރުވުމަށް ޓީމުތަކުން މިހާރު ވެސް ކޯޗުން ހަމަޖައްސަައިގެން ފަރިތަކުންތައް ފަށާފައިވާއިރު މިފަހަރުގެ މުބާރާތުގައި ކޮންމެ ޓީމަކަށް ވެސް ކުޅެވޭނީ އެރަށަށް ނުނީ އެއަތޮޅަށް ނިސްބަތްވާ ކުޅުންތެރިންނަށެވެ. އެގޮތުން ކުޅުންތެރިއެއް ރަޖިސްޓްރީވެފައިވާ ތާރީޚެއް ކަމަށް ބަލާނީ ފެބްރުއަރީ މަހުގެ 01 ވަނަ ދުވަސް ކަމަށް ގޯލްޑަން ފުޓްސަލް އެސޯސިއޭޝަނުން ބުނެއެވެ.

މުބާރާތުގެ ޝެޑިއުލް ރާވާއިރު ވަޒީފާތަކުގައި އުޅޭ ކުޅުންތެރިންނަށް ފަސޭހަ ވާނެ ގޮތަކަށް މުބާރާތް ރޭވުމަށް މަސައްކަތް ކުރާނެ ކަމަށާއި މުބާރާތް 30 ދުވަހުން ނިންމާލެވޭނެ ކަމަށް އުންމީދު ކުރާ ކަމަށް ރިލްވާން ވިދާޅުވިއެވެ.

މުޅި ރާއްޖެއަށް ހުޅުވާލައިގެން މާލެ ސަރަހައްދުގައި މި މުބާރާތް އެންމެ ފުރަތަމަ ބޭއްވީ މީގެ ހަ އަހަރު ކުރިން 2015 ވަނަ އަހަރުއެވެ. ކޮވިޑް-19 އާ ގުޅިގެން މިދިޔަ ދެއަހަރު މި މުބާރާތް ބާއްވާފައި ނުވާއިރު، މި އަހަރުގެ މުބާރާތުގެ ފުރަތަމަ ބުރު ވެސް ކުރިއަށްދާނީ އަތޮޅުތަކުން ބައިވެރިވެފައިވާ ޓީމުތަކުގެ މެދުގައެވެ. ލީގު އުސޫލުން ކުޅެ އެންމެ ގިނަ ޕޮއިންޓު ހޯދާ ޓީމު އަތޮޅު ޗެމްޕިއަންގެ ޝަރަފާއެކު ޒޯން ބުރަށް ދަތުރުކުރާއިރު، ފަސް ޓީމަށް ވުރެ ގިނައިން ބައިވެރިވެފައިވާ އަތޮޅުތަކުގެ ބުރު ކުރިއަށްދާނީ ގްރޫޕުތަކަށް ބަހާލައިގެންނެވެ.

އެއަށްފަހު މުބާރާތުގެ ދެވަނަ ބުރު ކުރިއަށްދާނީ އަށް ޒޯނެއްގެ މެދުގައެވެ. ޒޯން ބުރުވެސް ލީގު އުސޫލުން ކުރިއަށްދާއިރު، ޒޯން ބުރުން އެންމެ ކުރި ހޯދާ ޓީމެއް ޒޯން ޗެމްޕިއަންގެ ޝަރަފާއެކު ގަދަ 16 އަށް ދަތުރުކުރާނެއެވެ. އަދި ކޮންމެ ޒޯނެއްގެ ދެވަނަ ޓީމުވެސް ގަދަ 16 އަށް ދަތުރުކުރާނެއެވެ. އެ އަށްފަހު ނޮކްއައުޓް އުސޫލުން ކުޅެ، މުޅި ރާއްޖޭގެ ޗެމްޕިއަން ޓީމެއް ހޮވާނެއެވެ.

މި މުބާރާތުގައި ޖުމްލަ އަށް ޒޯނެއް ހިމެނޭއިރު ޖުމްލަ 91 ޓީމު ބައިވެރިވެފައިވާ ކަމަށް މުބާރާތް އިންތިޒާމުކުރާ ގޯލްޑަން ފުޓްސަލް އެސޯސިއޭޝަނުން ބުނެއެވެ. މުޅި މުބާރާތުގެ ޗެމްޕިއަންޓީމަށް 65،000 ރުފިޔާގެ އިނާމެއް ހުށަހަޅާފައިވާއިރު، ރަނަރަޕް ޓީމަށް 25،000 ރުފިޔާ ވަނީ ހުށަހަޅާފައެވެ.

ދެ އަހަރުގެ މެދުކެނޑުމަކަށްފަހު ގޯލްޑަން ފުޓްސަލް ޗެލެންޖް ބާއްވާއިރު، މި މުބާރާތް އެންމެ ފަހުން ބޭއްވީ 2019 ވަނަ އަހަރެވެ. އެ ފަހަރު ފައިނަލުގައި ބ. އޭދަފުށި ބަލިކޮށް ޗެމްޕިއަންކަން ހޯދާފައިވަނީ ތ. ތިމަރަފުށިންނެވެ.