2022ގައި ފަތުރުވެރިކަމަށް ބައި ގަރުނު: ފަތުރުވެރިކަން ތައާރަފުކުރުމަށް މެދުވެރިވި ކޯބިންގެ ޚާއްސަ މެސެޖެއް ދިވެހިންނަށް
އޭރު އިޓަލީގައި ހުންނެވިއިރު ރާއްޖެއާއި ބެހޭ ގޮތުން މާގިނަ މައުލޫމާތެއް އެނގިވަޑައިނުގަންނަވާ
ރާއްޖެއަށް ފަތުރުވެރިކަން ތައާރަފުކުރުމަށް މެދުވެރިވި އިޓަލީ ވިލާތުގެ ރައްޔިތެއް ކަމަށްވާ ޖޯޖް ކޯބިން
2022 ގައި ފަތުރުވެރިކަމަށް ބައި ޤަރުނު ފުރޭއިރު، ރާއްޖެއަށް ފަތުރުވެރިކަން ތައާރަފުކުރުމަށް މެދުވެރިވި އިޓަލީ ވިލާތުގެ ރައްޔިތެއް ކަމަށްވާ ޖޯޖް ކޯބިންގެ ޚާއްސަ މެސެޖެއް ދިވެހިންނަށް ދެއްވައިފިއެވެ.
1971 ވަނަ އަހަރު އޭރުގެ ސިލޯނަށް ކުރެެއްވި ދަތުރުފުޅާއި ގުޅޭގޮތުން ހުކުރު ދުވަހު ރާއްޖެއެމްވީއާ ވާހަކަ ދައްކަވަމުން ކޯބިން ވިދާޅުވީ، އެ ދަތުރުފުޅަކީ ރާއްޖެއަށް ވަޑައިގެންނެވުމުގެ މަޤްސަދުގައި ކުރެއްވި ދަތުރުފުޅެއް ކަމަށެވެ. އެގޮތުން އޭރު އިޓަލީގައި ހުންނެވިއިރު ރާއްޖެއާއި ބެހޭ ގޮތުން މާ ގިނަ މައުލޫމާތެއް އެނގިވަޑައިނުގަންނަވާ ކަމަށް ކޯބިން ވިދާޅުވިއެވެ.
ކޯބިން ވަނީ ކޮލަމްބޯގައި ހުންނަ ރާއްޖޭގެ އެމްބަސީއަށް ވަޑައިގެންނެވުމަކީ ލިބިލެއްވި ނަސީބެއްގެ ގޮތުގައި ސިފަ ކުރައްވާފައެވެ. އެގޮތުން ރާއްޖެއަށް ޓޫރިޒަމް ތަޢާރަފު ކުރެއްވި އެއް ބޭފުޅާ ކަމަށްވާ މިހާރުގެ ހެލްތް މިނިސްޓަރ އަޙްމަދު ނަސީމު (ކެރަފާ ނަސީމް) އާ އޭރު ބައްދަލު ކުރެއްވިކަމަށް ކޯބިން ވިދާޅުވިއެވެ. ނަސީމާއި ބައްދަލު ކުރެވިގެން ދިއުމަކީ ރާއްޖެއަށް ވަޑައިގެންނެވުމަށް މަގުފަހިވެގެން ދިޔަ ގޮތްކަމަށްވެސް ކޯބިން ވިދާޅުވިއެވެ.
ރާއްޖެއަށް ކުރެއްވި ދަތުރުފުޅާއި ގުޅޭގޮތުން ކޯބިން ވިދާޅުވީ، ރާއްޖެ ސިފަ ކުރެވިގެން ދިޔައީ މި ބިންމަތީގެ ސުވަރުގޭގެ ގޮތުގައި ކަމަށެވެ. ރާއްޖޭގެ ރައްޔިތުންގެ ހިތްތިރިކަމާއި، ހިތްހެޔޮކަންވެސް ކޯބިންގެ ވާހަކަފުޅުގައި ފާހަގަ ކުރެއްވިއެވެ. ރާއްޖެއަކީ ކުރިއަށް އޮތް ތަނުގައި ފަތުރުވެރިކަމުގެ މަޤްބޫލު މަންޒިލަކަށް ވެގެންދާނެ ކަމުގެ ކުޑަވެސް ޝައްކެއް އޭރު ނެތްކަމަށް ކޯބިން ވިދާޅުވިއެވެ.
އިންޓަރވިއު ނިންމަވާލައްވަމުން ކޯބިން ވަނީ ރާއްޖޭގެ ރައްޔިތުންނާއި މި ޤައުމަށް އަބަދުވެސް ކާމިޔާބު މުސްތަޤުބަލެއް ލިބިގެން ދިއުމަކީ އޭނާގެ އުއްމީދުކަމަށް ވިދާޅުވެ ދިވެހިންނަށް މެސެޖެއް ދެއްވާފައެވެ. އަދި އައު އަހަރުގެ ތަހުނިޔާ ކޯބިން ވަނީ ދިވެހި ރައްޔިތުންނަށް ވިދާޅުވެފައެވެ.
ކޯބިންގެ އިތުރުން ނަސީމަކީ ރާއްޖެއަށް ފަތުރުވެރިކަން ތަޢާރަފު ކުރުމުގައި އެންމެ އިސްކޮށް އުޅުއްވި، އަދި ރާއްޖެއަށް ފަތުރުވެރިކަން ތަޢާރަފު ކުރުމުގައި އެންމެ ބޮޑު ދައުރެއް އަދާކުރެއްވި ބޭފުޅުންނެވެ.
ރާއްޖެޓީވީގެ ފަށާއިރު ޕްރޮގްރާމަށް މީގެ ކުރިން ނަސީމް ދެއްވި އިންޓަރވިއުއެއްގައިވެސް ވަނީ ޖޯޖް ކޮބިންއާއި ބައްދަލު ކުރެއްވި ކުރެއްވުމަށް އަލިއަޅުވާލައްވާ ވާހަކަ ދައްކަވާފައެވެ. އެގޮތުން ކޮލަމްބޯގެ އެމްބަސީން ކޯބިންއާއި ބައްދަލު ކުރެއްވިއިރު ހުސައިން އަލިދީދީ ހުންނެވީ ކޮޅުބުގެ އެމްބަސެޑަރަކަށް ކަމަށާއި، ކޯބިންއާއި ބައްދަލު ކުރެއްވީ ހުސައިން އަލިދީދީގެ އެދިލެއްވުމަކަށް ކަމަށް ނަސީމް ވިދާޅުވިއެވެ. އަދި މި ބައްދަލު ކުރެއްވުމުގައި ކޯބިން ދިވެހިރާއްޖެއަށް އަންނަން ޝައުގުވެރިވާ ވާހަކަ ދެއްކެވި ކަމަށާއި، އެއަށްފަހު ރާއްޖެއަށް ފަތުރުވެރިން ގެނައުމުގެ މަސައްކަތް ފެށުމުގެ ވާހަކަތައް އެންމެ ފުރަތަމަ ދެއްކެވީ، ޔުނިވަރސަލް މުޙައްމަދު އުމަރު މަނިކާއި ޗަންޕާ ޙުސައިން އަފީފުގެ އަރިހުގައި ކަމަށް ނަސީމް ވިދާޅުވި އެވެ.
ރިސޯޓެއްގެ ގޮތުގައި އެންމެ ފުރަތަމަ ހުޅުވުނީ ކުރުނބާ މޯލްޑިވސް (ވިހަމަނާފުށި) ކަމަށާއި އޭގެ ދެ މަސްފަހުން އެބޭފުޅުންނާ ވާދަޔަށް ބަނޑޮސް ރިސޯޓް ހުޅުވި ކަމަށް ނަސީމް ވިދާޅުވި އެވެ. އަހަރެއްހާ ދުވަސް ވީތަނުން ބަނޑޮސް ނުހިންގި ގެއްލުން ވަމުންދާތީ ސަރުކާރުން ބަނޑޮސްވެސް އެބޭފުޅުންނާ ޙަވާލު ކުރެއްވި ކަމަށް ނަސީމް ވިދާޅުވި އެވެ.
ނަސީމް ވިދާޅުވީ އެންމެ ފުރަތަމަ ކުރުނބާ މޯލްޑިވްސްގައި ހެދީ ވަރަށް އާދައިގެ 30 ކޮޓަރި ކަމަށެވެ. އަދި ފުރަތަމަ ޚިދުމަތް ދިނުމުގައި އުޅުއްވީ ވެސް އެބޭފުޅުންކަމަށް ނަސީމް ވިދާޅުވި އެވެ.
2022 ވަނަ އަހަރަކީ، ފަތުރުވެރިކަމުގެ ރަންޔޫބީލް ފާހަގަކުރާ އަހަރުކަމަށްވާތީ، އެ އަހަރު ކުލަގަދަ ގޮތެއްގައި ފާހަގަކުރެއްވުމަށް ސަރުކާރުން މިހާރު ވަނީ ނިންމާފައެވެ.
